2 Samuel 5:10 - Godigo dwagi yai po buku

¹⁰ God, te Tigidali Bomo Elalubo Genuai Bidi, te Devit dali bidali, tama tibaso Devit te bomai king sesemane sogo pedalubo sę iduai dao.

2 Samuel 5:10 Referans Kwoze

2 Samuel 3:1

Te tudi badu nosali side, te Devitgo hanide Solgo hani si tomode te wąbi hwįani sesabi mu elaluali. Tama Devitgo hani te bomo yai mu pedelama, tama augwaligo te Solgo hanigo bomo tamonobo sę mu yalio.

Polgo Po Pas Rom Dabeba Asęani 8:31

Te Godigo te da tau sabo sę hauwa po odobaso, tama dago magi po Godigo te ebo sę dabede waibawe? E tama naga dao, te Godigo da tau sobaso, teda dego da dali boi bidi elama tama da aiyaba elalugowe? Woo, bidi mu menio.

Godigo Nogi Ugwaba Sabo Tęąbi Po Wabo Buku Dabe 46:11

Te Tigidali Bomo Elalubo Genuai Bidi da dali bidibao. Te Jekopgo God aga te da seselalubo bidi mu da.

Dwagi Yai Gesi Po Lukgo Asęani 2:52

Tama Jisas genuai elama, agai homu kolesaga dwagi yai mu yali. Godigo me e tǫde bidigo me Jisas godolo mu elama, kua pali.

Aisaia 9:7

Te tuni bidi te tuni bidi Devit hasegelama, bidaibao. Tama aga te Devitgo tuni bidi siade dualaluyu, te we bidi dabe tonaluaibao. Te agai gavmanigo bomo tigidali sogo genuai holudaibao. Tama hwįbo me menia pelama, bugagia tigidali sogo bidaibao. Magi baso meni. Te tuni bidi aga te tigidali sogo dwagi yai doloba pai kolesaga naga ebo dao. Tama agai te kolesagago aga te bomai tuni bidi bidaibao, te megi me, tigidali sogo nosali me. Genuai Bidi Tigidali Bomo Elalubo Bidigo homugo bomo mu elama, we bidi dabe dali wiegi yai sę yabo homu ebao. Tama tibaso, agai te sę dabe me elama, pedalaibao.

Bugagia Bidibo Kolesagade Po Asęai Buku 4:18

Te dwai sę ebo bidi dabego wali pabo sunumi te be hulia siyu, mu hulia sai dąų mu wabo tiwai ebao. Augwali te tula muyu, tama te magi naigo te augwali sągąde dolali te augwa me konegobeo. Tiali goli, te doloba pai bidi dabego sunumi da, te giliga kigamu nanobo tiwai elama, tama te giliga nanobo sę bomonama pedelama, te giliga tomo yagasoboba usu nubo dao.

Godigo Nogi Ugwaba Sabo Tęąbi Po Wabo Buku Dabe 46:7

Te Tigidali Bomo Elalubo Genuai Bidi aga te da dali bidibao. Te Jekopgo God aga te dago duala sabo pesage elalubao.

Jopgo Po Asęani Elalubo Buku 17:9

Tiali goli, tagala. Te doloba pai bidi dabego augwa dwagi yai kolesaga tagalogobeo. Menio. Augwa doloba pai kolesaga naga yainu bomo mu yaibao,” wali.

Tigidali Nai Gagalama Nigali Side 21:22

Te sogo Abimelek te aga ami bidi tonalubo polalubo bidi Fikol dali, augwali si te Abraham bidibo madi pelama, tama po wai, “Te tigidali sę nago ebode te God nage dali bidibo dao.

Godigo Nogi Ugwaba Sabo Tęąbi Po Wabo Buku Dabe 24:10

Genuai polalubo tuni bidi king aga de dawe? Aga te Genuai Bidi God dao, agai te genuai ami bidi hani tonalubo dao. Aga deli digi mu te polalubo tuni bidi king mu dao.

Hagai 2:4

Tagalao, dage tigidaligo haliga moni sęgę mu egimio. Dage hodaluama tama sę yao, magi baso meni, ena Tigidali Bomo Elalubo Genuai Bidi ena dage dali bidibao.

1 Samuel 18:5

Tama Devit te Sol dali bidali, tama Solgo te Devitbolo olama, te ami bidi dabe selama, te boi bidi dabe dali hwįgi pao wali, tama augwali hwįbo sogo da, teda Devitgo hanigo te boi bidi dabe aiyaba elaluali. Tama tibaso, Solgo aga te ami dabego polalubo ofisa bidi nigilali. Te tigidali we bidigo me, te Solgo ofisa bidi dabego me, augwaligo suali, Devit te genuai bidi pedalubaso, tama augwali bugai haliga mu yai.

1 Samuel 18:12

Genuai Bidi te Devit dali bidibo te Solgo koneani, tama Sol tudiba muduali. Tama tiyu, Sol te Devitde wi elama,

1 Samuel 18:14

Tiali goli, Genuai Bidi aga dali bidiyu, tama aga tau siyu, tama tigidali sę agai ebo te wiegi yai naga pedelali.

2 Samuel 7:9

Ena te nage dali bidiyu, te nage pabo tigidali tǫ pedaide te ena bilai dao. Tama eno te nago boi bidi dabe aiyaba elalu yai dao. Tama eno nageba te genuai nogi mawainu yali, te gasa bulu tǫ pedai te bulu tonalubo bomai bidi tiwai pedalumainu yai.

2 Samuel 8:6

Tama Devit aga ami bidi meba te Siria dabego bulu tǫ pedaide muna muna pelama, te augwaligo wąbi ma hwįdali weyu, te tonalumainu muani. Tama te Siria dabe te Devitgo dologode bidiyu, tama augwaligo agaba takis mone mani. Te tigidali bulu tǫ pedaiba Devitgo boi hwįgi pabo side, te Genuai Bidigo aga tau siyu, tama aga ugwaba dįą holali.

2 Samuel 8:14

Tama Devitgo te aga ami hani bidi meba te Idom bulu tǫ pedaide munama, te Idom dabe tonalumainu yali. Tama te Idom dabe aga dologode bidai. Te Devit pelama, hwįgi pabo bulu tǫ pedai tigidalide, te Genuai Bidigo aga tau siyu, tama aga ugwaba dįą holali.