1 Korin 3:13 - Godigo dwagi yai po buku

¹³ Te magi naigo te be sę yainu homu ebaso da, teda te tigidali bidigo sę yali te nosali po tų ebo sogo te hania haninama pedalaibao. Tama te po tų ebo side te sia dabo posolo ebo tiwai pedalaibao. Tama te sia aga digi te tigidali bidi deli deligo yali sę usu sesa pelama, tama augwaligo yali sę te wiegi yai yaliwe ma meniwe, te augwaligo koneaibao.

1 Korin 3:13 Referans Kwoze

1 Pita 1:7

Tama te haniani dene mabo sę augwaligo page elalubao. Dage duga homu tigidali Godiba muani sę, te sę usu somainogo te dene mabo sę dageba pedalobo dao. Eno megi te wiegi yai kapa nogi gol te naide po digi po begelama obao. Augwaligo te kapa gol te tǫde diganama, tama te dwai nai sela sąwainogo augwaligo te gol siade ulubo dao. Siago uludama, tama nosali te wiegi yai kapa gol naga pedalama, augwaligo saibao. Tama te gol te osogo wiegi yai nai dao, te tǫde elalubo nai dao, tama nosali te nai mu dolaibao. Tiali goli dagego duga homu tigidali Godiba mubo sę te wiegi yai mu dao, tebogo te kapa gol aiyaba elalubo dao. Tialigo da, dagego konealubo po dąų wabo kolesaga usu selama, tama usu baso, te Jisas Krais aga ma asobo hanilabo sogode te Godigo dagego nogi ugwaba mu siyu, dagebolo dwagi yai genuai nogi mawaibao.

Kraisgo Geme Dualali Sę Pedelabo Po Jonbolo Ola Mani 20:12

Tama eno ma suali, te isai we bidi dabe augwali bidaluali, te augwali nogi yai bidi dali, te nogi meni yai bidi dabe dali, augwali te tuni bidi dulalubo nai te gesabidide dodolalubo, te eno suali. Tama te saide dulalubo bidi agai te buku meba dagawai. Tama agai gasa buku me deli dagawali, te augwali isiąma gamonaibao wali we bidi nogi asęani buku dao. Tama agai te tigidali isai we bidi dagalai. Agai te augwaligo yali kolesagade po te buku dabede asęani po nedama, tama te asęani pode agai augwali dagalali.

1 Korin 4:5

Tama tibaso, te sogo me elalubadi, te dago Genuai Bidi asisąbadi dagego te gasa bidi mego ebo kolesaga dagaligio. Aga asama tama agai te we bidi augwaligo augwa homu tomode geme dualaluali po tigidali selama te ulaba muagasaibao. Tama tigidali bidigo homu kolesaga hania hanilaibao. Tama te sogo Godigo da tigidali deli deli bidi te dago yali sę osola sulama, tama te sę usu baso agai te sę yali bidigo nogi ugwaba saibao. Bidi deli deligo yali sę usu nama te aga nogi te tama naga ugwaba saibao.

1 Pita 4:12

Eno abagi mu dede, te dageba te dwai usu sabo sogo megi pedalobo. Tama te sęde te gasagi yai konesiąbo sę dao homu eyu, dagego noma sigimio. Woo, te menio.

2 Pita 3:10

Tiali goli te Genuai Bidi asobo sogo mu asaibao, te nai wi sabo bidi geme asobo gilama. Tama te sogo dagalu kulukulu genuai olama tama hagawaibao. Tama te giliga dali, polua dali, te hǫ dabe tigidali, te siago dela silaibao. Tǫ me, te tigidali nigali nai elalubo me, te siago tigidali daibao.

Sekaraia 13:9

Tama te me badu bugai elalubo te dwagi yai pedalabo sę usu sabo sę ilaibao, te bidi mebago te gol me silva te dwai hogomu sela sąmainogo te isiba ulubo tiwai yaibao. Tama augwaligo gedu haluasa po enaba obaso da, teda eno augwaligo gedu haluasa po wabo odaibao. Tama eno te tama po augwaliba walaibao, ‘Dage da, eno we bidi dabe da’ obaso, teda augwaligo te tama po waibao, ‘Nage God, dago Genuai Bidi dao,’ po waibao,” Genuai Bidigo te po wai dao.

Polgo Po Pas Rom Dabeba Asęani 2:16

Eno te Godigo wiegi yai gesi po te we bidibolo pusubo si eno e po me pusubo dao. Odao, te Godigo te aga bomai po mani bage me, te bomai po sisąwani bage me augwali tigidali dali Godigo te po tų nosali yaibao. Tama tiyu agai te po tų dodolobo sę te Krais Jisasgo nogoba muyu, tama te bidi dabego geme ebo kolesaga osola suyu yaibao.

Polgo Si Wali Pas Timotiba Asęani - 2TI 1:18

Te genuai po tų yabo sogode eno homugo te Genuai Bidigo Onesiforus homu dene eyu tau sao. Tama te bidi agai ena te Efesus bulude hauwa sogo tau sali, te naga digi bugagia naga koneai dao.

1 Korin 1:8

Tama agai te dagego agade konealubo po dąų weyu agaba homugo tialubo kolesaga, te agai bomo ilama, tama te tigidali nai silabo sogo usu nigi paibao. Agai tama tiyu, tama dago Genuai Bidi Jisas Krais aga ma asobo sogo te sogo dage sęgę meni yai we bidi pedalaibao.

Malakai 3:17

Tialima, te Tigidali Bomo Elalubo Genuai Bidigo te po wali, “Te hani dabe te ena hani naga bidaibao. Te genuai side bodolu eno muani, te hani dabe te eno we bidi mu bidaibao, te eno godolo ebo hani mu dao. Tama homu dene eyu, eno augwaliba te olo tau sabo wiegi yai kolesaga eyu, te aya me deligo te wai dabego ayago sę ebaso, te olo tau mabo wiegi yai kolesaga ebo tiwai yaibao.

Polgo Po Pas Rom Dabeba Asęani 2:5

Tiali goli nago naga homu mu palia selama, tama nago homu me begelebeo. Tialima tebo kolesagago te nago te dwai dene sabo sę ebo te pesage genuai holobao, te mone ge sabobo piduai tiwai. Te nosali te bodolu mani side te Godigo doloba pai po tų ebode te agai sębę hania haninama pedalaibao, tama nage te dwai dene te sogo saibao.

Dwagi Yai Gesi Po Lukgo Asęani 2:35

Tama tibaso, we bidi hauwago geme dualaluali homu te pebeli diliba pedelaibao. Tiali goli nage da, te bainat hwą ge tiwai me deli elalu, te nago hoboludu togwalubo tiwai ebaso, te homu dene tiwai yaibao,” Simeongo te po wali.

Polgo Si Wali Pas Timotiba Asęani - 2TI 3:9

Tiali goli augwaligo te Godigo mu po dali boi bidi ebo kolesaga te we bidi tomode genuai mu me pedalugobeo. Menio. Te tigidali bidigo augwaligo kolesaga te esela pabo bidi dabego ebo kolesaga tiwai ebo sueibao, te tiwai te polobadu te bidi dabego te bidi Janes de Jambres sigo te esela pabo bidigo ebo kolesaga suali tiwai gilama yaibao.

Jeremaia 23:29

Ena Genuai Bidi, eno po dolo obao, eno po te isi tiwai elalu, tama te genuai hamago te masigi dabe haluama, te kakali pedalubo tiwai ebo dao.”

Aisaia 28:17

Te ena te doloba pai skel te dagego kolesaga skel ebo te skel tiwai bidaibao. Tama te doloba pai kolesaga naga te eno usu ni tiwai elaluyu, tama tego eno dage usu saibao. Dagego homugo te tibao, te dagego dwai kolesaga ebo te kolesagago dage tau saibao homu te ebao. Tiali goli, eno te dwai sogo dageba pedalomainu yaibao. Tama dage te bidi dabe te genuai talua ge tulubage asiyu, ela silibo te tiwai yaibao. Tama dage pelama, duala sigi pabo pesage mu menia saibao.

Aisaia 8:20

Te augwaligo te augwa Godiba pelama, tama agai homu kolesaga siyu, agai bomai po sigi peyu eyąo. Ma, augwaligo tama tisąma yali da, teda augwali hulia sai madi me bididuaibao. Tama wiegi yai sogo me sugobeo.

Jeremaia 23:28

Ena Genuai Bidi, eno po dolo obao, te profetgo odolali na yali da, agai te na yali po miaibao. Tialima, eno te bidi me deliba po mawai ebaso da, teda agai eno te po dolo pusao. Eno po da, te wiegi yai nai wit ge wai tiwai elalubao, tama te profet dabego po wit aga bo ma wali tiwai olo nai dao.

Malakai 3:2

Tiali goli, Genuai Bidi aga asobo sogo, dego te po tų ebo ugwaba ela holobo usu egowe? Aga te pepeli diliba pedalubo sogo, de te me hagagobewe? Aga te sia posolo mu elasa asobo tiwai eyu, te silva me gol hogomu pobele bage sela sąbo tiwai yaibao. Tama aga te meda yai ugwa te sop dali wę dali sigo telabo tiwai yaibao, te meda mu sela sąwaibao.

Matyu 10:15

Eno mu po dagebolo obao, te tigidali we bidi po tų ebo bodolu muani sogo, te dagego po odobo hagela yai we bidi augwaligo sabo sęgę te genuai mu saibao, te sęgęgo te hanu si Sodom me Gomora side polobadu bidali dwai dwai kolesaga yali we bidigo sabo sęgę aiyaba elaluaibao,” Jisasgo te po wai.

Matyu 16:27

Magi baso meni. Nosali Godigo Bidi Mu te aga Ayago genuai bomo me, ula me dali, te ensel mobo bidi dabe dali hodobo si asaibao. Te sogo te agai tigidali we bidigo yali kolesaga usu nama wei ponaibao.

1 Korin 3:12

Tama te pos ni daide ugwadu be sę yainu ebo bidi augwali deli deligo haniani naigo te be sę yaibao. Bidi me deligo te wiegi yai kapa nogi gol tego te be sę yaibao. Bidi mego te kapa nogi silvago ma te dila pai masigi mugo, me te nigo, ma te kalago, ma te gasagi yai nosai dili dabego te be sę yaibao.

Polgo Si Wali Pas Timotiba Asęani - 2TI 1:12

Tama tiyu, ena kalabus bidi megi bidiyu, tama te sęgę eno tolobao. Tiali goli, ena tede hale me egobeo. Menio. Ena da, te eno Godiba homu tia pai bidi da weyu, te aga eno konebaso hale egobeo. Tama eno koneani, agai ena nogoba te muani sę te agai mu tonaluyu, tama te sesemane sogo bugagia bidada peyu, te genuai bodolu pedalubo sogoba usu nigi pabo aga usu yaibao, te sę hagagobeo.

Polgo Si Wali Pas Timotiba Asęani - 2TI 4:8

Megi da te udabo dąį ilaliba pedalali bidigo genuai nogi yai namba te sisi elama ena tonalubao. Te genuai nogi sabo namba te tiwai yaibao: te Genuai Bidigo ena te doloba pai bidi nogi poaibao. Genuai Bidi aga te doloba pai po tų ebo bidi jas, tama te genuai sogo pedalubode agai te doloba pai bidi nogi enabolo mawaibao. Tama agai enaduba delibolo naga te me magobeo. Menio. Te aga hania pedalubo suainu godolo homu ebo bidi dabe tigidalibolo te doloba pai bidi nogi mawaibao.

Hibru 10:25

Tama tiyu, dago te ama dede dali deliba sisinibo kolesaga te me tagalamuo, te bidi mebago te ebo kolesaga tiwai egimio. Menio. Duga koneani, te dago Genuai Bidi Jisas asabo side bodolu te pąba yagasalio. Tama konealigo da, ama dedego homu kolesaga tau siyu dąų walobo sę bomonama dago yao.

2 Pita 3:7

Tiali goli, megi Godigo pogo naga te dagalu me tǫ me sa munama, tama te dolobo sia dabo pedalobo tonaluyu bidibao. Tama te dagalu de tǫ sigo te Godigo po tų te agai po tudiba muani we bidi augwali te po tųba pedalobo tonalubao, tama te we bidi augwali dolaibao.