2 Pita 1:1 - Godigo dwagi yai po buku

¹ Ena da Saimon Pita dao, te bidi Jisas Kraisgo sę ebo bidi dao, te ena agai tagala palai bidi me deli dao. Tama eno e pas asęna dagebolo tolobao. Te Jisas Krais aga te dago God dao, te aga da te da ma dobola siyu dwagi yai buluba muabo bidi dao. Tama aga doloba pai bidi mu bidiyu, tama da tigidali dali deli homu naga elama, tama agai te dagebolo te agaba duga homu tigidali muabo kolesaga mawai dao. Tama te dagebolo mani kolesaga te agai dabolo mani kolesaga tiwai si dao, te wiegi yai dila pai kolesaga mu dao.

2 Pita 1:1 Referans Kwoze

Taitus 2:13

Tama dago te ola mani po odolama, tama te tiwai kolesaga eyu bidibadi, tama dwagi yai homu eyu, te wiegi yai sogo asobo dago tonalubo dao. Tama te sogo asobo si, teda dago genuai God te da ma dobola sali bidi Jisas Krais agai bomo yai ula dali, genuai nogi dali, te hania ulaba pedalaibao.

Taitus 1:4

Taitus nage dali eno e po asęna tolobao. Te da dali, nage dali da tigidaligo God dali, Krais dali te konealubo po deli naga elalubaso, tama nage eno ogwa mu tiwai dao. Tama eno homugo dago Aya God dali, Krais Jisas dali augwali sigo nagebolo te olo tau sabo kolesagago dwagi yai sę eyu elama, tama nago homu nagamea peyu bugagia bidao.

2 Korin 4:13

Awe, te isabo sę enade hauwa sogo idubao. Tiali goli dago Godigo po pusubo sę tagalobeo. Magi baso meni. Polobadu te Godigo po bukude bidi me deligo te po wai, “Eno Godiba homu elalubaso, eno po hanilama pusai,” te po asęani. Tama dago me te tobage homu eyu, dago Kraisba homu elalubaso, tama dago te Godigo gesi wiegi yai po te we bidibolo me hanilama pusubo dao.

Dwagi Yai Gesi Po Jongo Asęani 12:26

Niwai bidi me deligo eno sę yainogo ebo bidi, te bidi aga ena wali asao. Tama ena bidibo bulu, te bulude naga eno sę ebo bidi ena dali bidaibao. Bidigo eno sę ebo bidi, te eno Ayago te genuai nogi mawaibao,” Jisasgo te po wai.

Polgo Po Pas Rom Dabeba Asęani 1:12

Te e tama tiwai dao: eno homugo dagego te Kraisde konealubo po dąų wabogo te ena tau siyu, te eno te Kraisde konealubo po dąų wabogo dage tau siyu emainogo eno te dageba pabo homu ebo dao. Tama te tiwai ebogo te da tigidaligo homu bomo ilimainogo homu ebo dao.

2 Pita 1:4

Tama tiyu, agai te polobadu wali maiabo genuai wiegi yai nai dabe dabolo olo mawai dao. Tama agai te nai dabe dabolo magi baso mawai dawe? Te dagego te mani nai dabe selama, tama dage te God konesiąbo we bidigo ebo dwai dwai sę yabo homu tagalama, tama te tobage we bidi dolobo sęde geda selama wi peyu, tama dagego te Godigo doloba pai wiegi yai homu kolesaga somainu, agai te polobadu mawaibao wali maiabo genuai wiegi yai nai dabe dabolo olo mawai dao.

1 Pita 1:1

Ena da Pita da, te Jisas Kraisgo tagala palai bidi me deli dao. Tama te dage haniani gasa tedali bulude bidibo we bidibolo eno e pas asęna tolobao. Dage meba te moni tǫ nogi Pontus tede bidibao, meba te moni tǫ Galesiade me, meba te moni tǫ Kapadosiade me bidibo, meba te moni tǫ Esiade me bidibao, meba te moni tǫ nogi Bitiniade me, dage te tǫde bidalubo, tede osogo bidibo we bidi tiwai bidibao.

Efesus 4:11

Tama aga digi agai naga agai te wiegi yai nai dabe bidi dabebolo e tiwai olo mawai: te agai meba bidi augwalibolo Godigo po sela pelama pusigi pabo sę yabo bidi nigilai. Bidi me badubolo agai wabo po ola mabo bidi te sęba muai. Bidi meba augwaligo Godigo wiegi yai po pusa mabo sę yabo bidi nigilai. Tama me badu bidibolo te Godigo we bidi hani tonalubo sę dali te Godigo po ola mabo sę dali emainu agai te sę augwalibolo mawai dao.

Polgo Po Pas Rom Dabeba Asęani 1:1

Ena Pol da, tama eno e po asęna tolobao. Ena te Krais Jisasgo sę bidi dao. God agai ena i olama tama te po sela pabo sę bidi nigilali. Eno te Godigo wiegi yai gesi po te we bidibolo pusumainu agai ena hagea selama tedali muai.

Dwagi Yai Gesi Po Lukgo Asęani 1:47

Tama eno nomago ena tau sabo Godibolo bugai homu mu ebao. Te ena agai sę ebo we da.

1 Pita 5:1

Tama tibaso, megi eno te dage Godigo hani we bidi tonalubo bidi dabe dali e homu kęna sabo po obao. Ena digi me ena da te Godigo hani we bidi tonalubo bidi dao, te dage tiwai. Tama eno gedugo Krais aga dene sabo suai bidi dao. Tama aga ma asiyu, tama aga bomo yai ula pedalobo si, te sogo ena te bomo yai ula meba sabo bidi me bidaibao.

Polgo Si Wali Pas Timotiba Asęani - 2TI 1:5

Eno te nago Kraisde konealubo po naga homugo dąų mu wali kolesagaba homu kone palama, te nago te tibo menio. Te tobage konealubo po tiwai hasia te naga auwa mosi Loisgo me, te naga ida Yunisgo konealubo po dąų wabo kolesaga me te tiwai elaluai. Tama eno mu koneani, homu si meni, te tiwai konealubo po te nagede me elalubo dao.

Filipai 3:9

Eno homugo ena aga dali wadoloyu tama homugo mu kęą paibao. Polobadu eno e homu eyu bidai dao: eno te Juda bagego bomo yai po dolo mu bugagia wali peyu da, teda Godigo gedude ena doloba pai bidi pedalaibao. Tiali goli megi eno te homu ebo menio. Eno Kraisde konealubo po dąų olama, tama Godigo ena doloba pai bidi nogi yai dao. God aga digi te Kraisde konealubo po dąų wabo bidibolo te doloba pai bidi nogi nogi ebo dao.

Godigo Sęba Tagala Palai Bidigo Po 15:14

Megi te Pita agai po dabolo pusali. Tama dago koneao, hasia sogo mu Godigo te agai hobede ebo homu te Juda hani isąwai we bidibolo me manio. Tama Godigo me badu aga hani mu nigimai hagede dąį ilai dao.

Matyu 10:2

Te 12 bidi nogi te e dao: hasia bidi aga nogi Saimon, te aga gasa nogi Pita, tama me aga ama nogi Andru dali. Tama Jems me aga ama Jon dali, augwali si te Sebedigo ogwa si dao.

1 Pita 2:7

Tama dage duga homu tigidali agaba muani bage, te dagego gedude te aga wiegi yai mu da. Tiali goli te agaba augwaligo homu musiąwai bage, augwalide te bukude asęani po tama dao, “Te be sę ebo bagego polobadu sela sąwani masigi, te masigi megi te bede te genuai nogi elalubo masigi pedalai dao,” te po asęani.

1 Pita 1:7

Tama te haniani dene mabo sę augwaligo page elalubao. Dage duga homu tigidali Godiba muani sę, te sę usu somainogo te dene mabo sę dageba pedalobo dao. Eno megi te wiegi yai kapa nogi gol te naide po digi po begelama obao. Augwaligo te kapa gol te tǫde diganama, tama te dwai nai sela sąwainogo augwaligo te gol siade ulubo dao. Siago uludama, tama nosali te wiegi yai kapa gol naga pedalama, augwaligo saibao. Tama te gol te osogo wiegi yai nai dao, te tǫde elalubo nai dao, tama nosali te nai mu dolaibao. Tiali goli dagego duga homu tigidali Godiba mubo sę te wiegi yai mu dao, tebogo te kapa gol aiyaba elalubo dao. Tialigo da, dagego konealubo po dąų wabo kolesaga usu selama, tama usu baso, te Jisas Krais aga ma asobo hanilabo sogode te Godigo dagego nogi ugwaba mu siyu, dagebolo dwagi yai genuai nogi mawaibao.

Taitus 1:1

Ena Pol dao, tama ena Godigo sę ebo bidi dao. Ena te Jisas Kraisgo po sela pabo sę ebo bidi ena dao. Agai ena dią selama tama tagala palama, tama eno te Godigo hagea sai we bidi augwaligo te agade konealubo po augwa homude eno bomo iligi pao ena dali te po wai, tama eno augwali tau siyu elama, tama augwaligo Godigo mu po selama, tama augwali aga tiwai bidimainogo agai ena te sę mani.

Filipai 1:29

Magi baso meni, dage, dagebolo Godigo dwagi yai sę olo elama, tama agai dage te Kraisgo sę ebo we bidi nigilai dao. Tama tiyu, agai dage tau selama, tama dagego Kraisde konealubo po homugo dąų wali. Te me elalubao, te agai dagebolo agai nogide dene sabo kolesaga me olo manio, te wiegi yai dao.

Efesus 4:5

Tama dago Genuai Bidi deli naga elalubao, tama Kraisde dago konealubo po deli naga elalubao, te baptais sabo kolesaga me te page deli digi naga elalubo dao.

Efesus 3:5

Tama te tigidali sogo polobadu Godigo te geme dualali po hania me haninai menio. Tiali goli megi Godigo Mobo Bidi agai te po page te God aga po wagi pabo bidi dabe dali, te Godigo po ola mabo bidi dali sibolo te geme dualaluali po haninama ola mawai.

Galesia 2:8

Tama God agai te Pitabolo aga bomo menama, tama Pitago te Juda bidi hanibolo Godigo po selama pusigi pali. Tama tiwai me te God agai digi enabolo aga bomo menama, tama eno te Juda hani isiąwai we bidibolo Godigo po sela pusigi palio.

2 Korin 5:21

Te bidi Krais agai dwai sę me isąwai, tiali goli da tobade Godigo dago dwai sę yali sęgę tigidali agaba sisinama, tama aga te dwai sęgę sai bidi tiwai mu pedalai. Agai tama tiali te da Kraisde wadolomainogo yali, tama agai bomogo da te Godigo gedude doloba pai we bidi pedalomainogo yai dao.

1 Korin 15:9

Magi baso meni. Ena da, ena te Godigo po sela pabo bidi dabe augwali tomode te dwasianu gagayali. Tama ena te bidi augwaligo te Godigo po sela pabo bidi nogi wabo usu me egi menio. Magi baso meni, polobadu eno te Godigo po odobo we bidi hani dolobo sę hauwa mu yai dao.

1 Korin 9:1

Te gasa we bidi me tau siyu tama augwali dolidali weyu, eno te gasa kolesaga me ebo dao. Ena olo mu bidibo dao, te gasa bidigo enabolo “E tiwai kolesaga yao” te po wabo usu egobeo. Tama me ena te Godigo po sela pabo sę bidi mu dao. Aga te gų pagede hodaluama tama nosali eno digi gedugo ena dago Genuai Bidi Jisas mu suai bidi dao. Te eno dago Genuai Bidi tobade sę yaligo tama te sęde naga dage te God wali pabo we bidi pedalali.

1 Korin 1:30

Tiali goli Godigo dage Krais Jisas dali wadolali, te agai tilama tama Kraisgo da wiegi yai homu kolesaga elalubo we bidi nigali. Te Kraisde God agai da agai wiegi yai we bidi hani mu ilali, tama dago dwai sęde sali sęgę sela sąnama tama da olo bugagia bidibao.

Polgo Po Pas Rom Dabeba Asęani 1:17

Odiąo. Te wiegi yai gesi pogo te Godigo te dwai sę yali we bidi te doloba pai we bidi ilabo sę page te dabolo hania ola mabo dao. Te sę page e dao: bidigo aga homu tigidali Kraisba munama tama agade naga tialuyu da, teda te Godigo gedude te bidi te doloba pai bidi pedalaibao. Gasa sę ebo te usu egobeo, te Kraisde tialubo kolesaga naga usu yaibao. Tama te doloba pai bidi ilabo sę page hania ilimainogo te Godigo po pusali profet bidi agai polobadu mu te Godigo wali po me deli tama asęai, “Te bidigo aga homu tigidali enaba muyu, te enade tialubo bidi, te bidi eno gedude doloba pai bidi pedalama, tama bugagia bidada peyu bidada paibao,” te po asęai.

Dwagi Yai Gesi Po Jongo Asęani 20:21

Tama Jisasgo augwalibolo te po ma wai, “Dage dwagi yai homu elama, bidao,” te po wai. “Tama Ayago ena tagala palobaso, ena asai dao. Tama tialigia, eno me dage tagala palobao,” Jisasgo te po aga wali bilali bidi dabe dali wai.

Dwagi Yai Gesi Po Jongo Asęani 1:42

Tama Andru agai aga ama Saimon odasa, Jisas bidibo madigi pai. Jisas agai Saimon sulama, te po wai, “Nage Saimon, Jongo ogwa dao. Nosali nago nogi Sifas waibao,” Jisasgo te po wai. (Dago te nogi Sifas begelama, tama wai, Pita wali nogi, te nogi page masigi dao.)

Dwagi Yai Gesi Po Lukgo Asęani 11:49

Tama tibaso, Godigo dwagi yai kolesagago te po polobadu wai dao, ‘Te eno po pusa maiabo profet bidi dabe me, te eno po pusigi pomainu tagala palobo te aposel bidi dabe me, te eno augwalibolo tagala palaibao. Tama telama, augwaligo te bidi dabe me badu elu, me badu olo sesanama, osogo elaibao,’ te po wai dao.

Matyu 4:18

Te me sogo Jisas te Galili sigi wę sesegedu pobadi, tama agai te augwali ama name si suali, te bidi me nogi Pita, me aga ama, Andru, augwali sigo te sųgų sabo wa te sigi węba sąbo sę yai. Te augwali sigo te sųgų selama mone sabo bisnis sę yai dao.

Jeremaia 33:16

Tama te sogo Juda dabe me Jerusalemde me sęgęmeni yaibao. Te augwali bugagia dugulalueibao. Tamaaugwa Jerusalem nogi te tiwai waibao, ‘Genuai Bidi agate dago doloba pai kolesaga page bidi dao.’

Aisaia 12:2

Mu tama, Godigo ena ma oda sai dao. Tama megi da, eno agaba homu dąų ola saibao. Tama ena wi me egobeo. God, Genuai Bidigo ena bomo ilibo dao, tama tibaso, eno balia po obao, te agai nogi ugwaba sainogo. Magi baso meni. Agai ena ma oda salio.”

Filipai 1:1

Ena da Pol dao. Tama ena dali Timoti da si Krais Jisasgo sę bidi, da sigo e po te dage Filipai hanude bidibo Godigo po odobo we bidibolo asęna tolobao. Dage Krais Jisas dali wadolama bidu, tama e pas dagebolo me, te dage tonalubo bidi dabebolo me, te tonalubo sę tau sabo bidi dabebolo me, te dage tigidali Godigo po odobo we bidibolo tolobao.

Jems 1:1

Ena Jems dao. Ena God dali, Genuai Bidi Jisas Krais dali sigo sę ebo bidi dao. Dage te Israel bidi hani nogo si olama, sągą badu si wali bidi hani bage, dagede eno homu kone paluyu, eno te pas asęna tolobao. Dagego duga page bulu tagalama, tedela pelama, gasa haniani buluba polobadu bidigi pai. Tama eno dage dali dwagi yai homu eyu, e pas toloyu, dage tao obao.

Jutgo Asęani Pas 1:1

Ena Jut da, ena te Jisas Krais agai sę ebo bidi da, tama ena Jems aga amanu dao. Tama eno e po dage Godigo i wali we bidibolo asęna tolobao. Tama God dago Aya agai dage dali dwagi yai homu eyu, tama godolo mu ebo dao. Tama Jisas Krais me agai dage palibo dao. Augwali sigo dage dali tama tiyu, tama dage bugagia bidibao.