1 Korin 1:27 - Godigo dwagi yai po buku

²⁷ Te meni. God agai homugo eyu tama te tǫde haniani naide kuna koneani we bidi hale emainogo eyu, agai te augwaligo gedude te homu kolesaga meni yai bage dią sali. Tama me te tǫde genuai bomo elalubo bage hale emainogo eyu, agai te tǫde we bidigo gedude bomo meni yai we bidi dią sali.

1 Korin 1:27 Referans Kwoze

Jems 2:5

Eno ama dedeo, eno dagebolo dwagi yai homu eyu, godolo mu ebaso, eno dagebolo te po obao. Bugagia odao. Te tǫde tigidali bidi gedude magi nai meni yai bage, te Godigo te tiwai bidi sa munama, tama augwaligo te Godigo po dąų waligo te augwaligo te homu kolesagade te masigi me walu hauwa munalubo bidi tiwai yaibao. Te polobadu Godigo tama po wai, “Niwai bidi agai homu enaba muyu godolo ebo bidi, te aga eno we bidi bugagia tonalubo madi tomoba asagameo,” te po wai. Tama tiyu, agai te magi nai meni yai bidi augwali sa muyu, augwaligo te Godigo po mu dąų waligo da, te augwali te dąį ilali madi te pesage saibao.

Matyu 11:25

Tama te sogo Jisasgo Godibolo te po wai, “Ayao, nage te dagalu dali tǫ dali nigila tonalubo Genuai Bidi dao. Eno nage dali deli homu eyu, nagebolo usu da po obao. Tǫde homu kolesaga koneai bidi dabe augwaligo koneidali weyu tama nago te eno tamadi pusali po page nago geme dualai dao. Tiali goli te tǫde elalubo homu kolesaga konesiąwai we bidi augwalibolo nago te po page ola mawai dao.

1 Korin 1:20

Tama Godigo te po polobadu obaso, te tǫde koneai bidi dabe augwali magi yaibawe? Te buku hauwa elalubo po page konebo bage, augwali me magi yaibawe? Ma, te gasa bidigo homu bega sabo po bugagia wabo bage, augwali me mena sę me elalubawe? Menio. Godigo dabolo hanilama hania ola mawai dao, te e tǫde elalubo wiegi yai homu kolesaga te olo nai tiwai dao, te homu kolesaga meni yai bidigo olo po naga dao.

Godigo Nogi Ugwaba Sabo Tęąbi Po Wabo Buku Dabe 8:2

Nago te wai dabe me te ogwa wegi sibi munama, tama augwaligo nago nogi dali, bomo dali si te ugwaba sabo dao. Tebogo nago te nage dali boi homu ebo bage augwali dwai hale iliyu, tama augwaligo sagia sabo dao. Te nago po sela sąbo bage me augwaligo po wabo tagaluyu, olo bidibo dao.

Aisaia 29:14

Tama tibaso, eno gasa sę dabe mu te we bidiba pedalumainu yaibao. Tama augwali mu noma mu saibao. Eno te bidi dabego augwalibolo wiegi yai kolesaga mabo bidi dabego homu kolesaga sela sąwaibao. Tama eno augwaligo kolesaga sai bagego kolesaga eno mu silaibao,” wali.

Dwagi Yai Gesi Po Lukgo Asęani 21:15

Ena digi ena koneai bidigo po dage pedauwaliba muaibao. Te baso, dagego boi bidi dabego te po sela sąnama aiyaba elalugobeo.

2 Korin 4:7

Tiali goli ena dali, te ena dali deli sę ebo bidi dabe dali, dena te bomo yai ulade po pusubo wiegi yai sę elalubo, te tǫgo nigai olo sene tomode elalubo tiwai ebao, te dena isibo tigide naga elalubo dao. Te tigidali bidigo konemainogo ebao, te Kraisde wiegi yai gesi po pusubo sę ebo wiegi yai genuai bomo mu, te Godigo bomo naga dao. Te dago menio.

Matyu 21:16

Tama tibaso, te genuai bage augwaligo homu dwai eyu, agabolo te po wai, “Te nago augwaligo te wabo po nago odaliwe?” Tama Jisasgo augwalibolo te po wai, “Ao, eno odalio. Tiali goli dagego te bidi me deligo te Godide polobadu asęani po me deli nedebewe? Te po e dao, ‘Nago te gilama, tama te dwasianu wai puluba augwaligo nago nogi ugwaba sabo wiegi yai po wai dao.’ Dagego te po nedebewe?”

Sefanaia 3:12

Tama te we bidi augwali eno Jerusalemde bidimainu sula tagalaibao. Augwaligo nai dabe hauwa meniama, tama augwaligo augwa aiyaba elaluama elaluaibao. Tama augwali enaba aselama, tama augwali tau somainu enabolo hanalu waibao.

2 Korin 10:10

Mu tama, bidi meba augwaligo enade tama tiwai po obao, “Awe, te agai asęna tolobo pasde sęgę yai po elaluyu, tama bomo elalubo po me elalubo dao. Tiali goli aga digi sabalobo si tama dago aga digi suyu bomo meni yani, tama agai po te olo nai tiwai dao.” Te tama po wabo dao.

Aisaia 29:19

Tama te we bidi augwa digi augwa aiyaba elalubo we bidi dabe augwali te Genuai Bidiba wiegi yai homu yaibao. Tama te nai habuge yai we bidi dabe augwali me te Israel Dabego te Dwagi Yai Doloba Pai Kolesaga Naga Ebo Godiba wiegi yai homu yaibao.

Matyu 9:9

Te Jisas te bulu tagalama, tama aga pobadi agai bidi me deli te nai sela asobo we bidide takis mone sabo bede dulalubo suali, te bidi nogi Matyu da. Tama Jisasgo agabolo te po wali, “Nage ena wali asao.” Tama aga hodaluama, sisi elama, tama aga wali pai.

Godigo Sęba Tagala Palai Bidigo Po 17:18

Tama te Epikuria hani po ola mabo bidi dabe me, te Stoik hani po ola mabo bidi dabe me, augwaligo Polgo po aiyaba elaluai hagede, pogo wąbi hwįai ąǫ yali. Te bidi me badugo te po wai, “Te bidi aga da, te mu konesiąwai bidi da. Agai dabolo magi po obawe?” Me badu bidigo te po wali, “Agai te po wabo gasa habuba bidibo Godigowe?” te po wai. Pol agai te Jisasde po ola mobadi yaide, isai bidi te gų pagede ma hodaloabo po ola mobadi yaide, augwaligo te tobage po tama wali.

Godigo Sęba Tagala Palai Bidigo Po 7:54

Te Stivengo te kaunsil dabebolo te po odubadi, augwaligo guni bulama, sębę ebaso, augwa kele halua tuali, agade.

Godigo Sęba Tagala Palai Bidigo Po 7:35

Stivengo te po me wali, “Te Mosesgo aga Israel bidi hani augwaligo polobadu aga sela sąwai, agabolo te po wai, ‘Nage da, da tonalubo bidi menio. Nage da dabolo po tų dodolabo bidi menio.’ Tiali goli, te bidi Godigo aga augwali tonalumainogo eyu sa muai bidi, augwali te boi bidi nogode dagala sąnama, Godigo aga te sę emai hagede sa muai. Te sogo Godigo dagalude sę ebo ensel bidigo te po Mosesbolo pusa mawai, te isi dabo dwasianu nide.

Aisaia 44:25

Eno te magi nai me deli te nosali pedelaibao po wabo bidi dabego po te homu kone tuą palama, tama te augwaligo po geda mueibao. Tama te mena sę aga nade konea pai bidigo po homu kone tuą palaibao. Te po page konea pai bidigo homu kolesaga te eno umuna palobo bidi tiwai pedalumainu ilibo dao.

Jeremaia 8:9

Te kolesaga koneai bidi dabego Genuai Bidi ena tudiba mubao. Magi baso augwa te homu eyu, augwa koneani kolesaga genuai elaluba homu ebawe? Te augwa hale dwai mu selama, te dwai sogo gegeyu, te hasa bade tola sabo tiwai yaibao. Tama augwa homu kolesaga dolaibao.”

1 Korin 1:21

Magi baso meni, God aga homu kolesaga te wiegi yai mu, aga tigidali naide kuna konebo kolesaga sia pai elalubo dao. Tama agai te tiwai ilama tama we bidi augwaligo augwa homu kolesagago naga aga konesiąbo sę ilali. Tialima Godigo homugo te dago Kraisde pusubo pogo agai te po augwa homugo konealubo we bidi agai ma dobola saibao. Tǫde we bidi augwaligo te pode te homu kolesaga meni yai bidigo olo po naga dao homu yali, tiali goli Godigo homugo te pogo agai we bidi ma saibao.

1 Korin 2:12

Tama dago e tǫde we bidi tonalubo mobo me sabeo. Menio. Dago te Godidu asali Mobo Bidi sali, tama dago te Godigo dabolo olo maiabo tigidali nai konemainogo yalio.

Israel Hanigo Namba 22:30

Tama donkigo te po wali, “Ena naga donki mu dao, tama nage enade nage gesi bidide gagalama dualasa bilibadi, megiba tama te usu nagasobao. Eno te tobage sę nage dali hasia me yai dawe? Ma meniwe?” Tama Balamgo menio wali.