Te Israel me Juda Hani Sigo Tuni Bidigo Po Elalubo Buku Si 1:15 - Godigo dwagi yai po buku

¹⁵ Keptengo po ola silali, tialima te Genuai Bidigo ensel bidigo te Elaijabolo e tiwai po tama ola mawai, “Nage dulama, te kepten bidi dali pao,” wali. “Nage aga sulama, wi egio.” Awe, Elaija hodaluama, tama aga kepten bidi dali te king pageba pai.

Te Israel me Juda Hani Sigo Tuni Bidigo Po Elalubo Buku Si 1:15 Referans Kwoze

Aisaia 51:12

Genuai Bidigo aga we bidiba te tiwai po wali, “Ena digi eno dagego haliga dąų walama, te dagego tigidali sęgę sia somainu ilibo dao. Tama magi baso dage te gasa bidi dabede wi ebo dawe? Augwa bomo me elalubeo. Tigidali bidi isama, te nosai polo sia sabo tiwai gilama ebo dao.

Esekiel 2:6

“Tialima nage, te tǫde bidi, nage augwalide wi elama, te augwaligo nageba wabo pode nage wi me igio. Te augwaligo nago po aiyaba elaluama, nage begela dolaibao. Te nage augwali tomode bidiyu, te tiwai dwai haliga yaibao, nage te dwai sesane elalubo bono sili tomode bidibo tiwai yaibao. Ma, nage te dwai marasin elalubo hwą dabe tomode bidibo tiwai elalueibao. Tiali digi tagalao, nage augwalide wi eyu, te augwaligo pode me wi igio. Menio.

Jeremaia 1:17

Tiali goli, nage da, nage sisi elama, hogodama pao. Te tigidali po eno nageba mani, te nago augwaliba pusao. Nage wi me isiąma, augwalide habu bulu me kila sigio. Nage tama tiyu da, teda te ena digi eno nage wi iliyu, te augwali gedude habu bulu kila somainu yaibao.

Matyu 10:28

Dagego tigi naga ela mubo bidi dabe te dage wi egio. Augwaligo dagego po wabo mobo noma bidi te dali me ela mugobeo. Menio. Te Godigo dagego tigi me noma bidi dali te genuai dene sabo te siade mu dolobo bomo elalubaso, te dage agade naga wi yao.

Jeremaia 15:20

Te eno nage te bomai obo brasgo nigai dolalubo tiwai eyu, te we bidi dabego gedude tama tiaibao. Te augwaligo nage dali boi bidi yaibao, tiali goli te augwaligo nage aiyaba me elalugobeo. Magi baso meni, ena digi ena nage dali bidaibao. Te eno nage tau selama, eno nage ma saibao. Te ena Genuai Bidi, eno po dao.

Godigo Nogi Ugwaba Sabo Tęąbi Po Wabo Buku Dabe 27:1

Genuai Bidi God aga te eno ula page da, tama agai ena tau sabo da. Tama tiyu, te bidi me delide ena midigi me egobeo. Genuai Bidigo naga ena seselalubao, te moni bomai obo tiwai te palialubao. Tama tiyu, te magi nai me delide ena wi me egobeo.

Te Israel me Juda Hani Sigo Tuni Bidigo Po Elalubo Buku Si 1:3

Tiali goli, te Genuai Bidigo po sela pabo ensel bidigo te profet bidi Elaija te Tisbe taun hanude bidibadi e tiwai po wali, “Tama nage pelama, te Samaria king bidigo te taun Ekronba tagala palali bidi dabe nago augwali tiąba pelama, tama nago augwalibolo e tiwai po tama wao, ‘Magi baso te dagego homugo Ekron augwaligo tibo god Balsebup hanalugi sobawe?’ wao,” wali. “‘Tialima, Israel bidi dabeo, dage dali God bidibewe?’ wao,” wali, “‘tibaso dage sobawe?’ wao,” wali.

Te Israel me Juda Hani Sigo Tuni Bidigo Po Elalubo Buku Deli 18:15

Tialima, Elaijago agabolo te tiwai po wai, “Nage wi elamuo. Ena te Tigidali Bomo Elalubo Genuai Bidigo sę bidi dao, te Sesemane Sogo Bidibo God dao. Te eno agai nogide po weyu, mu po tama obao, Ahapgo ena megi e side tama sueibao,” wali.

Tigidali Nai Gagalama Nigali Side 15:1

Nosali Abramgo na tiwai ebaso, tama Yawego agabolo te tiwai po wai, “Abram, nage wi munu me elamuo,” wali. “Eno nage te auwago bugagia mu seselalubo tiwai gilama ebao. Eno nage dali dwagi yai sę eyu, tama nage te genuai nogi elalubo bidi pedalumainu iliyu yaibao,” te po wai.

Hibru 11:27

Te bidi Mosesgo konealubo po Godiba dąų olama tama agade tią piduali baso, agai te tuni bidigo sębę homu ebode te aga wi me ebeo. Meni. Aga hogodolama tama Isip tǫ taga soali. Te e tǫde bidigo God gedugo me susiąbo digi, tiali goli Mosesgo te God subo tiwai yali, tama tiyu aga bomo elama geasa ma pabeo.

Te Israel me Juda Hani Sigo Tuni Bidigo Po Elalubo Buku Si 1:14

“Eno koneanio, te dagalude elalubo isi tulaluama, te kepten si dali, te bidi sese a naga, 100 ami bidi dali, te augwali isigo dai dao.” Keptengo bomai po weyu, te po wai, “Eno homugo nago ena dali, te eno 50 ami bidi dali homu dene eyu, tama da doligio,” wali.