2 Samuel 2:6 - Godigo dwagi yai po buku

⁶ Tama megi da, eno homugo te Genuai Bidigo dage bugagia tonalu, tama dage dali sesemane sogo bidimainao. Tama eno me te dageba wiegi yai kolesaga eyu, te dagego wiegi yai kolesaga te Solba yali te wei ponoyu, te tiwai ebo dao.

2 Samuel 2:6 Referans Kwoze

Bugagia Bidibo Kolesagade Po Asęai Buku 14:22

Te dwai kolesaga yabo homu ebo bidi dabe da, teda augwa homu da te mu geda mubao. Tiali goli, te bidi dabego wiegi yai kolesaga emainu homu wei ebo bidi da, te augwaligo agaba te bugai haliga mu ebo dao. Tama augwaligo agaba homugo kęą pabo kolesaga ebo dao.

Ma Dobola Sali 34:6

Tama aga te Moses pąba pelama ela soali, tama i weyu, te po wai, “Ena Genuai Bidi, ena Genuai Bidi dao. Ena God, tama ena te olo tau siyu mabo wiegi yai kolesaga badi, te homu dene ebo page bidi dao. Tama eno sębę polo me egobeo. Eno tigidali we bidi godolo mu elama, tama eno ena wali po tigidali wali pabo dao.

Matyu 5:44

Tiali goli megi eno dagebolo obao, dagego duga boi bidi dali dwagi yai homu eyu tama godolo eyu yao. Tama bidi meba augwaligo dagebolo dene mobaso da, teda dagego gedu haluasa po Godibolo wao, te agai augwali dali dwagi yai sę emainogo.

Matyu 5:7

Te gasa bidi dabe augwali dali homu dene eyu augwali olo mu tau sabo we bidi dabe, te augwali homu pemene wiegi yai emainao. Te Godigo augwalibolo me te homu dene eyu olo mu tau sabo kolesaga yaibao.

Matyu 10:16

“Odao, eno dage te sipsip tiwai te uni yowi augwali tomoba tagala palobao. Tama tibaso dagego te hasamanigo ebo kolesaga tiwai wali peyu, tama hasia bolo dagego yabo sę bolo homugo kone palao. Tama dagego te ba higo ebo nagamea pai kolesaga tiwai wali peyu, tama dwai sę me deli yabo homu kolesaga egimio.

Godigo Nogi Ugwaba Sabo Tęąbi Po Wabo Buku Dabe 57:3

Aga te dagalude bidiyu, tama agai eno gedu haluasa po wabo odama, tama ena ma dobola saibao. Agai te ena dolainu ebo bidi dabe te aiyaba elalueibao. Godigo te sesemane sogo ena wei mu eyu, godolo elama, tama agai ena munu me tagalugobeo. Mu menio.

2 Samuel 15:20

Nage ede te pęwadage sogo naga bidali, tama tiyu, eno homugo nago te bidibo bulu tagalumainu ilama, tama da dali bilimainu me iligobeo. Da te bulu wau subigila bilalubo bidi tiwai bilaluaibao. Te nago naga hani selama, tama dage ma geasa peyu da, te wiegi yai dao. Tama eno homugo te Genuai Bidigo nage bugagia wiegi yai ilama, tama nage sesemane sogo tonalumainu homu ebao,” Devitgo te po wali.

2 Samuel 10:2

Tama Devitgo te tama po wali, “Eno te wiegi yai kolesaga Hanunba yaiba,” wali, “te aga aya, Nahasgo, te enabolo yali kolesaga tiwai gilama yaiba,” wali. Tama tiyu, Devitgo te bidi meba tagala palama, te Hanunba homu dene ebo po wagi pomainu yali. Tiali goli, augwali te buluba sabalubo side,

2 Samuel 9:7

Tama Devitgo te tama po wali, “Nage wi munu me elamuo. Eno nago aya Jonatan te homu kone me elalubadi geani, tama tiyu, eno te wiegi yai kolesaga nageba yabo homu ebao. Te eno nageba te nago nǫų wąį Solgo tǫ tigidali te nageba mawaibao. Tama tigidali sogo nage te enaba naga aselama, nai tuagasu yagameo,” wali.

2 Samuel 9:3

Tama te kingo agaba ma hanalu wali, “Te Solgo hani sibi bage meba elalubawe, ma meniwe? Te elalubaso da, teda eno augwali wiegi yai bugagia ilaibao, te eno Godiba bomai po dąų wali gilama tiainu obao,” wali. Tialima, Sibago Devitba po walali, “Te Jonatango ogwa me deli bidibadi goli, te aga sągą penelama, dwai bidibao,” po wali.

2 Samuel 2:7

Mu tama Sol, te dagego king, isalio, tiali goli te Juda hanigo ena te augwa king pedalumainu yai. Tama tibaso, dage bomo elama dolalu, tama dage te magi nai me delide te wi me elamu dao,” wali.

Josua 2:14

Tialima, te bidi sigo po wei ponoyu, te po wai, “Da sigo po nagebolo dąų mu obao. Tama da sigo te dąų wali po togobaso da, te Godigo da si dolomainu yaibao. Te nago da sigo yali sę po dabe hanilisiąbaso da, teda da sigo te dąų wali po munu me togosiąyu, te nage dali, nago hani bage dali tau saibao, te Genuai Bidigo te genuai tǫ dabolo mabo sogo te tama tiaibao,” te po wai.

Rutgo Po Elalubo Buku 1:8

tama Naomigo augwali sibolo te po wai, “Dage si ma geasa pelama, duga si ida dali duga page buluba bidigi pao. Dage sigo wiegi yai kolesaga ena dali me eyu, te isali bidi dabe dali me tialio. Tama eno homugo te tiwai sę naga te Genuai Bidigo wiegi yai sę dage si dali emainao.