Te Israel me Juda Hani Sigo Tuni Bidigo Po Elalubo Buku Deli 5:9 - Godigo dwagi yai po buku

⁹ “Te eno sę bidi dabego te Lebanonde te ni dabe togolama, tama te nabis wę saneba sela dulaibao,” wali. “Tama augwa te ni dabe te tamu ąįba sisinigi pelama, tama bonogo bomonama kęnama, seseba dabe nigilama, tama te augwaligo nageba sesaiba,” wai. “Te augwaligo sela asiyu, te nago mena badu tuagasabo te dąį ilali pesage nabis badu tuagasomainu yaibao. Tama tede, te eno sę bidi dabego te bono dabe pisiginama, tama naga sę bidi dabego te ni dabe somainu yaibao. Te nai me delide eno homugo nago te sę emainu homu ebao. Eno homugo nago te nai dabe tolomainu homu ebao, te ena dali te eno bede bidibo hani dabe dago tuabo nai dao,” Hiramgo te po ola tolali.

Te Israel me Juda Hani Sigo Tuni Bidigo Po Elalubo Buku Deli 5:9 Referans Kwoze

Esekiel 27:17

“Tama Tair. te Juda me Israel dabego nageba te wit hauwa mayu, te pusu nai hani, me te ni oliv wel, me te tobage gasagi yai marasin, me gasa nai dabe mobadi yali, te augwaligo nagede sabo nai dobu si abeleyu, tama tiai dao.

Esra 3:7

Te Sairus te Persia tuni bidi kingo te Israel dabebolo te ni bǫ dabe te Lebanon tǫde sao po usu da po walio. Tama te we bidi dabego te nai mayu, te ni oliv du wel me te augwa tobolu bidi dabeba menama, tama augwaligo te bidi dabe te taun Tair me Saidonba tagala palama, te Lebanon dabego ni bǫ abelimainu yai. Tama te Lebanon dabego te ni dabe te tamu węba munama, tama te tamu węgo tolasa aselama, te Jopa taunba homugi palio. Tama me, te Israel dabego te mone te tobolu bidi dabeba menama, te masigi togobo sę ebo bidi me te kapenda bidi dabe te monego abelimainu tiai dao.

Godigo Sęba Tagala Palai Bidigo Po 12:20

Te nosali Herotgo te Tair bidi dali, te Saidon bidi dali, te bulu si bidi dabe dali agai moni sębę yai. Tama tibaso, tigidali sisinama, aga sugi pali. Hasia bolo augwaligo te Herotgo be tonalubo sę ebo bidi deli suali, agai nogi Blastas. Augwaligo te bidi ‘Abagi mu’ wali. Tama augwaligo agabolo hanalu wali, “Te Herotgo wado po mena tama isilaibawe?” Tama nosali augwali te Herot pageba pelama, te po wai, “Te dago nai abelebo nago bulude naga dago nai abelama, tubo dao. Tama tibaso, dago te hwįbo sę tagalinao,” wali.

Tuni Bidi Dabego Po Elalubo Buku Si 2:16

Tama eno sę bidi dabe te Lebanonba pelama, tama nago te wei ebo ni dabe tigidali geligi paibao, tama augwaligo nabisba aiyaba selasa paibao. Tama augwaligo te ni dabe tamu węde sisinama, tama dąų olama, genuai ni seseba dabe nigiyu kęnaibao. Tama hanu Jopaba te tamu ąįdu tama selasa paibao. Tialima, nago sę bidi dabego te ni dabe te hanu Jopade selama, Jerusalemba ugwa sela holaibao,” te king Hiramgo Solomonbolo te po wei ponoyu asęna tolali.

Tuni Bidi Dabego Po Elalubo Buku Si 1:15

Tama te Solomon aga king bidali sogo agai te silva me gol me wiegi yai ni bǫ hauwa mu te Jerusalemba sesali. Tama tialima te sogo silva me gol hauwa mu elaluali, te olo masigi dabe tiwai yali gilama. Me te ni bǫ hauwa mu elaluali, te olo ni dabe te Israel dabego dwasianu bulu du dabede elalua pabo ni dabe yali gilama tama elaluali.

Bomai Po 3:25

Megi eno homugo nago ena te Jordan ąį nogelama, u badu pomainogo yao. Tama eno te wiegi yai ili yai tǫ me, wiegi yai bulu du me, te Lebanon bulu du me sugi pomainogo yao,’ eno tama po wali.”

Te Israel me Juda Hani Sigo Tuni Bidigo Po Elalubo Buku Deli 5:8

Tialima Hiramgo Solomonba te tiwai po ola tolai, “Eno nago po odama, tama eno tede usu da wai. Tama eno te ni bǫ dabe me te ni wuli dabe te nageba tolaibao,” wai.

Te Israel me Juda Hani Sigo Tuni Bidigo Po Elalubo Buku Deli 5:10

Tama tialima, Hiramgo te ni bǫ me wuli te hauwa mu te Solomonba tolali, te Solomongo dąį ilali namba usu nama tama tolai dao.

Te Israel me Juda Hani Sigo Tuni Bidigo Po Elalubo Buku Deli 9:27

Tama king Hiramgo te agai wiegi yai boskru meba te Solomongo boskru dabe dali te sipde sę emainu tagala palalio.

Te Israel me Juda Hani Sigo Tuni Bidigo Po Elalubo Buku Deli 3:12

Tama tiyu, te mu tama, nago enaba te hanalu wali nai te eno nage mawaibao,” wali. “Megi da, te eno nagebolo te konebo wiegi yai homu kolesaga hauwa mawaibao,” po wai. “Polobadu te bidi me deligo te tobage kolesaga koneai me elalubeo, tama te nosali me te bidi me deligo nago te koneani kolesaga tobage tiwai te bidi mego sogobeo.

Te Israel me Juda Hani Sigo Tuni Bidigo Po Elalubo Buku Deli 4:20

Te Juda me Israel we bidi dabe augwali te genuai hani mu bidali, te nabisde te masigi kemi sane gisiga sąwai tiwai usu nama te tiwai yali. Augwali te bugagia bidiyu, tama augwa te nai me wę te elaluyu, tama augwa wiegi yai homu pemene eyu bidali.

Tuni Bidi Dabego Po Elalubo Buku Si 9:22

King Solomongo mone hauwa elaluyu, me haniani wiegi yai nai dabe hauwa mu elaluyu yali. Tama me agai wiegi yai homu kolesaga me kolesaga hauwa mu elaluali. Agai gasa tigidali kantri king dabe edelai mu elaluali.

Jopgo Po Asęani Elalubo Buku 32:8

Tiali goli, bidi mego kibu be hauwa elama, dwagi yai homu kolesaga agai naga elalugobeo. Menio. Tigidali Bomo Elalubo Godigo Mobo Bidi daba aselama, da dwagi yai homu kolesaga dabe mabo dao. Tama tibaso, polo monu dabego naga te dwagi yai kolesaga dali, dwai kolesaga dali si dagalogobeo.

Kolesaga Koneai Bidigo Pusali Po Elalubo Buku 1:16

Eno te tama homu yali, eno te genuai homu kolesaga mu koneani, tama te polobadu Jerusalemde king bidali bidi dabego koneani homu kolesaga tigidali aiyaba elaluali. Eno wiegi yai homu kolesaga mu koneai dao.