2 Timoti 6:2 - Godigo dwagi yai po buku

² Me ma, te olo sę ebo bagego genuai bidi aga te Godigo po odobo bidi bidiyu da, teda te sę ebo bidi dabego te homu me ilamuo, “Te genuai bidi aga Kraisba homu begi pai bidi bidibaso, aga da te eno ama tiwai dao. Tama tibaso, ena dali eno sę tonalubo genuai bidi dali, te da si Godigo gedude tiwai si dao. Tama tibaso, eno agai po odogobeo, te tigi dene sę egobeo.” Te homu augwaligo ilamuo. Menio. Augwaligo tama homu yao: “Eno bomo elama eno genuai bidigo sę bugagia mu eyu, tama eno te tiwai aga tau saibao. Magi baso meni. Eno genuai bidi aga te Kraisba homu begi pai bidi, tama eno aga dali dwagi yai homu eyu godolo ebao.” Te sę ebo bage augwaligo te homu yao wao. Te sesemane sogo nago te we bidi augwalibolo te tiwai kolesaga eno nagebolo wali po tiwai gilama te we bidi ola madubadi geao, tama augwaligo homu hodolama wali pomainao.

2 Timoti 6:2 Referans Kwoze

Kolosi 4:1

Dage sę bidi tonalubo bidi, dagego augwali tigidali dali kolesaga deli naga yao, te doloba pai kolesaga naga yao. Koneao, dage me te tonalubo Genuai Bidi elalubao, aga dagalude bidibao.

2 Timoti 4:11

Nago bomonama te po te Godigo we bidi augwalibolo pusao, tama augwaligo wali pomainogo ola mao.

Jutgo Asęani Pas 1:8

Tama te dage tomoba geme duala sagaselama bidibo bidi dabe augwaligo me te tobage dwai dwai kolesaga ebo dao. Haniani na eyu, augwali homu hodoliyu, tama augwaligo meda yai kolesaga augwa tigide ebo dao. Tama augwaligo dago Genuai Bidigo augwali tonaluabo bomo sela sąyu, tama augwaligo te Godigo dagalude bidibo ensel mobo bidi dabe dali me nogi posobo po wabo dao. Te ensel dabe augwaligo ula yai bomo elaluali goli, te bagego nogi posobo po augwalide widu gebao.

2 Pita 2:10

Tama te bidi dabe augwali meba te dene genuai mu saibao. Te augwaligo tigigo yainu meda yai kolesaga wali pabo homu hodolo bidi dabe augwaligo te tigidali genuai bidigo po hagela eyu, tama te po sela sąbo dao. Tama te tibo po ola mabo bidi dabe augwali te hale isiąbo bage dao, tama augwaligo augwa homu naga wali pabo dao. Wi me esiąyu, tama te bidi dabe augwaligo te dagalude bidibo genuai mobo bidi dabe dali dwai posobo po wabo dao.

1 Pita 5:1

Tama tibaso, megi eno te dage Godigo hani we bidi tonalubo bidi dabe dali e homu kęna sabo po obao. Ena digi me ena da te Godigo hani we bidi tonalubo bidi dao, te dage tiwai. Tama eno gedugo Krais aga dene sabo suai bidi dao. Tama aga ma asiyu, tama aga bomo yai ula pedalobo si, te sogo ena te bomo yai ula meba sabo bidi me bidaibao.

Hibru 3:14

Magi baso meni. Polobadu dago Godide konealubo po dąų wali, teda te konealubo po megi me dago bugagia dąų weyu, teda da isiboba usu nigi paibao. Dago tama tiyu da, teda da te Krais dali wadolama, tama sę deli naga aga dali hodobo eyu tama bidaibao.

Hibru 3:1

Te Godigo po odolama wali pabo ama dede dabe, te dagalude bidibo Godigo dage me te Jisasgo sę ebogo i wai dao. Tama tibaso, dagego homugo Jisas bugagia kone paliąo. Agai te dago agade konealubo homu dąų weyu tama agade po te we bidi gesabide pusubo tau siyu, tama dago pris tobolu bidi bidimainogo eyu, Godigo aga e tǫba tagala palali.

Taitus 3:8

Te po mu dao. Tama eno homugo nago te po bomo elama ola mao, te Godibolo augwa homu tigidali mani we bidi augwaligo te ola mabo po dali homugo bugagia kone palama, tama augwaligo bomo elama te dwagi yai sę eyu bidimainao. Dwagi yai sę te dwagi yai page elalubao, tama te dwagi yai sę ebogo te tigidali gasa we bidi dabe me tau sabo dao.

Taitus 2:15

Nago eno megi wali ola mabo po te po te we bidi dabe dali nago te po ola mao. Nago augwali te pogo hodolama, tama augwaligo te po wali pomainao. Tama nago te po sela sąnama wali pisąbo bidi augwaligo homu begelemainu nago augwali dali po bomo elama wao. Te bidi dabe augwaligo nage olo bidi yaliwe te homu idali weyu tama nago te ola mabo po bugagia bomonama augwalibolo ola mao.

Taitus 2:1

Te dwai po ola mabo bage augwali te tiwai bidibo dao. Tiali goli nage, nago te Godigo wiegi yai po wali pabo we bidigo yabo kolesaga ola mabo po nago bugagia ola mao.

2 Timoti 5:1

Te Godigo po odobo we bidi hani tomode te monu dabe tobolu bidi me deligo dwai sę eyu da, nago aga te dwai sęde ma dodoloyu tama nago agabolo sesena pai po me olamuo. Menio. Nago po nagame elama dua digi dodolao, te naga aya monu dodolobo tiwai gilama yao. Tama nago te gesi ogwa bidi dabe dodoloyu, te naga ama dodolobo tiwai gilama yao.

2 Tesalonaika 1:3

Dago abagi dabe, sesemane sogo dago Godibolo usu da weyu, dago dagede homu kone palu gedu haluasa po wabo dao. Tama dago Godibolo nage usu da po wabo si, te usu si ebo dao. Magi basowe? God agai dage tau selama, tama dagego Jisasde po konealubo kolesaga mu genuai mu yai dao, tama dage deli deligo dwagi yai homu duga abagi dabe dali ebo dao, tama dagego te kolesaga ebo mę ela pabo dao.

Kolosi 1:4

Magi baso meni, dago odali, te dagego Krais Jisasde konealubo po dąų wali po me, te Godigo we bidi tigidali dali dagego dwagi yai homu eyu godolo ebo kolesaga po me, te po si dago odobaso, dago agabolo puba hwi po wabo dao.

Efesus 3:6

Te dualaluali po page e dao: dage Juda hani isiąwai bidi hani dagego Godigo wiegi yai gesi po odama, dagego homu kolesaga tigidali te poba munama, tama dage te Juda hani dali wadolama tama da dali deli hani bidibao. Tama tibaso, da te megi e tiwai dao: polobadu Godigo agai te Kraisba augwa homu begi pabo Juda dabe dali dwagi yai sę hauwa yaibao po dąų walali. Tama megi Kraisgo yali sęde Godigo te tobage dwagi yai sę te Juda hani isiąwai bage dali me yaibao, te augwa homu agaba begi pali we bidi augwali dali agai te tiwai mu yaibao.

Efesus 1:15

Te Godigo te tobage wiegi yai sę dabolo ebaso, eno agabolo usu da po wabo dao. Eno odali, dagego konealubo po Genuai Bidi Jisasde dąų wali po me, tama dagego augwali dali wiegi yai homu eyu, te Kraisgo po odobo we bidi tigidali godolo ebo po me, te po si eno odali.

Efesus 1:1

Ena Pol da, ena Krais Jisasgo po pusigi pabo bidi dao. Tama God aga homugo ena te po wagi pabo sę emainogo eyu, agai ena te sęba muai dao. Tama eno e pas Godigo we bidi dagebolo eno asęna tolobao, dage Efesus bulu bidi hani, dage Krais Jisas wali pabo we bidi hani mu dao.

Galesia 5:6

Tama tiyu, dago koneani, te bidi aga Krais Jisasde wadoloyu da, teda aga tigiwali togobo sę te olo sę tama tiwai da, tama te tigiwali togisąwai bidi me, te me te olo sę tiwai da. Te sęde magigobeo, te olo sę tama dao. Tiali goli, te bidigo aga abagi dali te wiegi yai homu elama tama tau sabo, te bidigo Godide konealubo po dąų wabo homu kolesaga hodolobao, te agai kolesaga te usu mu elalubao.

Polgo Po Pas Rom Dabeba Asęani 11:17

Tama augwali te gide elalubo ni oliv tiwai bidiyu, tama Godigo te ni oliv nologo meba dwali togolama sela sąnama, tama agai dage olo ni oliv nologo te bulude elalubadi selama, tama dage te gide elalubo ni olivgo nologo togwali pesagede wadolali. Tama dagego augwali hasegelama, tama megi dage bugagia bidibao. Tama dage te elalubo dwagi yai ni olivba wadolobaso, tama dage dali te ni aga nologo mu dali te dagego te ni oliv pedalidu asobo ąįgo ili sabo dao, te nigo bomo me dagego sabo dao.

Polgo Po Pas Rom Dabeba Asęani 8:29

Magi baso meni, te Godigo augwali polo koneani bidi dabe, agai augwali me hagea siyu tedali muani, te aga Ogwa tiwai pedalomainogo yai, tama ama name hauwa bidimai hagede yali, tama Krais te augwaligo ama gomunai bidi bidaibao.

Matyu 25:40

Tama tuni bidigo po wei ponoyu, augwalibolo te po waibao, ‘Eno mu po dagebolo obao, te tigidali sę dagego te eno amanu e tiwai te nogi meni yai bidi dali yali wiegi yai sę, te sę dabe te dagego ena dali te yali dao.’ Tuni bidigo te po waibao.”

Matyu 23:8

“Tiali goli, te bidi dabe augwaligo dage nogi eyu, ‘Tisa, po ola mabo bidi da’ olamuo. Menio. Te bidi me deli naga te aga dagego te po ola mabo bidi dao, tama dage tigidali te ama dede ama dede naga bidibo dao.

Matyu 6:24

“Te bidi deligo genuai bidi sigo sę ebo usu egobeo. Agai me deli dali dwai homu eyu, tama me dali te agai wiegi yai homu yaibao. Te agai me deli wali peyu, tama agai gasa bidi me aga homude bo weyu, te tudiba muaibao. Te tiwai dagego te Godigo sę dali te mone sabo sę dali yainogo ebo te usu egobeo. Te dage te mone dali doado bage dali si sabo sę ebo homu dologode bidiyu da, teda dagego duga homu te Godigo sę ebode bugagia mugobeo,” wali.

Joel 2:28

Te Genuai Bidigo po ma weyu, te po wali, “Nosali te eno Mobo Bidi te tigidali we bidiba tagala palaibao,” wali. “Tama te dagego ogwa dabe me, wegigo me, te eno po te profet dabego po pusubo tiwai yaibao,” wali. “Te dage monu dabe bidi dabego te na eyu, te gesi ogwa bidi dabego me te na tiwai yaibao,” wali.

Israel Hanigo Namba 16:3

Tama te bidi dabe augwali sisinagaselama, Moses de Aron si pageba sisinagaselama, tama augwali sibolo e tama po wali, “Odao, da tigidali tama te Genuai Bidigo dao, te dage si naga menio. Tama Genuai Bidi da tigidali dali bidibao. Tama tialima, dage sigo magi baso duga nogi ugwaba selama, da tonalubawe? Dage sigo kolesaga dolo menio,” tama po wali.

Godigo Sęba Tagala Palai Bidigo Po 1:15

Te nosali si sela sogo silibaso, tama te sogo te Jisasde homu dąų wai we bidi dabe deliba sisinagasali. Bidi sese me sela me sela 120 tama bidi sisinagasali. Tama Pita doligulama, te we bidibolo po me wai.