2 Pita 3:9 - Godigo dwagi yai po buku

⁹ Tama tede konesiąwai bidi mebago homu te Genuai Bidi agai te po dąų wali sęde te sę dua dua eyu polo egobeo. Tiali goli te menio. Agai dage bugagia tonaluyu bidibo dao. Agai homugo te we bidi me deli hagaidali te tonaluaibao. Agai homugo tigidali we bidi augwa homu begeleyu te dwai kolesaga ebo tagalamainogo, te aga tonalubo dao.

2 Pita 3:9 Referans Kwoze

2 Timoti 2:4

Te agai homugo te agai tigidali we bidi ma siyu, tama augwaligo aga mu po page mu konemainogo ebo dao.

Polgo Po Pas Rom Dabeba Asęani 2:4

Te ma, nago e homu ebawe, “Te Godigo ena wiegi yai bugagia iliyu, tama ena bobobage sogo tonaluyu, tama agai te dwai sę ebo wei enabolo polo me ponogobeo.” Te homu egio. Te Godigo wiegi yai polo wei ponosiąbo kolesaga ebode, te nago homugo te olo nai tiwai da, te homu ebawe? Godigo homugo nage homu begelemainogo, tama agai dwagi yai kolesaga naga nagebolo eyu tonalubo dao. Te kolesaga page nago konebewe?

Habakuk 2:3

Te sę dabe pedelabo sogo, te menu gana elalubao. Tama tibaso, nago te po asęnama, munalumainao. Tiali goli, te sesabi gana bidisiąbadi, te pąde sogo digi tama, te eno nagebolo ola mawainogo ebo sę da, te pedelaibao. Nago homugo te sę polo pedalugobe da homu yaibao, tiali goli nago dwasianu sogo tonaluama gana te sę pedelaibao, te mani bodolu te geda mugobeo.

Godigo Nogi Ugwaba Sabo Tęąbi Po Wabo Buku Dabe 86:15

Tiali goli, Genuai Bidi, nagede te homu dene ebo, me olo tau mabo wiegi yai kolesaga pągąnalubao, tama nage da, te bobobage guni yai bidi dao. Nago da wei mu eyu, tama nago homugo da dali kęą mu pai dao.

Aisaia 30:18

Tiali goli, Genuai Bidi da, tigidali sogo doloba pai kolesaga naga ebo God dao. Tama tibaso, agai dage homu dene elama, agai hobede ebo dage ola mawainu te tonalubao. Te we bidi dabego Genuai Bidiba homu kolesaga dąų olama, tama agai augwali tau somainao olama, tonaluali we bidi dabe da, augwali wiegi yai homu pemene mu yaibao.

Kraisgo Geme Dualali Sę Pedelabo Po Jonbolo Ola Mani 2:21

Eno homugo aga homu begelemainogo, tama eno aga osogo sula tagaliyu bidimainogo yai. Tiali goli menio. Aga te homu begelebo te homu esiąyu, te penani ebo kolesaga tagalama tudiba muabo te homu menio.

2 Pita 3:15

Tama Genuai Bidigo me tonaludu tama agai da dali dua ebao. Tama dagego te kolesaga ebode tama kone palao, te agai da ma sainogo ebao. Tama Godigo wiegi yai homu kolesaga te dago dwagi yai ama Polbolo menama, tama agai me te tobage po dagebolo asęna tolai dao.

2 Timoti 1:16

Ena te hasia polasa dwai sę yali bidi te ena digi bidali goli, Jisas Krais agai ena dali homu dene eyu tau selama, tama ena ma dobola sai. Magi basowe? Te ena subo piksa noma tiwai yali. Tama nosali te gasa dwai sę ebo we bidi augwaligo te Kraisgo te dwai sę ebo bidi polo elisąbo wiegi yai kolesaga hania konemainogo eyu, agai ena dali te kolesaga naga hasia yai dao. Tama augwaligo homu aga poba begi peyu, tama bidibo ula selama, bugagia sesemane sogo bidada peyu, bidada pomainogo yaibao.

Hibru 10:37

Magi baso meni. Godigo wali po te bukude asęani me e tiwai po elalubao: “Te sesabi me egobeo. Dwasianu sogo digi, tama te asobo bidi te aga sabolaibao. Te aga gesege elama me tonalugobeo.

Ma Dobola Sali 34:6

Tama aga te Moses pąba pelama ela soali, tama i weyu, te po wai, “Ena Genuai Bidi, ena Genuai Bidi dao. Ena God, tama ena te olo tau siyu mabo wiegi yai kolesaga badi, te homu dene ebo page bidi dao. Tama eno sębę polo me egobeo. Eno tigidali we bidi godolo mu elama, tama eno ena wali po tigidali wali pabo dao.

Polgo Po Pas Rom Dabeba Asęani 9:22

Te Godigo me te tiwai yai. Agai te aga sębę homu ebo te bidi dabebolo hania hanilabo homu yali, te tigidali bidigo agai bomo me konemainogo yai. Tama te dwai sę yali dene sabo we bidi augwali dolabo sę te sisi yai elalubo, tiali goli agai augwali gogolama polo elebeo, tama bobage sogo tonaluali.

Aisaia 46:13

Menio. Te pąba pedelalio. Te eno munu ma tonalugobeo. Te eno dage Israel dabeba boi bidi ebo bidi dabeba dene mu menama, te dage bugagia ma bidaibao. Te Jerusalem taun me wiegi yai bugagia ma ilaibao, te eno ena genuai nogi me bomo te dage Israel dabe tomode hania pepeli diliba pedalumainu yaibao,” wai dao.

Ma Dobola Sali 18:23

Te sę dabe eno nagebolo yao olama po wali, te Godigo digi te sę nago emainogo homu yai. Tama nago eno po wali peyu da, teda te sęgę nage tigi hagela iligobeo. Tama dagego te we bidigo yali sę, me te we bidigo po dodolama, tama augwali homu dua nagame elama, tama augwa buluba ma pelawaibao,” Moses aga wąįgo te po wai.

1 Pita 3:20

Tama polobadu mu te bage augwali e tǫde bidibadi augwaligo Godigo po odobo hagela yai dao. Tama te sogo polobadu mu te bidi nogi Noa aga e tǫde bidiyu, tama Noa agai te moni geba nigibadi te sogo Godigo te dwai sę yali we bidi dali sębę polo isiąbadi tonaluali. Tama te moni geba nigibo sę silama, tama te we bidi isilabo moni ąį asali sogo, te we bidi hauwa te geba tomoba pelama bugagia bidibeo. Woo, te we bidi a naga olama me nogo sela naga augwali te sipde bidibadi te ąįdu sela bilama tama bugagia bidaligo sana pali. Tama tebogo Godigo augwali te ąįgo tau siyu ma dobola sali.

Ma Dobola Sali 32:32

Tiali goli, megi eno nagebolo hanalu obao, te nago homugo augwaligo sęgę sela sąyąbo homu ebaso da, teda nago augwaligo sęgę sela sąyao. Ma, nago hagela homu ebaso da, teda eno nagebolo te po hanalu waibao, te nago naga we bidi augwali nogi asęai elalubo bukude te eno nogi asęai elalubo, te deli naga te sela sąyagameo.” Te po wai.

Ma Dobola Sali 33:11

Tama Genuai Bidigo Moses dali po miani, te bidigo aga abagi dali po mibo tiwai gilama yai. Augwa si te po ola silama, tama Moses aga te bidibo pesageba ma asiyu yai. Tiali goli, Mosesgo sę ebo ogwa bidi, te Josua, te Nungo ogwa, aga te tomode me bididuai. Agai te Sisinibo Ugwa Be munu me taga pisąwai dao.

Godigo Nogi Ugwaba Sabo Tęąbi Po Wabo Buku Dabe 77:8

Agai megi ena homu dene me ebewe? Te aga dąų wali po te tulalumainu eba, agawe?

Kolesaga Koneai Bidigo Pusali Po Elalubo Buku 8:11

Me sogo te bidi me deligo dwai sę elama, tama augwaligo agade po tų elama, te agaba mabo dene po dodolama elalubao. Tiali goli, augwaligo sesabi elama, te dene agaba mabeo, aga olo bidali. Tama tibaso, te tama tebo sęgo te we bidi dabe augwali homu hodolama, te augwaligo dwai kolesaga ebo bomo elama yaibao.

Esekiel 33:11

Te Israel dabebolo e tama po walao, ‘Ena God Genuai Bidi, ena tigidali sogo bidibo dao, tama mu tama dao, te dwai kolesaga ebo bidi dabe isibaso, eno tede wiegi yai homu pemene egobe dao. Menio. Eno te dwai kolesaga dabeba tudi ola menama bidibo bidi dabeba eno wiegi yai homu pemene ebo dao. Dage Israel dabego odao. Ma begasa asao. Dagego duga ebo dwai kolesagaba tudi ola menama, tama dage enaba ma asiąo. Magi baso dagego isabo sę idu gebawe?’ Nago augwalibolo te po wao,” wali.

Daniel 4:29

Te polua nogo si olama, sągągo si, te 12 polua silibo si da, tialima te me sogo deli sogo te king aga te be mabo nigalidu te Babilon bede te daide bidali.

Polgo Po Pas Rom Dabeba Asęani 13:11

Magi baso eno dagebolo te tiwai kolesaga yao po waliwe? Edao. Te megi da bidibo sogo te dagego koneanio. Megi dage te godege pila muani tagalama hodaloabo sogo dao. Magi baso meni. Polobadu da gesi konealubo po dąų wabo bidi pedalali, tama Godigo da ma dobola sainogo homu yali sogo te digibulu gana elalubadi yali, tiali goli megi e sogo te dwasianu pąba pedalalio.

Polgo Po Pas Rom Dabeba Asęani 13:12

Te be hulialuali silainogo elama, tama pąde be posainogo ebao. Tama tibaso, dago te be hulia saide bidibo we bidigo ebo dwai kolesaga ebo tagalao. Te ami bidi dabe augwaligo augwa pibo ugwa guda munama, tama te augwa tigi duala sabo hwįabo ugwa gudubo dao. Tama te tiwai gilama, dago te dwai bidi Satan aiyaba elaluabo wiegi yai kolesaga te dago ugwa gudubo gilama guda sao.

2 Pita 1:4

Tama tiyu, agai te polobadu wali maiabo genuai wiegi yai nai dabe dabolo olo mawai dao. Tama agai te nai dabe dabolo magi baso mawai dawe? Te dagego te mani nai dabe selama, tama dage te God konesiąbo we bidigo ebo dwai dwai sę yabo homu tagalama, tama te tobage we bidi dolobo sęde geda selama wi peyu, tama dagego te Godigo doloba pai wiegi yai homu kolesaga somainu, agai te polobadu mawaibao wali maiabo genuai wiegi yai nai dabe dabolo olo mawai dao.