2 Korin 7:4 - Godigo dwagi yai po buku

⁴ Eno dagede homu si ebo meni. Eno homu pemene wiegi yai dagebolo ebao. Te tigidali dabolo pedalobo sęgęde, te eno homugo dage koneama, tama tede ena homu dua nagame mu ilama bidibo, tama eno homu wiegi yai pemene mu elalubo dao.

2 Korin 7:4 Referans Kwoze

2 Korin 1:4

Te tigidali dene mabo sęgę daba pedalobo agai te dago homu nagame ilibo dao. Magi basowe? Agai da homu nagame ilibo kolesagago naga dago te haniani sęgę elalubo bidi dabe augwali homu nagame ilimainogo eyu, te Godigo da homu nagame bugagia ilibo dao.

2 Korin 3:12

Awe, te Godigo te we bidi doloba pai nogi nogi yabo po pusubo sę, te sęgo bomo yai ulago te Mosesgo mani bomo yai pogo ula aiyaba mu elalubo dao. Dago te sęde te homu eyu tama dwagi yai homu ebaso, da wi me egobeo. Menio. Bomo eyu dago po hanilama pusudubao.

Jems 1:2

Eno ama dedeo, haniani sęgę dagebolo pedalobaso da, teda dwagi yai homu yao.

Kolosi 1:24

Ena megi e kalabus bede bidiyu tama dene sobao. Tiali goli eno dage tau somainogo eyu, tama te dene sobaso, eno dwagi yai homu ebao. Magi baso menio. Da Godigo po odobo we bidi da, te Krais aga tigi tiwai bidibao. Tama aga tigi tobade te dene tolobo sę me elalubao. Tama eno tigide te dene me sobaso da, teda eno te agai aga tigi tau sabo dene meba toloyu, tama te dene silibo sę eno tama tau sabo dao.

Filipai 2:17

Dagego duga homugo Kraisde konealubo po dąų wabo kolesaga ebo, te kolesaga ebo te Godigo gedude te dagego agabolo te ofa nai mabo kolesaga ebo tiwai dao. Tama bidi dabe augwaligo ena ela mugowe, mugobewe, te eno konebeo. Tama augwaligo ena ela muyu da, teda eno kaneme dali te dagego ofa mabo nai dali te si dago agabolo mawaibao, te polobadu bidali bidi dabego te wain ąį te ofa nai daiba gelali tiwai yaibao. Awe, tama tiyu da, teda usu da, eno tede dwagi yai homu pemene ebao, tama dage dali hodobo eno dwagi yai homu ebao.

1 Korin 1:4

Eno gedu haluasa po weyu, tama tigidali sogo eno te ena Godibolo dagede puba hwi po wabo dao. Magi baso meni, dage Krais Jisas dali wadolobaso Godigo dage olo tau siduai dao.

1 Tesalonaika 2:19

Tama nosali dago Genuai Bidi Jisas e tǫba ma asobo sogo te da tǫde we bidi aga gesabidide da dolaluaibao. Tama aga asobo sogo da dwagi yai homu eyu tonalubo dao. Tama aga asobo sogo dago te dwagi yai nai dali te dwagi yai au yabo nai dali te si waibao. Dago dwagi yai nai dali au yabo nai dali te si de dawe? Te dage tama dao.

Filipai 1:20

Tama eno dwagi yai homu elama, tama eno te kolesaga mu pedalaibao olama tonaluyu, tama me eno te kolesaga pedalomainao homu mu ebao, te kolesaga e dao: eno homugo te Godigo ena mani sęde ena munu me tulalugobeo. Menio. Eno homugo te tigidali sogo, te megi tama me, te ena bomo selama wi esiąyu, tama eno tigigo me eno homu kolesagago me te eno te Krais te we bidibolo ola mayu, tama augwaligo agai nogi ugwaba saibao. Tama homu eyu, te ena me bidibogo ma ena isibogo, tebogo agai nogi ugwaba somainao.

2 Korin 11:21

Mu tama, augwaligo te tebo kolesagade dago te sę yabo bomo me elalubeo! Tama eno te kolesaga igi sogo da, teda eno sęgę siyu tama hale egi da. Megi eno po te aga digi nogi ugwaba sabo po wabo kolesaga meni yai bidigo po tiwai obao, te bidi mebago augwa ebo kolesaga po te bomo elama pusubaso da, teda eno me eno bomo elama tama augwali aiyaba elaluabo po pusaibao.

2 Korin 8:24

Teda dagego duga dwagi yai homu eyu godolo mu ebo kolesaga te bidi dabe augwalibolo ola maiąo. Tama te Godigo po odobo we bidi dabe augwaligo dagego te kolesaga ebo mu konemainogo elama, tama dagego sęde dago dagede wiegi yai homu pemene ebo page me augwaligo konemainogo tiao.

2 Korin 2:14

Tiali goli te Masedonia tǫde eno Taitus sulama, tama agai dagede dwagi yai po olama, megi eno usu da weyu Godibolo po odu gebao. Sesemane sogo agai da tau selama, tama dago Kraisgo bomode te wąbi hwįani usu yai. Tama dago sę ebode te Godigo po pusali, tama te bidi dabe augwaligo Krais konea sabo dao. Te koneani kolesaga te pusu ebo nai tiwai denami te tigidali habuba pabo tiwai ebao.

Polgo Po Pas Rom Dabeba Asęani 5:3

Tama dago tede naga wiegi yai homu pemene me egobeo. Menio. Te sęgę dali, dene dali daba pedalubode me te dago wiegi yai homu pemene ebo dao. Dago koneani, dago te sęgę toloyu tama tebogo da homu bomo ilibo dao, tama dago te sęgę bugagia tolaluyu bidibo dao.

Godigo Sęba Tagala Palai Bidigo Po 5:41

Tega sigo te kaunsil be tagalama pali. Tama te kaunsil bagego elali goli, mu ma bugai homu yali. Tama augwaligo te homu yali, ‘Da Jisasgo po wali pobaso, Godigo usu da olama, da te bidigo gedude naga moni hale mu selama, Jisasgo sę tau sali,’ te homu yai.

2 Korin 7:14

Polobadu eno dage nogi te Taitus gesabidide ugwaba sali, tama megi eno te pode ena hale me sabeo. Menio. Tigidali po dago dagede wabo po, te mu po naga wai dao. Tama tiwai naga eyu, dago dage nogi te Taitus gesabidide ugwaba sali, tama te eno dagede agabolo pusali po me hanilama pedalali, te mu po naga dao.

2 Korin 10:8

Magi baso meni. Dago Genuai Bidigo dabolo te sę emainogo te genuai nogi dabolo mani, te dago dagego Kraisde homu tialubo kolesaga ebode dąų walomainogo yali. Te dage dolomainogo eyu agai te bomo dabolo mabeo. Tama eno dena te sęde dena nogi ugwaba mu sali goli, tede ena hale me sogobeo, te dolo dao, dago dena sę bugagia yaibao.

Filipai 1:14

Tama ena e kalabus bede bidibaso, dago ama dede meba hauwa augwaligo bomo te dago Genuai Bidide selama, tama wi ebo kolesaga tagaliyu bomo elama, te Godigo po pusubo sę megi bugagia ebao.

Filipai 1:26

Tama tibaso, ena dage dali ma bidibo si, te dage Krais Jisas dali wadolobaso tama eno yali sęde dagego te dwagi yai homu pemene ebo page hauwa elaluaibao.

2 Tesalonaika 1:4

Tama tibaso, dago Godide dwagi yai homu ebo dao. Dagego te dwagi yai kolesaga ebo po dago odobaso, tama da gasa buluba biligi peyu, tama dago digi dagego ebo dwagi yai kolesaga te Godigo po wali pabo we bidi augwalibolo pusuyu, dago dagego nogi ugwaba sabo dao. Gasa bidi augwaligo dage dali dwai kolesaga eyu, tama augwaligo dage eleyu, tama dagebolo sęgę mabo dao, te po dago gasa we bidibolo pusubo dao. Tama dago te po wabo dao, ‘Te Tesalonaika we bidi augwaligo tigide sęgę siyu dene sobadi digi, tama augwaligo bomo elama dolaluyu, konealubo po dąų wabo dao,’ dago te po gasa we bidi dali weyu, dago dagego nogi ugwaba sabo dao.

Filemon 1:7

Eno dwagi yai ama, Godigo we bidi tigidali nago augwali dali dwagi yai homu eyu, godolo mu ebo dao. Tama tiyu, nago te kolesaga eyu, augwaligo homu pua peyu, dwagi yai ilai. Tama te kolesaga ebode ena dwagi yai homu elama, tama eno moni homu me esiąyu, te eno homu dwagi yai elama bidibao.