1 Korin 8:9 - Godigo dwagi yai po buku

⁹ Awe, te mu dao. Tiali goli dage mi tubo bage dage dua dao. Tiyu tama te tibo godibolo mani mi tubo sę duga digi elama, tama te bomo meni yai bidi dabego sulama, tede sągąde dolama, tama augwali te dwai sęgęba tula muabuo.

1 Korin 8:9 Referans Kwoze

Galesia 5:13

Ama dede, polobadu God agai dage i wai dao, dage olo mu bugagia bidimainu yai. Tama dage megi olo mu bugagia bidiyu, tama bugagia suao. Te da te bomo yai po dologode bidisiąbaso, tama dago polo homu kolesaga wali peyu, tama dena tigigo kolesaga wali pinao, te homu egimio. Te menio. God agai da tau selama, tama da olo mu bugagia bidibaso, tama dage duga hasi dwagi yai homu eyu, duga abagi tau sao, te augwaligo olo sę ebo bidi tiwai bidao.

1 Pita 2:16

Tama dage God dali dąų olama, tama dage da aga olo sę ebo we bidi dao. Tama te dwai sę ebo kolesagago dage dąų waidali weyu, dage bugagia olo bidao. Tiali goli olo bidibadi dagego te homu egimio, ‘Te da olo bidibaso, tama dago dwai sę eyu da, te usu dao,’ te homu egio.

2 Pita 2:19

Tama te tibo po ola mabo bidi dabe augwaligo te po te we bidibolo wabo dao, “Dagego dago po wali peyu da, teda dage olo mu bidaibao.” Tama augwaligo te tobage po wabo digi tiali goli augwali te augwa digi dolobo kolesaga ebo sę bidi bidibo dao. Te tiwai dao: tama te bidi te magi kolesaga me deligo te bidi me deli aiyaba elaluyu aga dąų obaso da, teda te bidi aga te elalubo kolesagade dąų wali bidi dao.

1 Korin 10:24

Bidi me deligo aga digi naga bugagia bidabo homu me elamuo. Menio. Tigidali we bidi deli deligo te gasa bidi bugagia bidimainogo homu eyu tama augwali tau sabo kolesaga yao.

1 Korin 10:32

Tama tiyu, dagego te Juda dabe me, te Grik dabe me homugo koneao, tama Godigo po odobo we bidi hani dabe me, tama dagego ebo sęde augwaligo God dali agai po dali si dali dwai homu idali weyu, dagego duga ebo kolesaga bugagia tonaluao.

1 Korin 9:22

Te Kraisde konealubo po dąų wabo bomo meni yani we bidi augwali eno tau sainogo eyu, tama ena te bomo meni yai bidi tiwai bidibo dao. Eno te tigidali sunumidu te gasa bidi dabego ebo kolesaga tigidali usu siyu, tama augwali tiwai bidibo dao. Augwali meba eno ma dobola somainogo tama ebo dao.

1 Korin 8:12

Te ama mebago te Kraisde konealubo po dąų wabo kolesaga te bomo me ebeo. Tama dagego te dwai sę augwaliba elama, tama augwaligo te augwa gedude sę ebo dwai ilibaso da, te kolesagade te dagego dwai sę te Kraisba digi yaibao.

1 Korin 8:10

Nage bidi te koneani kolesaga elalubao wida, te nage te tibo godigo lotu beba pelama, tama nage tede dulalu nai tueibao, tama bidi me deli te aga Kraisde konealubo po dąų wabo kolesaga bomo meni yai bidi te agai nage subaso, te tebode te aga homu hodolama tama aga homu te mi tubo te dwai kolesaga da homu yali goli, te tibo godiba ofa yali nai tuabo homu yaibao, tama agai te mi tueibao.

Kraisgo Geme Dualali Sę Pedelabo Po Jonbolo Ola Mani 2:14

Tiali goli eno po meba nage dali elalubao. Nage dali bidibo bidi meba, augwaligo te bidi Balamgo kolesaga wali pabo dao. Tama te Balamgo kolesaga e dao. Polobadu bidibadi agai te tuni bidi nogi Balak agabolo te Israel dabe gea gano bilabo kolesaga ola mawai. Tama ola menama, tama Balakgo te Israel we bidi homu hodolama, tama augwaligo te tibo god dabebolo ula mani nai tuyu, tama augwaligo te penani ebo kolesaga emainogo yai.

2 Korin 11:21

Mu tama, augwaligo te tebo kolesagade dago te sę yabo bomo me elalubeo! Tama eno te kolesaga igi sogo da, teda eno sęgę siyu tama hale egi da. Megi eno po te aga digi nogi ugwaba sabo po wabo kolesaga meni yai bidigo po tiwai obao, te bidi mebago augwa ebo kolesaga po te bomo elama pusubaso da, teda eno me eno bomo elama tama augwali aiyaba elaluabo po pusaibao.

1 Korin 10:29

Eno dagebolo te po te dagego dwai sę dwagi yai sę dagalabo homu tobade te po wabeo. Meni. Eno te dagebolo te mi tubode po wali bidi agai te dwai sę dwagi yai sę dagalabo homu tobade te po dagebolo obao. Magi baso meni, te agai homu si eyu bidibao. Dage tomode bidi me deligo te po hanalu waibao, “Ena digi ena haniani nai tubo usu yabo digi, tama gasa bidigo te ebo kolesaga dagalabo homugo digi eno ebo kolesaga magi baso te dagalaibawe?

Polgo Po Pas Rom Dabeba Asęani 15:1

Te da Godigo we bidi hani tomode te we bidi meba augwaligo te Kraisde te konealubo po bomo meni yai bidiyu, tama augwaligo haniani sęde te habu selebo dao, te ena tamadi tama te sęde po asęani. Tama da meba te Kraisde te konealubo po bomo eyu dąų olama bidibao. Tama da augwali dali te nagamea pai kolesaga eyu augwali sao. Dago augwali dali tama tiyu, tama dago augwaligo sęgę tolao. Dago augwali sula tagalama tama dena homu kolesaga naga wali me piduamu dao.

Esekiel 14:3

“Tǫde bidio, te bidi dabe augwaligo te tibo god dabeba sesemane homu kone elama, te augwaligo sęgę genuai pedelali. Tialima, augwaligo te tibo god dabe homu godola pelama, te augwali tagalabo homu me ebeo. Tialima, augwali odolali naga asali. Eno augwaligo hanalubo po wei me ponogobeo,” te po wali.

Aisaia 57:14

Genuai Bidigo te tama po wali, “Te eno we bidi dabe enaba ma asomainu yaibao. Te augwa sunumi bugagia dodolama, te sunumi paliabo nai tigidali sela sąwaibao, tiyu te nai dabego augwali sągąde dolama, te augwali tula muidalio,” wali.

Aisaia 35:3

Dagego te bomo meni yai bidi dabe dąų waliyu, te haliga wi ebo bidi dabe, me didibili ebo bidi te dąų waliyu yao po wai dao.

Pris Sę Ebo Bomai Po 19:14

“Dagego te olo degai we bidi augwaliba te po dwai me wagio, ‘Godigo dage dolabo sę elalubao.’ Dagego te gedu widai bage habela muabo bono gaga te sunumide me mugio. Dage ena Godide wi yao, duga Genuai Bidi dao,” wali.

Matyu 18:10

Dage dua bugagia dao. Tiyu dagego te homu eyu, e dwasianu we bidi tomode me deli te olo nai tiwai da wagimio, augwalide tagala wagimio. Menio. Eno dagebolo te po obao, te Godigo bidibo madide bidibo ensel te mobo bidi dabe augwaligo sesemane sogo te eno Aya dagalude bidibo subo dao. Tama tiyu, te ensel mobo bidi dabego e tiwai dwasianu we bidi hani tonalubo dao.

1 Korin 10:28

Tiali goli, te bidi me deligo te po dagebolo weyu, “Te mi da, te ofa yai mi da” po obaso da, teda te bidigo dagebolo wali po te dagego homugo koneama, tama aga tobade dagego te nai me tulamu dao. Dwai sę dwagi yai sę dagalabo homu dolidali weyu te nai tugio.

2 Korin 6:3

Dago homugo te bidi dabe augwaligo dwai po te dago ebo sęba me badi te tama po waidali homu elama, tama augwaligo Godigo po tudiba muidali weyu, dago te bidi dabe augwali sągąde magi nai me deligo enama tulaluabo sę me egobeo.

2 Korin 11:29

Te bidi me deli bomo meni ebawe? Teda, ena me te bomo meni yai tiwai bidaibao. Te bidi me deli te dwai sęba tulaluai dawe? Teda, eno te aga te dwai sę tomoba kegali bidi dali dwai homu mu yaibao. Awe, tigidali haniani sę ebode eno te dagebolo tibo po ola mabo bage augwali eno aiyaba elalubo dao.

Kolosi 2:8

Dage dua dao. Bidi dabe meba augwaligo te tǫde bidigo olo homu kolesaga, te we bidibolo tibo po ola mabo homu kolesaga, augwaligo dagebolo te tobage dwai homu kolesaga ola menama, tama te homu kolesagago dage dąų waidali weyu, dage dua dao. Te tobage homu kolesaga te Kraisgo ola mabeo. Mu menio. Te tobage olo homu kolesaga te bidi dabego polo wąįgo ola mani kolesaga dao, me te tǫ dali dagalu dali si tonalubo dwai genuai mobo bagego ola mani homu kolesaga dao. Te Kraisde sabeo.