1 Jon 3:12 - Godigo dwagi yai po buku

¹² Da te polobadu bidali bidi Kein bidali tiwai bidamuo. Aga te Satango bidi bidai, tama agai aga ama ela muai. Tama magi baso aga ama ela muaniwe? Agai dwai kolesaga naga yali, tama aga amago yali kolesaga tigidali dwagi yai doloba pai kolesaga yai. Tibaso, aga sębę elama, aga ama ela muai.

1 Jon 3:12 Referans Kwoze

Hibru 11:4

Te polobadu bidali bidi nogi Abel agai konealubo po Godide dąų weyu, tama agade tiąluyu agabolo ofa yai. Tama te ofago te aga ama Keingo ofa yali te aiyaba elaluama tama wiegi yai mu yai. Awe, Abelgo Godide tiąluali, tama tego Godigo aga doloba pai bidi nogi yai. Godigo te Abelgo agabolo mani naide te agai godolo yai. Tama nosali Abel isali, tiali goli agai te Godide tiąlubo kolesaga yaligo te po dabolo me ola mabo dao.

Bugagia Bidibo Kolesagade Po Asęai Buku 29:27

Te doloba pai kolesaga ebo bidi dabego te dwai kolesaga ebo bidi dabe wei homu me egobeo. Tama te dwai kolesaga ebo bidi dabego te wiegi yai doloba pai kolesaga wali pabo bidi dabe wei homu mu me egobeo.

Tigidali Nai Gagalama Nigali Side 4:25

Te nosali Adam aga we dali ma piai. Tama wego ogwa ame nobaso, tama te po wai, “Te Godigo enabolo te gasa wai te Abel bidali hasegelama mani, te Keingo aga ela muani.” Tialima, agai te wai nogi Set poai.

Jutgo Asęani Pas 1:11

Augwali hobedagia bidibao. Augwali te polobadu mu bidali dwai sę yali bage tiwai ebo dao. Te polobadu bidali bidi nogi Kein, te Adam aga ogwa, te bidi aga pali dwai tų te augwali megi te tųdu bilibo dao. Tama te dwai bidi me aga nogi Balam, agai yali sę tiwai eyu, tama augwaligo masigi sabo pesą eyu, gasa we bidibolo dwai sę yabo po hwa po mabo po wabo dao. Tama augwaligo te polobadu bidali bidi me nogi Kora agai yali sę tiwai ebo dao. Te bidi Kora agai te Godigo wali po odobo hagela eyu, tama te po sela sąbaso, nosali dene mu sai. Tama e bidi dabe me augwaligo te tobage po sela sąbo kolesaga ebaso, tama augwali me mu doloyu hagawaibao.

Dwagi Yai Gesi Po Lukgo Asęani 11:51

Polobadu augwaligo te Godigo po pusa mani profet dabe ela muani. Te bidi me nogi Abel elali. Te sogode gagalasa elala asali, te siminagasu, te bidi Sekaraia ela muani. Te bidi Sekaraia te Moni Lotu Be tempel tomoba pelama, dolalugi pali. Aga te Godibolo nai ula mabo sia nogobo alta pesage pagede bidali. Te habu mu selali pesage si tomo agebelede bidibadi yaide, augwaligo aga ela muani. Te tiali pode eno mu tama obe dao. Te tiali wei siyu megi bidibo we bidi dabe augwali moni dene mu saibao.

Matyu 23:35

Tama tibaso, te doloba pai bidi dabe augwali e tǫde bidaluali, tama te bidi dabego augwali ela silalio, te sęgę dugade naga elaluaibao. Augwaligo te doloba pai bidi dabe ela silali, te wiegi yai bidi Abel gagalasa pelama, te Sekaraia teba usu nigi palio, te Berekiago ogwa, aga dagego te Moni Lotu Be tempel tomode ela muani, te dwasianu be dąį togali me te ofa muabo sai te si tomode dagego Sekaraia ela muani.

Bugagia Bidibo Kolesagade Po Asęai Buku 29:10

Te gasa bidi ela mubo bidi, agai te doloba pai kolesaga ebo bidi dabe te wei homu mu me egobeo. Tiali goli, te doloba pai kolesaga ebo bidi dabego homugo da, te gasa doloba pai kolesaga ebo bidi dabe te bugagia bidimainu homu eyu, augwali seselalubo sę ebo dao.

1 Pita 4:4

Tiali goli megi te dagego polobadu abagi dabe augwaligo dagede noma siyu bidibao. Dage augwali dali kisasa biliyu, tama bomo eyu, te haniani dwai dwai sę ela bilisąbaso, tama augwali noma siyu, dage dali te nogi posobo dwai po augwaligo wabo dao.

Hibru 12:24

Tama dage Jisasba asai dao. Godigo da we bidi tau sabo po olama dąų walali. Tama te dąų wali tau sabo po dabolo waselemainogo eyu Godigo Jisas tagala palali, tama aga tomode bidiyu te dąų wali tau sabo po dodolali. Te polobadu bidai bidi Abel aga amago aga ela mubaso, aga gelali kanemego “Boi yao, boi yao,” po wali tiwai bidai. Tiali goli Jisasgo kaneme te dago sali dwai sęgę te sela sąbo kaneme dao, te boi ilabo kaneme meni. Tama teba me dage asai dao.

Godigo Nogi Ugwaba Sabo Tęąbi Po Wabo Buku Dabe 38:20

Eno dwagi yai kolesaga augwaliba ebadi, tiali goli augwaligo enaba dwai kolesaga wei ponoyu yai. Eno te wiegi yai kolesaga wali pobadi, tama tede augwaligo homu koneama, tama enade augwa boi bidi pedelali.

Godigo Nogi Ugwaba Sabo Tęąbi Po Wabo Buku Dabe 37:12

Te dwai sę ebo bidigo te wiegi yai bidi dolabo homu eyu, te wado po wabo dao.

1 Jon 3:8

Niwai bidigo dwai sę idu bidibo, te bidi Satango hani bidi dao. Magi baso meni, te Godigo tigidali nai nigisiąbadi, polobadu mu Satango dwai sę ebo gagalama, tama eyu, tama megi me aga tama tibo dao. Tama agai te Satango we bidi tomode ebo dwai kolesaga ela silimainogo te Godigo Ogwa aga hania pedalai.

Godigo Sęba Tagala Palai Bidigo Po 7:52

Polobadu duga wąį dabe augwaligo Godigo dwagi yai po pusa mabo bidi dabe tigidali ela silali. Me deli bidibawe? Mu menio. Polobadu mu Godigo dwagi yai po odasa pabo bidi dabe augwaligo te po wai, ‘Nosali God agai dwagi yai dolo sę ebo bidi asaibao.’ Tialima, duga wąį dabe augwaligo te po odasa pabo bidi dabe ela muani. Megi tama dagego te Godigo dwagi yai dolo sę ebo bidi ela muai.

Dwagi Yai Gesi Po Jongo Asęani 10:32

Jisasgo augwalibolo te po wai, “Eno dagebolo Ayago dwagi yai bomo yai sę hauwa ola mawai dao. Tama dagego eno te yali sęde dwai sę me deli ebo sulama, tama dagego te homu eyu, ena masigi sąnama elainogo ebawe?” Jisasgo augwali dali te po wai.

Matyu 27:23

Tama Pailatgo te po wali, “Magi basowe? Agai magi dwai sę yaliwe?” Tiali goli augwaligo bomonama ma i wali, “Ni pedaide aga elao,” wali.

Matyu 13:38

Tama te nai ge tedelalo pali gi da, te e tǫ dao. Tama te wiegi yai nai ge da, te Godigo obo tomode bidibo we bidi dao. Tama dwai noswai da, te Satango we bidi dabe dao.

Matyu 13:19

Te Godigo we bidi tonalubo kolesagade po wabo odobo digi te po page koneyu dąų wasiąwai bidi, te bidi te aga da te soabo tųba olo tudulaluali nai wai ge tiwai dao. Tama te Satan agaba aselama, tama polo te po Godigo aga homuba budali po te Satango te dagala sabo dao.

Kraisgo Geme Dualali Sę Pedelabo Po Jonbolo Ola Mani 17:6

Tama te we agai te Godigo po wali pabo we bidi augwali dali te Jisasde homu kęą pai we bidi dali augwali te wego ela munama, tama eno suali te wego augwali kaneme tulama te kolesaga meni yai bidi tiwai aga yai. Eno te sulama, ena noma mu siyu, tama eno homu hauwa mu yai.

1 Tesalonaika 2:14

Dago ama dabe, dage augwali tiwai dao. Augwali te Jisasde homu dąų obaso, te Juda bage mebago hagela ebaso, augwali dene mawai. Tama te tiwai dage me duga hanigo nogode dene sai dao.

2 Samuel 13:22

Tama Apsalomgo me te Amnon dali haliga sębę mu elama, tama aga godolo me ebeo, magi baso meni, Amnongo te dwai kolesaga agai abeba yali, Tamarba. Tama tiyu, Apsalomgo te mena sę yabo po deli me te Amnon dali po munu me ma mibeo.

Bugagia Bidibo Kolesagade Po Asęai Buku 27:4

Te haliga sębę elama, te wado po wabo bidigo te gasa bidi dabeba odolali te dene mayu, tama augwaliba dwai sę mu ilibo dao. Tiali goli, te mena nai sabo homu eyu, tama te gasa bidiba dwai haliga ebo, te dwai mu elama, tama te haliga sębę me wado po wabo kolesaga aiyaba elalubo dao.

Matyu 5:37

Tama dagego ‘Awe’ obaso da, teda ‘Awe’ naga waiyąo. Me ma, dagego ‘Menio’ obaso da, teda ‘Menio’ naga waiyąo. Teda usu yaibao. Tiali goli dagego duga wabo po mu dąų omainogo te gasa po me obaso da, te po te dwai bidi Satan aga te po page bidi dao,” Jisasgo te po wai.

Dwagi Yai Gesi Po Jongo Asęani 8:40

Eno dage dali wabo po te eno Godigo mu po eno odolama, te po naga dagebolo wabo dao. Tialima, dagego ena elainogo ebao. Abraham agai tama tiwai menio.

Dwagi Yai Gesi Po Jongo Asęani 8:41

Dagego duga ayago yali kolesaga megi ebao,” Jisasgo te po wai. Augwaligo Jisasbolo te po wai, “Dago idago da penani elama, da ame nai menio. Dago aya deli te God dao,” te Juda bagego te po wai, Jisas dali.