2 Samuel 5:24 - Godigo dwagi yai po buku

²⁴ “Tama dagego te ni dabe ugwadu daide te hauwa bidi bilibo kilikili wabo tiwai odaibao. Tialima, dagego koneama, ena digi ena te dage Filistia dabe dali hwįgi pabodu te ena polasa paibao. Dagego te tiwai sę ebo po odobo si da, teda dage udayu, te augwaliba hwįgi piąo,” wali.

2 Samuel 5:24 Referans Kwoze

Te Israel me Juda Hani Sigo Tuni Bidigo Po Elalubo Buku Si 7:6

Magi baso, tigidali te Siria bage wi pela silai suali. Te pio mu, te Genuai Bidi aga digi te Siria bage augwali wi pomainu genuai po mu kulukulu u wai, te Siria bage augwaligo odama, tama tialima, te genuai hani ami bidi dabe te bidi duabo kibu hos me, me te karis kibu dabe dali, augwali hodobo asai tiwai ąǫ yali. Tama te Siria bage augwaligo te po tama wai, “Tialima, te Israel bage augwaligo te Hit king bidi badi, te Isip king dabe dali, augwaligo abelama, tama te ami bidi dabe augwaligo da dali hwįagasainu wabao,” wali. Siria bagego te po olama, tama te augwali bidali pesage polo tagalama, tama augwali polo tama mu hodaluama, isidali weyu wi pai. Augwaligo te sel ugwa be me, te hos kibu me, me te donki kibu me, augwa naga tede bidibadi taga pai. Tama augwali wi pai, tama augwali peyu, magi nai me deli sela pabe.

Te Israel Tobolu Bidi Dabe 4:14

Tama Deborago te Barakbolo te tiwai po wali, “Tegobao! Da pinao. Genuai Bidi te nage pabo badu te polasa pobao. Tama tibaso, te sogo Genuai Bidigo te nage tau selama, tama nago te Sisera aiyaba elalueibao,” te po wai. Tama po obaso, Barakgo te 10,000 bidi hauwa selama, tama augwaligo te Tabor bulu du tagalama, aiyaba dulali.

Te Israel Tobolu Bidi Dabe 7:15

Tama Gideongo te na yali po page pusubo odali sogo, aga te kidu sugunama, tama Godiba lotu wali. Tama aga te Israel dabe bidalubo pesageba ma sabolama, tama i wali, “Hodaluao! Da pinao! Megi da, te Genuai Bidigo da tau selama, tama dago te Midian ami bidi dabe aiyaba elaluabo te usu yaibao.” Te po wai.

Tuni Bidi Dabego Po Elalubo Buku Deli 14:15

Tama dagego te bidi dabe augwali te ni abude bilibo sela wabo tiwai odaibao. Tialima dagego koneaibao, ena digi eno te Filistia dabe dali hwįainu polasa paibao. Tama dagego te sela wabo odobo sogo, te dage udayu, te augwaliba boi hwįgi pao,” te po wali.

2 Samuel 5:23

Tama Devitgo Genuai Bidiba hanalu, te po wali, “Te eno magi yagawe?” Tama Genuai Bidigo te po wei ponoyu, te tiwai po wai, “Dagego augwaliba hwįgi pao, tiali goli dage augwali bidibo dolo si me pelamuo. Dage te augwali tudi badu pelama, tama te ni balsam sili dolalubo pesage badu pelama, te hwįabo sisi elaluiąo,” wali.