1 Korin 4:10 - Godigo dwagi yai po buku

¹⁰ Te Kraisgo nogi ugwaba sainu, da te tǫde we bidigo gedude te kolesaga geda muyu te polobo bidi tiwai bidibo dao, tiali goli dage te Kraisgo kolesagade te kolesaga koneai bidi tiwai bidibao. Dage bomai we bidi mu bidimainogo eyu tama dago dena digi bomo meni yai bidi dabe ilali. Dage genuai wiegi yai nogi elalubao, tiali goli dago nogi meni yanio.

1 Korin 4:10 Referans Kwoze

1 Korin 2:3

Tama polobadu ena dage dali bidali sogo, te sogo ena bomo meni yani. Ena moni wi elalu, tama ena tigi didibili hauwa yai.

Godigo Sęba Tagala Palai Bidigo Po 26:24

Te bidi Pol aga digi tau sabo po tama obadi, te bidi Festus agai agabolo i bomonama weyu, te po wali, “Pol, nage wabo pobao. Nage hauwa sogo skul wai bidi dao. Tama te genuai kolesaga sai bidi dao. Tibaso, nage wabo pobao,” wali.

Godigo Sęba Tagala Palai Bidigo Po 17:18

Tama te Epikuria hani po ola mabo bidi dabe me, te Stoik hani po ola mabo bidi dabe me, augwaligo Polgo po aiyaba elaluai hagede, pogo wąbi hwįai ąǫ yali. Te bidi me badugo te po wai, “Te bidi aga da, te mu konesiąwai bidi da. Agai dabolo magi po obawe?” Me badu bidigo te po wali, “Agai te po wabo gasa habuba bidibo Godigowe?” te po wai. Pol agai te Jisasde po ola mobadi yaide, isai bidi te gų pagede ma hodaloabo po ola mobadi yaide, augwaligo te tobage po tama wali.

1 Pita 4:14

Tama dage Krais wali pobaso augwaligo dage dali te nogi posobo dwai po weyu da, teda dage dwagi yai homu yao, God aga moni ula yai Mobo Bidi aga dage dali bugagia bidibaso.

2 Korin 13:9

Tama dago dage dali po tų isąyu tama tede Godigo da mani bomo waselabo tų meni baso, bidi mebago da bomo meni yai bage da te homu yaibao. Te usu da, po meni. Dagego dwai sę me isąyu tama Godigo po bugagia wali peyu tama tede bomo elalubaso, da wiegi yai homu pemene yaibao. Tama dago Godibolo sesemane sogo hanalu wabo po weyu, dago homugo agai dage tigidali dodolama tama dage agai po odobo bomai we bidi mu pedaloyu, agai we bidi mu naga bidaibao.

1 Korin 3:18

Tiyu te bidi me deli agade digi tibo po ola mayabuo. Te dage tomode bidi deli agai te e tǫde homu kolesaga wali peyu tama te tiwai homu eyu, ‘Eno kolesaga koneai elalubo,’ aga te homu eyu da, teda aga hasia bolo aga te tǫde we bidigo gedude te wabo pabo bidi tiwai pedalao. Tama tiyu aga te Godigo gedude te kolesaga koneai bidi mu pedalaibao.

1 Tesalonaika 4:8

Tama tibaso, e po odolama ela pabo bidi, te bidi agai e tǫde bidigo po naga tudiba mubeo. Te bidi agai Godigo po odolama ela peyu, aga tudiba muani bidi dao. Te God agai naga dagebolo te Dwagi Yai Mobo Bidi mani God da, te Mobo Bidi agai dagebolo mani, dage Godigo we bidi mu bidimainogo.

2 Korin 11:29

Te bidi me deli bomo meni ebawe? Teda, ena me te bomo meni yai tiwai bidaibao. Te bidi me deli te dwai sęba tulaluai dawe? Teda, eno te aga te dwai sę tomoba kegali bidi dali dwai homu mu yaibao. Awe, tigidali haniani sę ebode eno te dagebolo tibo po ola mabo bage augwali eno aiyaba elalubo dao.

2 Korin 11:19

Dagego te eno te tobage kolesaga ebo sę ilali. Magi baso meni. Dagego wiegi yai koneani kolesaga elalubao, tama dagego te konesiąwai bidi gogola sula tagalabo homu godolo elama, te konesiąwai bidigo po dagebolo momainogo yali!

2 Korin 10:10

Mu tama, bidi meba augwaligo enade tama tiwai po obao, “Awe, te agai asęna tolobo pasde sęgę yai po elaluyu, tama bomo elalubo po me elalubo dao. Tiali goli aga digi sabalobo si tama dago aga digi suyu bomo meni yani, tama agai po te olo nai tiwai dao.” Te tama po wabo dao.

1 Korin 10:12

Tama tibaso, dagego duga digi bomogo bugagia dolalubo usu da homu eyu da, teda dage tulaluyu dolidali weyu dage bugagia suao.

1 Korin 4:8

Awe, dagego homugo te dagego haliga pągąna palio! Dagego homugo te dage tigidali nai elalu tama dage usu yai elalubao. Te dagego da aiyaba elaluama, tama dage te gavman tuni bidi king tiwai pedalalio! Mu tama dawe? Woo, te duga homu naga dao. Eno homugo dage te tuni bidi king mu pedalomainao. Dage tama tigi sogo da, teda da me dage dali te tuni bidi dabego bomo elalugi da.

1 Korin 3:2

Eno po digi po begelama obao. Dage te Krais wali pabo kolesagade wai bǫų tiwai bidibaso, te eno po dagebolo ola mobadi, eno te yadala pai po naga dage ola mani, te wai bǫų ame pe mabo tiwai. Eno te dili yai nai dage mabeo. Te sogo dagego te dila pai nai tuabo ąǫ isąwai, dagego Godigo sęgę yai po sabo usube. Megi me dage usu yabo me elalubao.

1 Korin 2:14

Tiali goli te Tedali Mobo Bidi elalusiąbo bidi da, agai te Godigo Mobogo olo mabo nai dabe sogobeo, aga usu egobeo. Magi baso meni, agai homugo te page meni yai nai dao, tama agai te naide te page bugagia konegobeo. Te naide po dago te Tedali Mobo Bidide naga sali, tama te Tedali Mobo Bidi meni yani bidi da, agai te po page me dagalogobeo.

Godigo Sęba Tagala Palai Bidigo Po 17:32

Te sogo Pol agai bidi me deli gų pagede ma hodaluali po pusubo da, bidi me badu augwaligo te po gisugu mani. Tiali goli bidi me badu augwaligo agabolo te po wali, “Dago homugo nago te po dabolo ma pusa mao,” wali.

Godigo Sęba Tagala Palai Bidigo Po 9:16

Tama ena digi aga ola mawaibao, agai ena nogi selasa pelama, tigidali we bidibolo pusa mawaibao, te me me sęgę, me me sęgę aga pageba asaibao,” Genuai Bidigo te po wai.

Dwagi Yai Gesi Po Lukgo Asęani 18:9

Te Jisas agai po begelai po me pusali. Te we bidi me badu augwaligo te tiwai homu yali, ‘Da naga doloba pai we bidi mu dao. Tiali goli, gasa we bidi tigidali te dwai we bidi dao,’ augwaligo te homu yali. Tama te homu yali we bidibolo Jisasgo e po begelai po pusali.

Dwagi Yai Gesi Po Lukgo Asęani 10:16

Jisasgo aga wali bilibo bidi dabebolo te po wali, “Bidi mego dagego pusubo po odobaso da, te agai eno po odoyu tebao. Bidi mego dage buluba ela palobaso da, te agai ena buluba ela palu tebao. Bidi mego ena buluba ela palobaso da, te ena tagala palali bidi me buluba ela palu tebao.” Jisasgo te po olama, te bidi dabe pali.

Dwagi Yai Gesi Po Lukgo Asęani 6:22

Megi dagego ena te Godigo Bidi Mu wali pobaso gasa bidigo dage dali sesanobo po weyu, dage buluba gudula palu, dage bidasabo po dwai weyu, dage dwai bidi dao obaso da, teda dage bugai homu pemene yao.

Matyu 24:9

“Te tebo sogo augwaligo dage selama, dene ilama, sęgę mobadi yaibao, tama augwaligo dage ela muaibao. Tama tigidali we bidi hani augwaligo dwai homu mu dagebolo yaibao. Magi baso meni, eno nogi dagede elalubaso augwaligo dage dali tama tiaibao.

Matyu 5:11

“Tama dagebolo sęgę mabo bidi dabe augwaligo suali dagego ena wali pabo subaso da, te augwaligo dage dali dwai posobo po weyu, tama dene mobadi augwaligo te kedu meni yai tibo po haniani weyu ebaso da, teda dage homu pemene wiegi yai yao.

Hosea 9:7

Te Godigo dageba dwai dene maiabo sogo pedelalio. Tama duga te yali dwai kolesagade usu nama, te dene saibao. Te sę pedalubo sogo da, teda Israel, duga koneaibao, te dwai dene dao. Dagego enabolo te po wali, “Te profet aga te kolesaga meni yai umuna sali da,” wali. “Te Godigo bomo elalubo bidi, aga te kolesaga geda mubo bidi da,” wai. Dage we bidigo ena godolo homu me isąwani, magi baso meni, dagego dwai sęgę te genuai umabo yai dao.

Aisaia 53:3

Te bidi dabego aga tudi ola menama, te aga begela dolama, te aga godolo mu me isąwai. Sesemane sogo agade te homu dene me haniani sęgę pągąnaluali. Augwaligo aga tudiba mu muanio. Te dago aga te olo bidi me tonobo tiwai yai dao.”

Bugagia Bidibo Kolesagade Po Asęai Buku 11:12

Te bidigo gasa bidi dolama, te po dwai wabo bidi, aga te kolesaga umuna sai bidi tiwai ebao. Tiali goli, te wiegi yai homu elalubo bidigo pedauwali te pania selama, tama te tobage po me wagobeo.

Te Israel me Juda Hani Sigo Tuni Bidigo Po Elalubo Buku Si 9:11

Jehu ma geasa pelama, te gasa gavman ofisa bidi dabe augwali bidiboba sabalobode, te ofisa dabe augwaligo agabolo e tama po hanalu wai, “Magi nai me deli pedalaliwe, a? Magi baso te e wabo pabo bidigo asama, nage suagasaliwe?” wali. Tama Jehugo te po wei ponoyu, e tama po wai, “Dagego koneanio, te tama tibo bidi dabego augwaligo kolesaga. Augwaligo te po subigilama po wabo dao,” wali.

1 Korin 1:21

Magi baso meni, God aga homu kolesaga te wiegi yai mu, aga tigidali naide kuna konebo kolesaga sia pai elalubo dao. Tama agai te tiwai ilama tama we bidi augwaligo augwa homu kolesagago naga aga konesiąbo sę ilali. Tialima Godigo homugo te dago Kraisde pusubo pogo agai te po augwa homugo konealubo we bidi agai ma dobola saibao. Tǫde we bidi augwaligo te pode te homu kolesaga meni yai bidigo olo po naga dao homu yali, tiali goli Godigo homugo te pogo agai we bidi ma saibao.

1 Korin 1:25

Magi baso meni, bidigo gedude te Godigo yali homu kolesaga te page meni yai homu kolesaga dao. Tiali goli agai homu kolesaga wiegi yai mu dao, tego te tǫde bidigo homu kolesaga tigidali aiyaba elalubo dao. Tama bidigo gedude Godigo yali sę, te bomo meni yai sę dao. Tiali goli te mu meni, agai genuai bomogo te tǫde we bidigo bomo tigidali aiyaba elalubo dao.

2 Korin 6:8

Tama bidi mebago dago nogi ugwaba sabo dao, tama bidi mebago da nogi aiyaba elaluyu ebo dao. Mebago posobo po dwai dabolo wabo, tama mebago gasa bidi dabe augwalibolo te dago wiegi yai kolesaga ebo po pusubo dao. Boi bidi dabe augwaligo da tibo po weyu, te we bidi dwai sę tomoba kegebo bidi da homu ebo dao, tiali goli menio, dago mu po naga wabo dao.

2 Korin 4:12

Tama tibaso, te e tiwai dao: te isabo sę te dade hauwa sogo idubao. Tiali goli dago Kraisgo bomo elaluyu, tama agai gesi wiegi yai po pusubo sę ebaso, tama dagego te bidabo ula bugagia siyu tama bidada peyu, bidada paibao.