1 Pita 4:13 - Godigo dwagi yai po buku

¹³ Dagego te Krais aga dene sali tiwai te dagede me te dene tolobo sę meba megi tama siyu ebaso, tama dage dwagi yai homu yao. Tama nosali aga ma asobo si, aga bomo yai ula te sogo hanilibo si, te dagego aga dene meba ede sobaso tama dage te sogo me te didibili eyu moni dwagi yai homu yaibao.

1 Pita 4:13 Referans Kwoze

Polgo Po Pas Rom Dabeba Asęani 8:17

Tama da te Godigo wai dabe bidaligo da, teda nosali dago te Ayago nai me saibao. Awe, te dago Godigo nai saibao, te nai me dago Krais dali saibao. Te megi dago Godigo sę eyu tama Krais dali dago te dene tolobaso da, teda dago aga dali te genuai nogi me te ula yai bomo me, te me dago aga dali nosali saibao.

Polgo Po Pas Rom Dabeba Asęani 5:3

Tama dago tede naga wiegi yai homu pemene me egobeo. Menio. Te sęgę dali, dene dali daba pedalubode me te dago wiegi yai homu pemene ebo dao. Dago koneani, dago te sęgę toloyu tama tebogo da homu bomo ilibo dao, tama dago te sęgę bugagia tolaluyu bidibo dao.

Filipai 3:10

Tama bomo elama, eno deli homu naga ebo dao: ena Krais dali wadoloyu, tama eno aga kuna koneaio. Aga isąma ma hodaluama tama bomo elalubao. Eno homugo eno te bomo mu koneaio. Eno aga dali abagi mu olama, tama aga dene sali tiwai eno dene sobaso te usu dao, eno te dene saio. Tama tiyu, aga isali tiwai ena isaio.

2 Korin 1:7

Tama homu si isąyu, dago homugo koneani, te dage bomo elama dolalueibao. Dago koneai, dage da dali dene tolobao, tama tibaso te dage da dali te homu nagame ebo kolesaga me selama bidaibao.

1 Pita 5:10

Tama dagego te sęgę osogo tolama, tama God aga digi agai dage sese bugagia ma ilama, tama dage bomo menama, bugagia mu dąų waibao. Te God aga da te tigidali wiegi yai olo tau sabo kolesaga page bidi dao, tama agai dage i wali, te dage Krais wali peyu, te Godigo bomo yai gamonabo ula meba dagego somainogo yali.

2 Korin 4:10

Polobadu te gasa bidi dabe augwaligo Jisas aiyaba elalubo homu eyu, tama agabolo dene menama tama aga isali. Tama te tiwai me te boi bidi dabe augwaligo dabolo sęgę megi mayu, tama dene me mayu, tama da hauwa sogo pąde isali, te Jisas tobade. Tialima dago Jisasgo bomo selama tama aga sę eyu, te gasa bage augwaligo te suyu konebo dao, te gų pagede ma hodolali bidi Jisasgo da isabo tigide bidibo bage tau siyu, tama dago agai sę tama ebo dao. Augwaligo da dali tama homu ebo dao.

Polgo Si Wali Pas Timotiba Asęani - 2TI 2:12

Te da tigidali sęgę tolobode bomo elama dolaluali da, teda da aga dali tuni bidi me bidaibao. Te dago aga tudiba mubaso da, teda agai me da tudiba muaibao.

2 Korin 4:17

Te e tiwai: te da Godigo po pusubo bidi dabe, te dabolo pedalubo sęgę te dwasianu dao, tama te pęwadage sogo naga osogo elaluaibao. Tama da e tǫde bidibadi te sęgę tolobaso, nosali dagalude dago te sesemane sogo bugagia bidada peyu, bidada pabo wiegi yai nai mu saibao. Tama te dagalude bugagia bidabo te wiegi yai sęgo te dago megi elalubo dwasianu sęgę aiyaba mu elaluaibao, te wiegi yai mu naga yaibao.

Godigo Sęba Tagala Palai Bidigo Po 5:41

Tega sigo te kaunsil be tagalama pali. Tama te kaunsil bagego elali goli, mu ma bugai homu yali. Tama augwaligo te homu yali, ‘Da Jisasgo po wali pobaso, Godigo usu da olama, da te bidigo gedude naga moni hale mu selama, Jisasgo sę tau sali,’ te homu yai.

Kraisgo Geme Dualali Sę Pedelabo Po Jonbolo Ola Mani 1:9

Ena Jon, ena duga ama dao. Ena dage dali hodobo te Jisasde wadolama, tama da deli hani elalubaso, tama gasa bage augwaligo dabolo dene dali, sęgę dali mayu elama, tama da tigidali hodobo bomo elama dolaluyu, sęgę bugagia tolobo dao. Tama ena Godigo we bidi tonalubo sę tomode dage dali hodobo bidibao. Tama eno te we bidi dabebolo Godigo po dali, te Jisasgo hania hanilali mu po dali, te po si augwalibolo pusubaso augwaligo ena sela sąnama, ena te tamu ąį tomode elalubo dwasianu tǫ nogi Patmos teba kalabus mugi pali dao.

1 Pita 5:1

Tama tibaso, megi eno te dage Godigo hani we bidi tonalubo bidi dabe dali e homu kęna sabo po obao. Ena digi me ena da te Godigo hani we bidi tonalubo bidi dao, te dage tiwai. Tama eno gedugo Krais aga dene sabo suai bidi dao. Tama aga ma asiyu, tama aga bomo yai ula pedalobo si, te sogo ena te bomo yai ula meba sabo bidi me bidaibao.

Kolosi 1:24

Ena megi e kalabus bede bidiyu tama dene sobao. Tiali goli eno dage tau somainogo eyu, tama te dene sobaso, eno dwagi yai homu ebao. Magi baso menio. Da Godigo po odobo we bidi da, te Krais aga tigi tiwai bidibao. Tama aga tigi tobade te dene tolobo sę me elalubao. Tama eno tigide te dene me sobaso da, teda eno te agai aga tigi tau sabo dene meba toloyu, tama te dene silibo sę eno tama tau sabo dao.

Matyu 16:27

Magi baso meni. Nosali Godigo Bidi Mu te aga Ayago genuai bomo me, ula me dali, te ensel mobo bidi dabe dali hodobo si asaibao. Te sogo te agai tigidali we bidigo yali kolesaga usu nama wei ponaibao.

Matyu 5:12

Tama dage homu bugagia wiegi yai elama, pemene mu eyu bidiąo. Te genuai wiegi yai nai mugo dage dagalude tonalubao. Te tiwai naga te bidi dabe augwaligo te Godigo po pusali profet bidi dabebolo hasia polobadu dene mawai tiwai dagebolo me tama tibao.”

Aisaia 35:10

Te Genuai Bidigo ma dobola sali we bidi dabe, te augwali wiegi yai pemene dali te Jerusalemba ma asaibao. Te augwa genuai po dagą weyu, balia weyu, te sunumidu aselawaibao. Te augwa wiegi yai bugagia mu dugulalu, te augwa pemene umabo mu yaibao. Augwa te wiegi yai pemene ebo munu me sia sogobeo. Te dene, me haliga sęgę, te augwalide munu ma me elalugobeo.

1 Pita 1:13

Te God agai dage dali te sę yaligo da, te bidi me sę yai hagede aga ugwa sugwa sabo tiwai, dagego duga homu bugagia dodola selama dąų wao. Tama dage deli deli duga digi bugagia tonaluao, te homu kęnai we bidi bidao. Tama te Jisas Krais aga asobo hanilabo sogo agai dagebolo te wiegi yai olo tau sabo sę mawaibao. Dagego tede duga homu bugagia dąų olama, dwagi yai homu eyu tonaluao.

Godigo Sęba Tagala Palai Bidigo Po 16:25

Te huli tomode mu Pol dali Sailas dali sigo Godibolo po weyu, aga nogi ugwaba sabo balia dabe weyu bidali. Tama te kalabus bede bidali bidi dabe me badu augwaligo te balia po wabo odali.

Matyu 25:34

Tama te tuni bidigo aga dolo nogo badu bidibo bidi dabebolo po weyu, te po waibao, ‘Dage da, te eno Ayago dage dali wiegi yai sę mu yai dao. Polobadu mu agai te tǫ nigali sogode agai we bidi tonalubo kolesaga sisi ilama, tama tede dage bidabo madi sisi ilali elalubo. Dage aselama, te bulu tomoba dage asiąo.

Matyu 25:31

Te po ma weyu, Jisasgo te po wai, “Nosali te Godigo Bidi Mu te tuni bidi ma asobode, tama tigidali ensel mobo bidi aga dali, te sogo aga te tuni bidigo wiegi yai sia saide dualagasaibao.

Matyu 25:23

Aga genuai bidigo agabolo te po wali, ‘Nage wiegi yai sę bidi dao, nago enade homu kęą pai bidi dao, nago wiegi yai sę mu yai. Nago dwasianu nai bugagia tonalualigo da, tama eno homugo nage te nai hauwa tonalubo bidi nigilaibao. Nago wiegi yai homu pemene ena dali yagasao,’ te po wai.”

Matyu 25:21

Aga genuai bidigo agabolo te po wai, ‘Nage wiegi yai sę bidi dao, nago enade homu kęą pai bidi dao, nago wiegi yai sę mu yai. Nago dwasianu nai bugagia tonalualigo da, tama eno homugo nage te nai hauwa tonalubo bidi nigilaibao. Nago wiegi yai homu pemene ena dali yagasao,’ wai.

Aisaia 51:11

Te naga ma sali hani dabe tau sali, te augwa wiegi yai pemene elama, te Jerusalemba ma aselama, te augwa balia po weyu, genuai po dagą te sunumidu ola asaibao. Te augwa bugagia mu bidiyu, te augwa pemene umabo mu yaibao, augwa te pemene ebo me sia sogobeo. Te dene me haliga sęgę augwali dali me elalugobeo.

Aisaia 25:9

Te sę dabe pedalobo sogo, te we bidi dabego te e tama po waibao, “Mu tama dao, Genuai Bidi dago God dao. Dago homu agade dąų olama, tonaluai dao. Tama agai da ma oda sai dao. Aga deli naga Genuai Bidi dao. Tama agai da tau sai dao. Tama tibaso, da wiegi yai homu penene genina mu inao. Magi baso meni. Agai da polo ma oda sai dao,” te po waibao.

Kraisgo Geme Dualali Sę Pedelabo Po Jonbolo Ola Mani 1:7

Suao, Krais aga te dagalu pǫ me tomodu tiąba asaibao, tama tigidali bidi augwa digi gedugo aga te pǫ tomodu tiąba asobo sueibao. Tama te aga tigide enani bidi dabe augwaligo me sueibao. Tama tigidali tǫde we bidi augwaligo aga asobode homu eyu, tama agai augwalibolo dene wei ponaibao homu elama, tama augwali homu sęgę eyu gela waibao. Awe, te tama tiaibao. Mu tama dao.

Dwagi Yai Gesi Po Lukgo Asęani 17:30

Te tiwai pedelaibao, nosali, ena e tǫba ma asobo sogode.

Dwagi Yai Gesi Po Makgo Asęani 8:38

Tama te megi e sogo tǫde bidibo we bidi dabe augwali da, te aga bidi taga soayu penani ebo we tiwai da, augwaligo Godigo po taga soali, tama haniani dwai sę ebo dao. Te bidi augwali bidalubo tomode bidiyu, tama agai enade me te eno ola mabo pode me hale eyu ebaso da, teda nosali ena te Godigo Bidi Mu, ena me te bidide hale eyu aga nogi geme dualaluaibao, te eno ena Ayago genuai bomo yai ula dali, te wiegi yai tedali ensel mobo bidi dabe dali e tǫba ma asobo sogo tama tiaibao,” Jisasgo te po wai.

Polgo Po Pas Rom Dabeba Asęani 8:18

Te da e tǫde bidibadi te da God wali pabo we bidi dali dwai homu ebo bagego dabolo dene dali sęgę dali mabo dao. Tiali goli eno te Godigo dabolo nosali maiabo ula yai bomo dali, haniani wiegi yai nai dali, te naide eno homugo kone palobo si, te eno e po wabo dao, “E, te eno megi tolobo sęgę te genuai menio, te dwasianunu naga dao, te olo nai tiwai dao,” eno te homu ebo dao.

2 Korin 1:5

Magi baso meni, te Kraisgo tolali genuai dene, te dago me te tiwai naga tolobao. Tama tiali goli, te sogo me te Kraisgo genuai homu nagamego da pągąnai dao, te nagame ilibo kolesaga te dene tiwai si pedalobo dao.

1 Pita 2:21

Tama dagego te sęgę bugagia tolomainogo, God agai dage i wali. Magi baso meni. Krais aga digi dage tobade dene sai. Tama aga tama tiyu, dagebolo te sę page agai bugagia hanilama ola mawai, dage aga tiwai gilama, bugagia pąde wali asomainogo yai.

Jutgo Asęani Pas 1:24

Te God agai bomo elalubaso, agai dage bugagia tonaluyu, dage me tulalugobeo. Tama agai dage tau siyu, tama dage dwai sę me isiąwai, dwagi yai homu pemene mu eyu, tama agai dage aga moni ula elaluyu gegemani ebo madigi teba sela pabo usu yaibao.