1 Samuel 20:32 - Godigo dwagi yai po buku

³² Tama Jonatango Solgo po wei ponoyu, te tiwai po wai, “Magi baso aga isimainu obawe? Agai magi dwai sę yaliwe?”

1 Samuel 20:32 Referans Kwoze

Matyu 27:23

Tama Pailatgo te po wali, “Magi basowe? Agai magi dwai sę yaliwe?” Tiali goli augwaligo bomonama ma i wali, “Ni pedaide aga elao,” wali.

1 Samuel 19:5

Te agai Goliat elali sogo, te aga isabo me, te aga bugagia bidabo, te me agai tǫba eyu godolo me ebeo. Tama tialima, te Devitgo nogode, Genuai Bidigo da Israel tau sabo te geninama mu elalu, tama te boi bidi aiyaba mu elalualio. Tama naga digi sulama, tama nage wiegi yai homu pemene mu yai. Agai te dwai sę me eyu, tama magi nai me delide dwai sę yali me elalubeo. Tama tialima, magi baso nago aga olo dali ela muainu ebawe? Te nago tama tiyu da, teda nago dwai sę yali elalueibao,” te po wali.

Dwagi Yai Gesi Po Lukgo Asęani 23:22

Tama Pailatgo sela sogo te we bidibolo wai, “Magi basowe? Te e bidi Jisasgo mena dwai sę yaliwe? Eno agai dwai sę yali me subeo. Tama tibaso, dena Rom dabego bomo yai pode, e bidi dago elegobeo. Tama aga eno bįgo naga elama, olo tagala palaibao,” Pailatgo te po wai, te we bidi dali.

Tigidali Nai Gagalama Nigali Side 31:36

Tialima, Jekop te sębę elama, tama Laban dali te tiwai wado po wai, “Eno mena dwai sę, me eno mena bomo yai po bolai baso, tama nago bomonama, tama ena te tiwai megi pobeasa asaliwe?

Dwagi Yai Gesi Po Jongo Asęani 7:51

“Dago bomo yai po e tiwai dao, te olo bidi me po tų odosiąbadi, dago te bidibolo sęgę magobeo. Aga yali sę po dago odama, te aga dwai sę ebaso, teda dago aga po tų elama, sęgę mawaibao,” Nikodemusgo te po wai.

Jeremaia 17:9

Genuai Bidigo te tama po wali, “Tigidali bidigo haligade tibo kolesaga sesemane yabo homu kone kone iduaibao. Bidigo homude dwai mu elalubo dao. Tama dego te page mu konegowe?

Kolesaga Koneai Bidigo Pusali Po Elalubo Buku 9:3

Deli tigi poai sę da tǫde bidi tigidaliba pedelaibao, tama te sę dolo me elalubeo. Te we bidi augwali tǫde bidibo sogo, dwai sę ebo kolesaga dali, te wabo pabo bidigo kolesaga tiwai dali, te augwaligo haligade pągąnalubao. Tama nosali, augwali isiyu, tama te polobadu isali bagego hani tomoba pabo dao.

Kolesaga Koneai Bidigo Pusali Po Elalubo Buku 7:9

Nago gasa bidi dali haliga sębę polo mu igio, magi baso meni, haliga sębę polo ebo te wiegi yai homu kolesaga elalusiąbo bidi dabego homu kolesaga dao.

Bugagia Bidibo Kolesagade Po Asęai Buku 22:24

Nago te wado po polo wabo bidi dabe dali, me te sębę polo ebo bidi dabe dali abagi me wagio.

1 Samuel 20:7

Nago te kingba po walama, tama agai te po weyu, ‘Wiegi yai da,’ obaso da, teda nago koneani, te ena bugagia bidimainu ebao. Tiali goli, te aga haliga sębę ebaso da, teda nago koneao, te agai enade dwai sę yabo homu eyu tebao.

1 Samuel 18:11

tama te tiwai homu yali, ‘Megi da, te eno Devit te sesemone enego enama, tama aga ela muaibao,’ homu yai. Tialima, agai te sesemone ene te Devitba sąnama enani, tiali goli Devitgo te sesemone ene geda munama, ela soali. Tama Solgo te tiwai si sogo yali.

1 Samuel 19:4

Tialima, kigamu Jonatan de Sol si peyu, tama po miani, tama Jonatango te Devit nogi ugwaba siyu tama Solbolo te tiwai po wai, “Ayao, te eno magi nai po me deli nageba wabo usu egowe? Te e tiwai dao. Nago dwai kolesaga te naga sę bidi Devitba munu me elamuo. Magi baso meni, te agai dwai sę me deli nage dali me ebeo, menio. Te tigidali sę agai yali, te nage tau siyu naga yali.

1 Samuel 22:14

Tama Ahimelekgo po wei ponoyu, te tama po wali, “Mu menio. Devit te wiegi yai ofisa mu tama nage wali mu peyu yali. Te mena ofisa me deligo aga aiyaba elalubeo. Tama aga te nago wąį da, tama nage pąde te nage bugagia tonalu ebo ami bidi hani me deli dao. Tama nago bede bidibo bidi tigidali, augwaligo te agai wiegi yai kolesaga homu kone palama, tama genuai nogi agaba mabo dao.

1 Samuel 20:1

Sol te bulu Naiotba sabalubo si, te Devitgo te bulu taga soyu, tama Jonatan bidibo madi wi ma soali. Tama agai Jonatanbolo te tiwai po wali, “Ei, Jonatan! Magi baso nago ayago ena ela muainu ebawe? Eno magi dwai sę me deli isiąyu, ma dwai kolesaga me deli agaba me ebeo. Mu tama, eno magi dwai sę me deli me ebeo,” wali.