1 Jon 3:5 - Godigo dwagi yai po buku

⁵ Dagego koneai, Krais asali agai te tǫde we bidigo dwai kolesaga ebo sela sąwainogo asai, tama dwai sę ebo kolesaga agade me bidibo menio.

1 Jon 3:5 Referans Kwoze

2 Korin 5:21

Te bidi Krais agai dwai sę me isąwai, tiali goli da tobade Godigo dago dwai sę yali sęgę tigidali agaba sisinama, tama aga te dwai sęgę sai bidi tiwai mu pedalai. Agai tama tiali te da Kraisde wadolomainogo yali, tama agai bomogo da te Godigo gedude doloba pai we bidi pedalomainogo yai dao.

Hibru 9:28

Te tiwai me Kraisgo te aga bidibo ula aga digi te Godibolo deli sogo naga mani, te we bidi hauwago sęgę sela sąwainogo eyu tama tiai. Nosali te aga si sogo ma asiyu, te agai te sęgę sela sąwainogo me asogobeo. Menio. Te aga ma asobode te dwagi yai homu elama tonaluyu bidali te we bidi dabe augwali naga te agai mu ma sagasaibao.

1 Pita 3:18

Magi baso meni. Te Krais aga digi agai dago yali dwai sę sęgę sela sąmainogo aga deli sogo naga isali. Tama aga te doloba pai bidi mu bidai goli, tama agai da doloba pisiąwai bage te God pageba sesimainogo agai da tobade dene sali. Bidi dabe augwaligo aga tigi isilali. Me ma Godigo Mobo Bidigo Krais bidimainogo ma hodolali.

1 Pita 2:24

Tama aga digi agai dago yali dwai sę sęgę aga tigigo selama, tama te niba dąų wagi pai. Tama tiyu, agai homugo dago te dwai sę ebo kolesaga tagalaibao, te isai bidigo dwai sę ebo tagalali gilama. Tama dago te dwai sę ebo tagalama, tama dago doloba pai kolesaga naga eyu bidaibao, te me aga homu dao. Tama augwaligo aga tigi doloyu dene mawai, tama tebogo da tau selama dwagi yai ilali.

Hibru 9:26

Te agai hauwa sogo te sę egi sogo da, teda aga dene hauwa sogo toloyu, te Godigo tǫ nigali sogo gagalama tama megi e sogoba usu nagasigi dao. Tiali goli menio. Megi e sogo tigidali te pąde silainogo ebaso, tama Krais e tǫba deli sogo naga mu asali, te aga digi aga bidibo ula te Godibolo menama, tama te we bidigo yali dwai sę sęgę sela sąwainogo yai dao.

Dwagi Yai Gesi Po Jongo Asęani 1:29

Te sogo kigamu Jisas asobo Jongo suai. Tama Jongo te we bidibolo te po wai, “Suao, te bidi da, aga Godigo kibu sipsip wai dao. Agai te tigidali tǫde bidibo we bidi augwaligo yali dwai sęgę te sela sąwaibao.

Kraisgo Geme Dualali Sę Pedelabo Po Jonbolo Ola Mani 1:5

Tama Jisas Krais me, agai dagebolo te kolesaga si dagebolo momainao, te eno homugo. Aga te Godide homu kęą pai bidi bidiyu, tama agai Godigo po tigidali dolo mu pusali bidi dao. Aga da te isama, tama isali we bidi dabe tomode bidama, tama aga te hasia mu gų pagede ma hodaloali bidi dao. Aga da, te tigidali tǫde bidibo tuni bidigo polalubo genuai bidi dao. Agai da dali dwagi yai homu eyu godolo mu ebo dao, tama aga isaligo dago dwai sę yali sęgę tigidali sela sąwai dao, tama da megi olo bidibo dao.

1 Jon 1:7

Tiali goli da ulade biliyu da, te aga te ulade bidibo gilama, tama tiali da, da dena hasi abagi dede dali deli homu elama bidaibao. Tama bididuyu, tama Godigo ogwa Jisas agai kanemego dago dwai sę tigidali sela sąnama, tama da dwagi yai ma pedalobo dao.

1 Jon 1:2

Te gesi noma bidibo ula aga bulu ulaba hania pedalama, tama dago aga suai. Tama tibaso, dago agade po dagebolo pusuyu, tama te Ayade bidali bidada peyu, bidada pabo ula aga hania pedalama, tama dago sulama, tama dago dagebolo pusubao.

Taitus 2:14

Aga digi aga bidibo ula tagalai dao, tama agai te bidibo ulago da ma abelama, tama dago te tigidali bomo yai po sela sąbo te kolesaga agai sela sąwainogo tama yai dao. Agai da penama, tama da we bidi aga hani mu pedalainogo te sę yai, tama dago tigidali dwagi yai kolesaga bomo elama te sę naga emainogo agai aga bidibo ula tagalai dao.

1 Pita 2:22

Tama tiyu, agai magi dwai sę munu me ebe, te tibo kolesaga eyu tibo po me deli digi wabeo.

Hibru 1:3

Te Ogwa agai te Godigo wiegi wiegi yai homu kolesaga te dabolo hania ola mabo bidi dao, tama aga te God tiwai gagawai mu tama. Agai po da te genuai bomo elalubo, tama te bomai pogo agai te tigidali bidibo nai me bidaluao odubadi tama te bidalubo dao. Agai te we bidigo sęgę sali sela sąbo sę te silama, tama megi da te Tigidali Bomo Elalubo Tuni Bidi, te God dolo nogo badu dulalubao, aga genuai bidi mu dao.

2 Timoti 1:15

E konealubo po te mu po dao, tama tigidali we bidi e po odama augwaligo homugo mu dąų omainao: Krais Jisas te tǫba dulali, te tǫde dwai sę ebo we bidi dabe ma dobola sainogo asali. Awe, te mu po dao, tama te hasia polasa dwai sę yali bidi te ena digi tama e dao, eno yali dwai sę te gasa bagego dwai sę aiyaba elaluali.

Matyu 1:21

Te agai te wai ogwa ame naibao, tama nago aga nogi Jisas poao. Magi baso meni, agai te we bidi augwaligo sęgę elalubo sela sąnama tama augwali ma saibao,” te po wali.

1 Jon 2:1

Eno wai dabe, dagego dwai sę isąmainogo eno e po dagebolo asęna tolobao. Tama bidi me deligo dwai sę eyu da, te da tau sabo bidi me deli elalubao, te mu doloba pai bidi Jisas Krais dao. Tama aga Aya dali bidiyu, tama agai te da tau sabo po agabolo wabo dao.

1 Pita 1:20

Tama God agai e tǫ nigisiąbadi, polobadu mu agai aga koneama tama te sę yabode sa muani. Me ma megi e nosali sogo agai aga dage tobade waselai dao.

Hibru 4:15

Dago digi te sęgę aiyaba elaluabo bomo menio. Tiali goli dago genuai pris tobolu bidi aga tede da homu dene isąbo tiwai bidi da po wagobeo. Menio. Te daba usu siyu te pedalobo sęgę tigidali, te tigidali sęgę agaba me pedalama aga me usu sai. Tiali goli agai dwai sę munu me ebeo.

Hibru 7:26

Da we bidi te magi kolesagade sǫą pobaso, te tobage polalubo pris bidi agai da tau sabo usu mu dao. Godigo gedude aga te wiegi yai mu, tama magi dwai sę delinu te agade me elalubeo. Aga te wiegi yai mu yai. Aga te sęgę dwasianu sai bidi te tiwai me ebeo. Menio. Aga te dwai sę ebo we bidi dali bidibo menio, aga gasagi yai tedali mu dao. Godigo aga ugwaba mu selama, tama agai te dagalu me aiyaba elaluama, tama ugwadu mu bidibo dao.

2 Timoti 3:16

Awe, mu tama, te polobadu geme dualali po, te Godigo dabolo waselali konealuabo po page te genuai mu elalubo, tama bidigo te pode te po mu menio wabo te usu me egobeo. Te konealuabo po e dao: Aga te tigi elalubo bidi mu pedalali, tama hania hanilai. Tedali Mobo Bidigo we bidibolo ola mani, te bidi aga dolo mu yali. Te dagalude mobo bidi ensel dabego aga suai. Tama po pusubo bidi augwaligo agade po te tigidali we bidi hanibolo pusigi pali. Te tǫde bidi dabe augwaligo konealubo po agade dąų wai. Te Godigo aga dagaluba odasa holama, tama megi aga bomo dali, genuai nogi dali selama bidibo dao.

Dwagi Yai Gesi Po Jongo Asęani 14:30

Eno dage dali po hauwa megi wagobeo. Magi basowe? E tǫde tobolu bidi megi tama asobao. Agai ena dali magi sę ebo usu egobeo.

Dwagi Yai Gesi Po Jongo Asęani 8:46

Dage tomode bidi me deligo te enabolo nago dwai sę yali po weyu, tama te dwai sę page agai hania ola mabo usu egobeo. Te po kedu enade meni yai po dao. Tialima, eno mu po obadi, te dagego magi baso homude dąų olama, mubewe?

Dwagi Yai Gesi Po Jongo Asęani 1:31

Eno digi eno te nosali asobo bidi mena bidi dawe, te eno konebeo. Tiali goli, eno aga te dage Israel we bidi dali ola momainu, eno we bidi baptais magasiyu asai,” Jongo te po wai.

Dwagi Yai Gesi Po Lukgo Asęani 23:47

Te enesigi bidi dabego tuni bidigo te sę suai, tama agai Godigo nogi ugwaba siyu, agai te po wai, “Mu tamao, te bidi Jisas doloba pai bidi mu dao,” te bidigo te po wai.

Dwagi Yai Gesi Po Lukgo Asęani 23:41

Augwaligo da si elali da, te augwaligo doloba pai kolesaga yalio. Da sigo sęgę sali da, te usu tama da si yali sęde tialio. Tiali goli, e bidi Jisas da, agai magi dwai sę deli ebeo,” Jisas dali elali bidi mego te po wai.

Hosea 14:2

Dage te Genuai Bidiba ma aselama, tama te gedu haluasa po dagego Godiba te ofa tiwai iyagameo. Dagego gedu haluasa po e tiwai wagameo, “God, nago dago sęgę tigidali sela sąyu, tama dago gedu haluasa po wabo odao. Tama dago te bulmakau elama, tama nageba ofa ebo usu egobeo. Menio. Te dago te dena polobadu dąų walali po wali gilama, te dwagi yai kolesaga naga yaibao.

1 Pita 1:18

Magi baso meni. Dagego wąįgo dagebolo polobadu ola mani bidabo kolesaga te usu isiąbo kolesaga dao. Tama dagego koneai, God agai dage te usu isiąbo kolesagade ma dobola siyu, agai te mobi elama damua pabo nai mego agai dage ma abela sabeo, te dila pai kapa si nogi gol dali silva dali si, te tobage gamonasiąbo naigo dage ma sabeo.

1 Jon 2:2

Tama Krais agai tigi menama, tama aga digi dago dwai sę yali sela sąbo tų dawai bidi dao. Tama agai da naga tau selama, dago dwai sę yali te naga sela sąbo bidi menio. Agai tigidali tǫde bidibo we bidi me tau siyu, tama augwaligo yali dwai sę sela sąbo tų dawai dao.

1 Jon 2:29

Dagego te bidi Krais aga dwagi yai doloba pai bidi mu da weyu mu dolo kolesaga ebo bidi da te tiwai konealigo da, teda dagego me tama koneao: dwagi yai doloba pai kolesaga ebo bidi, aga te Godigo wai mu bidibao.

1 Jon 3:8

Niwai bidigo dwai sę idu bidibo, te bidi Satango hani bidi dao. Magi baso meni, te Godigo tigidali nai nigisiąbadi, polobadu mu Satango dwai sę ebo gagalama, tama eyu, tama megi me aga tama tibo dao. Tama agai te Satango we bidi tomode ebo dwai kolesaga ela silimainogo te Godigo Ogwa aga hania pedalai.