Godigo Sęba Tagala Palai Bidigo Po 15:18 - Godigo dwagi yai po buku

¹⁸ “Polobadu mu Genuai Bidi agai te sę pedalabo po wai dao, tama megi te sę pedalalio.”’”

Godigo Sęba Tagala Palai Bidigo Po 15:18 Referans Kwoze

Efesus 3:9

Tama te tigidali nai nigai God, te hasia mu agai homude aga nosali yabo kolesaga dualai. Tama te homu kolesaga tigidali sogo polobadu aga homude dualaluai. Tama megi agai homu kolesagade dualaluali yabo sę po page eno haninama te tigidali we bidibolo pusumainogo agai enabolo te wiegi yai po pusubo sę mawai.

Efesus 1:4

Tama Godigo tǫ nigisiąbadi, agai da Krais dali wadolainu, da sa muai dao. Te sę page e dao: Godigo homugo da aga gedude dwai sę isiąwai we bidi, agai gedude doloba pai we bidi bidimainogo eyu agai da sa muai dao.

1 Pita 1:20

Tama God agai e tǫ nigisiąbadi, polobadu mu agai aga koneama tama te sę yabode sa muani. Me ma megi e nosali sogo agai aga dage tobade waselai dao.

Efesus 1:11

Ao, te God agaduba agai te nosali pedalabo sęde homu bugagia konea pelama, tama agai homugo magi sę yainogo ebo sę, te sę tigidali mu pedalobo dao. Tama agai te homu kolesaga wali peyu, tama polobadu agai da Juda dabe sa muai. Tama aga homugo da Juda dabe da aga hani we bidi mu bidimainogo agai da Krais dali wadolali. God agai te sęde hasia mu konea pelama, tama tiwai dao.

Godigo Sęba Tagala Palai Bidigo Po 17:26

Godigo hasia mu bidi me deli nigai (te bidi nogi Adam). Tama nosali te bidi deligo te tigidali haniani bidi dabe dalali. Tama Godigo tigidali bidi dabe tigidali buluba dobayali, augwa te bulude bidimainu yai. Tama God aga digi polobadu mu augwali te bulu dabede bidabo sogo bodolu munama, dąį ilai dao.

Israel Hanigo Namba 23:19

God da, aga te tǫde bidi mu menio. Godigo da bidigo yali gilama ili po me wabo menio. Agai homu da bidigo yali gilama me hasegelebo menio. Mu menio. Te agai magi sę me yainogo eyu, po dąų wali da, teda agai tama ebo dao. Agai te po wabogo naga te sę tama pedalobo dao.

2 Tesalonaika 2:13

Tiali ma, eno abagi dede, megi dage te tobage we bidi menio. Genuai Bidigo dagebolo dwagi yai homu eyu, dage godolo mu ebo dao. Polobadu mu God agai dage sa muyu, dage ma saibao wai. Tama Godigo Mobo Bidi agai dage habu seliyu, ‘Godigo hani dao’ wai. God agai homugo dago Genuai Bidi Jisas Krais agai genuai ula dali bomo dali agai dage dali nosali dobawaibao. Tama te homu eyu, agai dage i wali, dago agai gesi dwagi yai po dagebolo pusali sogo. Tama dagego te mu po dao wai dao, tama God dali, dage dali sigo te tebo kolesagade Godigo dage ma sai. Tama tibaso, sesemane sogo dago gedu haluasa po weyu, dago Godibolo buba hwi weyu nage usu dao po wabo dao.

Matyu 13:35

te Godigo po pusali bidi profet me deligo pedauwalide pusali po usu numainogo. Te profet bidi agai polobadu te po wai, “Te eno augwalibolo po weyu, tama eno te po digi po wabo tiwai yaibao. Te eno augwalibolo te polobadu mu geme dualaluali po te megi e sogo me geme dualaluali po te po eno augwalibolo pusaibao,” te po wai.

Kraisgo Geme Dualali Sę Pedelabo Po Jonbolo Ola Mani 17:8

Te nago suali dwai hudigi ebo hasa aga polobadu bidai, tiali goli megi aga me bidibeo. Tamadi tama agai te page meni yai tǫ dedage tagalama, tama aga edaba holama, tama aga pelama, aga mu dolaibao. Polobadu mu te Godigo te tǫ nigisiąbadi agai te augwali isiąma gamonaibao wali we bidi nogi te bukude asęai dao. Tama te bukude nogi asęsiąwani te tǫde bidibo we bidi augwali tigidaligo te hudigi ebo hasa sulama, tama augwali homu hauwa eyu, aga nogi ugwaba saibao. Magi basowe? Polobadu aga bidai, tama megi aga me bidibeo, tama nosali aga ma pedalaibao,” te ensel mobo bidigo te po enabolo wai.

Kraisgo Geme Dualali Sę Pedelabo Po Jonbolo Ola Mani 13:8

Tama te we bidigo polobadu ela muani kibu sipsip wai agai te genuai buku elaluyu bidibo dao. Tama te bukude agai te agade konealubo po dąų wali we bidi augwaligo nogi agai asęai dao, te polobadu mu, te Godigo te tǫ nigisiąbadi, tama augwali isisąma gamonaibao. Tiali goli te bukude nogi asęsąwai we bidi, augwali tigidali augwaligo te moni hasa lepat tiwai yai dwai hudigi ebo hasa aga nogi ugwaba siyu, tama agabolo lotu po waibao.

Matyu 25:34

Tama te tuni bidigo aga dolo nogo badu bidibo bidi dabebolo po weyu, te po waibao, ‘Dage da, te eno Ayago dage dali wiegi yai sę mu yai dao. Polobadu mu agai te tǫ nigali sogode agai we bidi tonalubo kolesaga sisi ilama, tama tede dage bidabo madi sisi ilali elalubo. Dage aselama, te bulu tomoba dage asiąo.

Aisaia 44:7

Te ena tiwai god me deli bidibawe? Te aga bidiba wida, teda aga digi te daba pedalubo sueibao. Tama agai me dabolo te aga polobadu polobadu mu yali sę po omainu yaibao, te eno gagalama, te we bidi pedelali po tiwai wabo odaibao. Tama agai te nosali pedelabo sę po me omainao. Awe, te aga hanilama pusao, te da tigidaligo te nosali yabo sę po hania pusubo odaibao.

Aisaia 45:21

Dage tigidali we bidi, dage aselama, dagego po te po tųba pusagasao. Dagego duga haside digi hanalu, te gega suyu bolo yao, mena god mugo te polobadu mu po wali sę po te megi tama pedalubo dawe? Ena Genuai Bidi, ena deligo naga eno te nai dabe pedelaiba po pusali. Tama suao. Te gasa god munu me bidibeo. Ena te doloba pai kolesaga naga ebo God, eno te ena we bidi dabe ma dobola sabo God da, enaduba deli naga ena bidibo dao.”

Amos 9:12

Tama tilama, tama te Israel dabego boi hwįnama, te Idom tǫ kantri pedai badu elaluali tǫ tigidali ma sobadi, tama augwaligo te gasa tǫ kantri te eno augwaligo somainu dąį ilali kantri tǫ me ma sesa paibao.” Te Genuai Bidigo po dao, tama agai te aga wali po tiwai gilama yaibao.

Sekaraia 14:7

Te be hulibo sogo pedalubo side, te ula da me tama te ula naga elaludaibao. Tama tialima, te giliga nanobo sogo me be hulibo sogo me elalugobeo. Genuai Bidi deligo naga te sę nisu sogo pedelabo te agai naga konealubao.