1 Korin 8:4 - Godigo dwagi yai po buku

⁴ Te gasa we bidi augwaligo te tibo godiba ofa elama te mi dabe tubo kolesagade eno po megi obao. Dage mebago te tobage mi tuaio homu eyu tama dagego e po wabo dao, “Te tibo god te mu bidibo nai menio. Te olo piksa noma naga dao,” te po wabo. Awe, dago te po page koneani. Tama dage mebago e po me wabo dao, “Te god hauwa me elalubeo. Menio. Te God deli naga aga bidibao,” te wabo. Awe, te me dago koneani.

1 Korin 8:4 Referans Kwoze

Bomai Po 4:39

Tama tialima, dagego te tiali sę gegeda pelamuo. Genuai Bidi aga te dagalude me tǫde God dao. Tama te gasa God me menio. Mu menio.

Aisaia 41:24

Tiali goli, menio. Iya, tegoba! Dagego magi sę me deli yabo usu isąwai, magi baso meni, dage tibo god dabe te olo dwai nai naga dao. Tama te dagebolo lotu po wabo we bidi, augwali me eno gedude te dwai nai mu pedela silai dao.”

2 Timoti 2:5

Magi baso meni. Te God deli naga bidibao. Tama te God de bidi si tomode naga dolalubo bidi deli naga te elalubao, te bidi te Krais Jisas dao. Agai God dali we bidi dali deliba sisinabo bidi dao.

Efesus 4:6

Tama te God me deli digi naga bidibo, te da tigidali tǫde hani bidi dabe dago Aya deli aga dao. Tama agai tigidali bidi aiyaba elaluama tama agai nogi dali bomo dali te ugwadu mu elalubao, tama tiyu agai sę tigidali we bidi tomode eyu, tama tigidali bidi tomode bidibo dao.

Bomai Po 6:4

“Dage Israel dabe, dagego bugagia odiąo. Genuai Bidi deli tama dago God deli tama dao.

Dwagi Yai Gesi Po Makgo Asęani 12:29

Jisasgo po wei ponoyu, agabolo te po wai, “Te polalubo bomai po te e dao: ‘Dage Israel hani we bidi, dagego odiąo! Genuai Bidi, dago God, aga deli digi naga te dago Genuai Bidi dao.

Aisaia 44:24

“Ena Genuai Bidi, ena dage tudibadu pogwalu, te dage ma dobola sabo bidi, eno naga eno sisilama, dage dąį ilali, te ena hani da olama, te dage e tǫba pedalisiąbadi tama tiali. Eno te tiwai po dageba wainu ebao. Enaduba deligo naga eno te tigidali nai pedela silimainu ilali. Eno naga eno te dagalu me tǫ nigilama, te augwali bidabo pesageba munama, te megi elalubo dao.

Aisaia 44:6

Tigidali Bomo Elalubo Genuai Bidi, aga te Israel king da, te dage tudibadu pogalu, te dage tau sabo bidi, agai te po wai, “Ena Genuai Bidi, ena hasia polasa mu bidali, tama ena nosali te sabi badu mu bidaibao. Te gasa god munu me bidibeo, enaduba deli naga bidibo dao.

Jutgo Asęani Pas 1:25

Tama God agaduba deli naga bidibo dao. Agai da tau siyu ma dobola somainogo, tama agai dago Genuai Bidi Jisas Krais e tǫba tagala palali. Tama tibaso, dago Godigo nogi ugwaba sinao. Awe, tama tiyu, God aga polalubo tuni bidi bidimainao, tama aga genuai bomo mu dali, agai moni ula dali si elalubaso, tama dago aga nogi ugwaba sinao. Te tigidali sogo polobadu aga tama bidai, te megi me aga tama bidibao, te tigidali sogo nosali God aga tama bidada peyu, bidada paibao. Te po mu po dao. Tama dao.

1 Korin 8:10

Nage bidi te koneani kolesaga elalubao wida, te nage te tibo godigo lotu beba pelama, tama nage tede dulalu nai tueibao, tama bidi me deli te aga Kraisde konealubo po dąų wabo kolesaga bomo meni yai bidi te agai nage subaso, te tebode te aga homu hodolama tama aga homu te mi tubo te dwai kolesaga da homu yali goli, te tibo godiba ofa yali nai tuabo homu yaibao, tama agai te mi tueibao.

1 Korin 8:1

Dagego te enabolo asęna tolali pode, tede dagego e po me ena hanalu wali, “Te gasa we bidi augwaligo hasa ela munama, tama te tibo godibolo te ofa tiwai eyu, te hasa mi meba te tibo god pageba mubo dao. Tama da Godigo po wali pabo we bidi dago te tobage mi tubo te usu dawe, ma meniwe?” te po dagego enabolo asęna tolali. Te kolesaga ebode eno wabo po elalubao. Dage mebago e po wabo dao, “Da tigidaligo koneani, te tibo god te olo nai dao.” Awe, te mu po dao. Tiali goli te olo konebo kolesagago te hagoma ebo kolesaga ebo homu hodolaibao. Tiali goli dago dena hasi te gasa we bidi dali wiegi yai homu eyu godolo ebo kolesaga selama, tama tebogo te da Godigo po wali pabo bomai we bidi pedalaibao.

Godigo Sęba Tagala Palai Bidigo Po 19:26

Tama dagego te bidi Pol agai ebo kolesaga koneani dao, dago agai po dabe me odali dao. Agai Efesusde bidibo we bidi dabebolo wabo po dabe, tama agai Esia tǫde bidibo we bidigo me agai po tama wabo da, ‘Te tobage bidigo nogogo nigibo god da, bomo menio, augwali god mu menio, agai dage tau sogobeo,’ te po walio. Agai tama po wabode tigidali we bidi augwaligo te po wali pali, te Efesus be nanide me, te Esia tǫde me.

Godigo Sęba Tagala Palai Bidigo Po 14:15

“Dagego te kolesaga egimio. Dadi si me bidi dage tiwai tama dao,” wali. “Dadi si dage pageba asali, Godigo dwagi yai po dagebolo pusa mawainogo asai dao. Tama dagego te odolali lotu po wabo tibo god tudiba muiyąo. Tudiba munama, dagego te God mu pageba asiąo, hauwa sogo bida bida peduabo God pageba asiąo. Agai te dagalu me, tǫ me, tamu ąį me, tigidali tede bidibo nai dabe me agai nigai dao.

Jeremaia 10:14

Bidi dabe te tiwai ebeo. Tigidali te umuna pelama, te koneani homu me elalubeo. Te tibo god golgo nigibo bidi dabe dao, te augwali hale yaibao, te augwa nigali nai dabede. Te god dabe te mu nai menio. Augwa te bidibo ula me elalubeo.

Jeremaia 10:10

Tialima, Genuai Bidi, nage God mu dao. Nage sesemane bidibo God, te nage sesemane sogo king bidaibao. Te nago haliga sębę ebo sogo da, te tǫ mali eyu, te we bidi hani bugagia me bidigobeo.

Aisaia 45:14

Genuai Bidigo te po wai, “Te Isip tǫ kantrigo mone doado bage tigidali, me te tǫ kantri Sudango doado bage tigidali me, te dage Israelgo saibao. Te boi bidi dabego te tǫ kantri Seba bobobage bidi dabe te kalabus ilama, te augwali dageba tagala palaibao. Tama augwaligo nogo te sen dabego dunama, augwali dage wali asu, te augwali dagego olo sę ebo bidi dabe pedelaibao. Te augwaligo dageba kidu sugunama, tama wi eyu, te tiwai po waibao, ‘Mu tamao, God dage dali bidibao,’ waibao. ‘Aga deli naga te God mu, te gasa god me bidibeo,’ waibao.

Aisaia 45:5

“‘Enaduba deli naga ena Genuai Bidi da, te gasa god me bidibeo. Sairus, nago ena konesiąwai, tiali goli te eno naga te bomo nageba mabo dao.

Aisaia 37:20

Te Genuai Bidi, dena God, eno homugo te megi nago da tau somainu homu eyu, tama da te king Senakeripgo nogode ma dobola sao homu yai. Tama te tigidali tǫde we bidi hanigo te tiwai bugagia koneyu, nage naga nage te Genuai Bidi da waibao,” po wai.

Aisaia 37:16

“Genuai Bidi, Tigidali Bomo Elalubo Bidi, nage da Israelgo God, nage te ensel mobo bidi daide ugwadu bidiyu, te naga king sia saide dugulalubao. Tiali goli, nage naga God mu da, tama nago te tigidali bulu tǫ habu tonalubao. Nago naga nago te tǫ me dagalu nigai dao.

Bomai Po 32:39

Dagego mu koneao, ena deli ena God mu dao. Tama ena tiwai god me menio. Eno bidi dabebolo bidibo ula mabo dao, tama eno bidigo bidibo ula ma sela sąbo dao. Eno bidi mu dolama, tama eno aga ma usu ilibo dao. Eno magi sę me yainogo da, teda eno yaibao, te bidi mego ena hagegobeo.

Bomai Po 4:35

Genuai Bidigo te sę dabe ola mani da, teda dagego konemainu te yali dao, te aga deli digi naga God bidibao olama konemainu te yali dao. Tama te gasa God me bidibeo. Mu menio.

Bomai Po 3:24

‘God, Genuai Bidi, eno koneani, nago enabolo nago genuai yabo sęde te sę dwasianu deli naga me nago enabolo ola manio. Te gasa god dagalude me tǫde me bidibeo, te nago te genuai sę nago polo yali, te sę tiwai yabo.

2 Timoti 1:17

Tama tibaso, eno agai ena dali yali sęde homugo kone paluyu, tama aga genuai nogi me aga wiegi yai ula yai bomo me te si ugwaba muyu, tama eno e po obao: “Aga te Tuni Bidi tigidali sogo bidibao. Aga me isibo meni, gamonaibao. Tama bidigo aga me subo menio. Agaduba deli naga te God mu dao. Genuai nogi me bomo me te agade sesemane sogo mu bidada peyu, bidada pomainao. Mu dao,” eno te po obao.

Godigo Nogi Ugwaba Sabo Tęąbi Po Wabo Buku Dabe 86:10

Magi baso meni, nago naga te genuai bomo elaluyu, tama nago te we bidigo isiąbo genuai sę dabe ebo dao. Tama nago naga te haniani wiegi wiegi yai sę ebo dao. Nagaduba deli naga, nage God mu dao.

Godigo Sęba Tagala Palai Bidigo Po 15:20

Me ma, dago augwalibolo pas tolinao. Tama te pas tomode te po wainao, ‘Dagego te augwaligo te tibo godibolo ula mabo nai te dagego tugimio, dagego kibu me agai kaneme gelisąwai kibu tugimio, kaneme me tugimio. Te we sabo bomo yai po bolama, dwai penani sę egimio,’ waibao.

1 Korin 8:11

Tama tibaso, te nago koneani kolesagago te bomo isąwani bidi dolali, te amade te Krais aga isama tama aga ma sai dao.

Galesia 4:8

Te polobadu dagego God konesiąbadi, tama dage e tǫde dwai haubo noma bidi dabe dologode bidai dao, dage augwaligo olo sę ebo bidi tiwai bidai dao. Tama te god mu menio, te augwali tibo god dao.