Te Israel me Juda Hani Sigo Tuni Bidigo Po Elalubo Buku Deli 7:23 - Godigo dwagi yai po buku23 Te Huramgo te genuai tank ąį deli te brasgo nigali. Te tank ugwadu daide usu sali, te 2 mita me 20 sentimita, tama te dedage usu sali, te 4 mita me 40 sentimita, tama aga tigi genuai yali, te 13 me hap teba usu nigi pai. Gade chapit la |
Tama te Babilon hani bidi dabe augwaligo te Genuai Bidigo tempel beba pelama, tama augwaligo te brasgo nigali moni pos si me, tama me te bidi dabego te bras selama, nogogo nigali wilkar dabe me, tama te wę tubo dwasianu tank te wilkar ugwadu daide muani nai dabe me tigidali, te augwaligo auluama sąyani, tama augwaligo te tigidali te bras dabe te Babilon buluba selasa pali.
Tama te Babilon dabe te Genuai Bidigo genuai tempel beba pelama, te brasgo nigai genuai bobobage pos si tologali, te bidi dabego brasgo nigai wilkar te ąį ugwadu daide pobegabo nigali nai elaluali me tologolama, sali. Te genuai ąį sabo nai augwaligo te brasgo nigali nai me tologali. Tama augwa te bras tigidali te Babilonba sela pai dao.
Polobadu te king Solomongo sę bidi dabego te bras selama, te genuai bobobage pos si nigali, te genuai tang wę nigilama, tama te nogo si olama, sągągo si bulmakau piksa dabe nigilama, te genuai ąį tang dologode elaluali te dwasianu daide ugwadu muabo nai wilkar elaluai. Te Solomongo po obaso, augwaligo te nai dabe Genuai Bidigo beba muani, polobadu mu. Tialima, megi da, te Babilon dabego te nai dabe alulama, te nai nigali bras sainogo tiali. Te brasgo sęgę te genuai mu, te bidigo skel me egobeo.
Tama nosali te king Ahasgo te aga sę ebo bidi dabebolo te po olama, tama augwali Genuai Bidigo tempel be obo banis tomoba pelama, tama augwaligo te wilkar dabe aluali, polobadu te king Solomongo sę ebo bidi dabego te brasgo nigai nai dabe da. Tama augwaligo te wę tubo tank dabe te wilkar ugwadu daide muani tank ąį me sali. Tama me te augwaligo te brasgo nigai bulmakau noma dabe te genuai ąį tubo tank te dologo badu elaluali nai me sali. Tama nosali augwaligo te masigi dabe selama, tama te gesi bet sai yali, te genuai ąį tubo tank muabo bet sai nigali.
Tama te king Ahasgo te pris bidi Uriabolo e tama po wali, “Tigidali sogo nago te ofa nai ulainu da, teda nago te gesi alta saiba naga pelama, ofa nai ulao. Tigidali sogo te kigamu naga nago te isigo dela pabo ofa nai naga uluyu, me te tigidali sogo te pio naga te sia gagawai nai te witgo naga ofa nai ulao. Tama nago te king bidigo ofa nai ula mayu, tama te tigidali we bidigo ofa nai uluyu yao,” po wali. “Te ofa te tigidali te siaba sese ula palobo ofa nai da, tama me te sia gagawai nai witgo ula mabo ofa nai da. Tama me te nago te gasa ofa ebo te we bidi dabe ofa tama yao,” wali, “te ofa te nago te wain wę gelao. Tama nago te tigidali hasa kaneme selama, te ofa elama, tama te gesi alta saiba segeni sąsąga pao. Tiali goli, te brasgo te nigali te alta sai, te ena naga dao. Te alta sai eno naga dolaluabo page te eno Godibolo hanaluama, tama agai enabolo te tigidali sę eno yabo sę te agai mobogo te eno mobo ola momainao,” te po wali.
“Magi baso meni. King Nebukatnesar te Jerusalemba aselama, te king Jehoiakin sali, te Jehoiakimgo ogwa, tama agai te Juda tobolu bidi dabe me, te Jerusalem tobolu bidi dabe me selama, tama agai augwali Babilonba kalabus igi peyu odasa pali. Tialima, agai te wiegi yai nai meba te Jerusalemde elalumainu yalio. Agai te brasgo nigali genuai pos dabe sabeo, tama augwa te brasgo nigai tang ąį tubo genuai nai me sabe, tama augwa te brasgo nigai te dwasianu ąį tubo tang dabe gasaba bilabo nai dabe, te me sabeo. Tama me agai te eno bede gasa nai dabe me sabeo, te kingo bede me, te tigidali Jerusalem pedai badu elaluali nai me sabeo. Tialima, ena God, dage Israelgo Genuai Bidi, ena Tigidali Bomo Elalubo Genuai Bidigo, eno te tiwai po dageba wabo dao.