1 Pita 2:8 - Godigo dwagi yai po buku

⁸ Tama te bukude asęani po me dao, “E masigi da, te we bidi augwali sągą dani tųąbo masigi dao, te augwali te tǫba tula muabo genuai masigi dao.” Tama augwaligo Godigo poba augwa homu tigidali musiąbaso, tama augwali tulalubo dao. Te God agai polobadu augwali te sęba muani.

1 Pita 2:8 Referans Kwoze

Aisaia 8:14

Ena te we bidigo geme duala sabo bomai pesage dao. Tiali goli, ena te Israel de Juda sigo we bidigo sunumide masigi tiwai bidibao. Tama augwali te masigide sągą dani tuą palama, tama tulaluama, tama augwali dolaibao. Tama te Jerusalem we bidide da, te ena te kę tiwai, augwali tola sabo bidibao. Tama augwali hauwa te kęde tola saibao,” wali.

1 Pita 2:7

Tama dage duga homu tigidali agaba muani bage, te dagego gedude te aga wiegi yai mu da. Tiali goli te agaba augwaligo homu musiąwai bage, augwalide te bukude asęani po tama dao, “Te be sę ebo bagego polobadu sela sąwani masigi, te masigi megi te bede te genuai nogi elalubo masigi pedalai dao,” te po asęani.

Polgo Po Pas Rom Dabeba Asęani 9:22

Te Godigo me te tiwai yai. Agai te aga sębę homu ebo te bidi dabebolo hania hanilabo homu yali, te tigidali bidigo agai bomo me konemainogo yai. Tama te dwai sę yali dene sabo we bidi augwali dolabo sę te sisi yai elalubo, tiali goli agai augwali gogolama polo elebeo, tama bobage sogo tonaluali.

2 Pita 2:3

Tama te tibo po ola mabo bage augwaligo te gasa we bidi dabego nai sulama pesą elama mu sainogo ebo bidi dabe, tama augwaligo te dagego mone dabe bomonama sainogo tibo po hauwa dage dali waibao. Tiali goli polobadu mu Godigo augwali po tų ilama hagayabo te sisi yai elalubao. Tama augwali mu dolabo nai te sesemane sogo tonalubao.

1 Tesalonaika 5:9

Magi baso menio. God agai da bodolu mani te dago agai homu sębę ebo dago somainogo ebo menio. Woo, agai da sa muyu, te homu yai, augwaligo Genuai Bidi Jisas Krais agai augwali tobade isilama, tama augwali ma saibao, God agai te homu elama, da sa muani. Tama Genuai Bidi aga ma asobo sogo da bidiyu da, ma da isali da, te sogo da aga dali hodobo bidada peyu, mu bidada pomainogo, Godigo da sa muani.

Dwagi Yai Gesi Po Lukgo Asęani 2:34

Simeongo Godigo bugai homu Jisas dali aga aya de ida si augwalibolo me ilao wali. Agai Jisas aga ida Mariabolo te po wali, “Odiąo. E waigo pode Israel we bidi hauwa augwaligo God taga paibao. Tama hauwa bage me augwali God pąba asaibao. Te aga dąį tiwai me deli nigalueibao, tama bidi hauwago agabolo dwai po waibao.

2 Korin 2:16

Te bidi dolabo tų tomode bidibo hanigo te odobo denami te isabo denami odobo dao, tama augwali te isabo madi pedalaibao. Tama te Godigo augwali ma sabo tų tomode bidibo hanigo te odobo denami te bidibo ula sabo denami odobo dao, tama agai te bidibo ula augwaliba pedalomainogo yaibao. Te sęde Godigo da tau sisąyu tama dago te sę ebo usu egowe? Mu menio. Tialima aga da tau mu sabo dao.

Ma Dobola Sali 9:16

Tiali goli, eno nage hodolama, te tuni bidi nigiliyu, te eno genuai bomo dagebolo ola mayu, tama te we bidigo eno genuai nogi te tigidali tǫba te po pusugi pomainogo tebao.

Aisaia 57:14

Genuai Bidigo te tama po wali, “Te eno we bidi dabe enaba ma asomainu yaibao. Te augwa sunumi bugagia dodolama, te sunumi paliabo nai tigidali sela sąwaibao, tiyu te nai dabego augwali sągąde dolama, te augwali tula muidalio,” wali.

Aisaia 37:26

“‘Senakerip, nago konebeo, te polobadu digi eno te sę ebode homu kone palama, tama nage te sę emainogo sa muyu dąį ilali. Eno nageba bomo menama, nago te bomai obo elalubo taun dolomainu yai. Te nage peyu, nago te taun dabe alubaso, te augwali degasa pelama, te masigi pesage genuai holama, tama te pobele bage hogomu genuai pesage igulali.

Galesia 5:11

Te tigiwali togwabo po wabo bidi augwaligo dagebolo te po wali, “Te bidi Pol me, agai te po wabo dao, ‘Bidi me Godigo agabolo te doloba pai bidi da omainogo, tama aga tigiwali togwao, aga te Godigo bomo yai po tigidali me wali asao,’ Polgo te po wabo dao,” augwaligo enade te po wali. Tiali goli te mu meni, eno te po wabo menio. Eno ama dedeo, eno te tobage po odubadi tigi sogo da, teda te Juda dabe augwaligo ena dali boi bidi eyu, ena elainogo homu me egi menio. Woo, eno te we bidibolo te Krais aga te ni pedaide isiyu dago sęgę sela sąyani po naga ola mabo dao. Tama eno te po naga ola mobaso, tama augwaligo hagela eyu, tama augwaligo ena dene mabo dao. Tialima, te eno te tigiwali togwao po me, te duga homu tigidali Kraisde muao po me, te po si taluama, tama te po si wagi sogo da, teda augwaligo ena dene dali sęgę dali magi menio.

1 Pita 2:6

Te eno po digi po begelama wali pode, te Godigo po bukude te Godigo wali po te bidi me deligo tama asęani, “Odiąo. Te eno masigi dabego te be nigiyu, tama eno te wiegi yai dila pai masigi me deli selama, tama ‘Te be bugagia dąų wabo masigi dao’ weyu, eno te dila pai masigi te sęba dąį ilali elalubao, te bulu nogi Saion tede munalubao. Tama bidigo aga homu tigidali agaba mubaso da, te bidi hale munu me egobeo,” te po asęani.

Jopgo Po Asęani Elalubo Buku 23:14

Tama tiyu yaide, agai homugo enade magi sę me yabo homu ebaso da, agai ebo dao. Ma, agai haniani homu kolesaga me elalubo.