Tuni Bidi Dabego Po Elalubo Buku Deli 29:10 - Godigo dwagi yai po buku

¹⁰ Tialima te tigidali we bidigo gedude Devitgo te Genuai Bidigo nogi ugwaba siyu, tama agai gedu haluasa po te tiwai wali, “O Genuai Bidio, nage dago wąį nǫų Jekopgo God da, da naga we bidi dabego te sesemane sogo nago nogi ugwaba sidueibao,” walio.

Tuni Bidi Dabego Po Elalubo Buku Deli 29:10 Referans Kwoze

Efesus 1:3

Dago Godibolo usu da po weyu, agai nogi ugwaba sao. Aga dago Genuai Bidi Jisas Kraisgo Aya dao, agai God dao. Tama da te Krais dali wadolama, tama te da we bidigo gedugo susiąbo bomo elalubo naide, te tobage naide Godigo wiegi yai homu ilibo sę tigidali da dali yai dao. Agai te dago homu noma bidi tau somainogo eyu te wiegi yai homu ilibo sę yai dao.

Kraisgo Geme Dualali Sę Pedelabo Po Jonbolo Ola Mani 5:12

Tama dolaluyu, tama augwaligo i bomonama weyu, e tama balia wai, “Te kibu sipsip wai polobadu augwaligo ela mubaso, agai te tigidali nai tonalubo bomo mu sabo usu eyu, tama te tigidali wiegi yai nai me, te wiegi yai homu kolesaga me, tama te tigidali genuai bomo agade usu elalubo dao. Tama aga nogi te tigidali bidigo ugwaba sabo te usu da, tama ula yai bomo agabolo mabo me, te usu dao, te agabolo genuai nogi mabo me te usu dao.”

1 Pita 1:3

Te dago dena Genuai Bidi Jisas Kraisgo Aya God aga nogi dago ugwaba sinao. Agai da moni homu dene mu eyu, tama da tau somainogo, agai Jisas Krais te isai bidi dabe bidibo digi tomodu ma hodolali. Tebogo dabolo te gesi noma ula mawai. Tama menama, da dwagi yai homu eyu, bugagia tonaluyu bidalubao.

2 Timoti 1:17

Tama tibaso, eno agai ena dali yali sęde homugo kone paluyu, tama aga genuai nogi me aga wiegi yai ula yai bomo me te si ugwaba muyu, tama eno e po obao: “Aga te Tuni Bidi tigidali sogo bidibao. Aga me isibo meni, gamonaibao. Tama bidigo aga me subo menio. Agaduba deli naga te God mu dao. Genuai nogi me bomo me te agade sesemane sogo mu bidada peyu, bidada pomainao. Mu dao,” eno te po obao.

Polgo Po Pas Rom Dabeba Asęani 1:7

Eno e pas te dage Rom moni hanude bidibo we bidibolo asęna tolobao. Dage Rom bage, te God agai dage dali dwagi yai homu eyu, godolo eyu elama, tama dage te aga we bidi mu bidimainogo eyu agai dage i wali. Tama eno homugo dago Aya God dali, Genuai Bidi Jisas Krais dali sigo te dage dali te olo mu tau sabo kolesagago eyu tama dage homu wiegi yai ilama dage dua bugagia bidaibao.

2 Tesalonaika 2:16

Te dago Aya God agai da dali dwagi yai homu eyu, da godolo mu ebo dao. Tama tiyu, agai da olo mu tau siyu, dago homu kolesaga dwagi yai eyu, sesemane sogo bidada paibao. Tama agai da olo mu tau siyu, tama Godigo da nosali bugagia bidimainogo yaibao, da tonaluyu bidibo dao. Tama dago homugo dago Aya God dali, dago Genuai Bidi Jisas Krais dali, augwali sigo dagego homu kolesaga bomo dąų walomainao, tama dage tau sao, dagego tigidali dwagi yai kolesaga eyu, tama dwagi yai po naga omainogo yao. Dago homugo tama timainogo ebao, tama tibaso dago gedu haluasa po obao.

Filipai 4:20

Eno homugo da tigidaligo dena Aya Godigo bomo yai ula elalubo nogi sesemane sogo uganu sao, bidada peyu, bidada pabo sogo tama yao. Te mu tama dao.

Polgo Po Pas Rom Dabeba Asęani 8:15

Magi baso meni, te Godigo dagebolo mani Mobo Bidi da, te dage olo sę ebo bidi bidiyu God ma wi ilibo Mobo Bidi meni. Te menio. Te mani Mobo Bidigo dage Godigo wai dabe ilibo Mobo Bidi dao. Te Tedali Mobo Bidigo dago i olama tama Godibolo “Aya, Aya” wabo dao.

Dwagi Yai Gesi Po Lukgo Asęani 11:3

Da bidibo dononama dago homugo tubo nai mao.

Matyu 6:9

Tama dagego gedu haluasa po e tama wao, ‘Dago Aya, nage dagalude bidibo bidi, dago homugo nago nogi wiegi yai tedali mu bideibao.

Esekiel 3:12

Nosali Godigo Mobo Noma Bidigo ena ugaba sagoasa holali. Te ena tudi badu, te pedauwali me delidu te tiwai i bomonama wabo odali, “Genuai ula me bomo te dagalude bidibo Genuai Bidi elalubao. Te aga nogi ugaba sao,” walio.

Aisaia 63:16

Tiali, nage te dago aya dao. Te da bulai wąį monu aya, Abraham me Jekop augwali te da dali me bidibe, te augwaligo da konesiąwai. Tialima, nage Genuai Bidi, nage dago aya mu dao. Tama nago nogi te tiwai elalubao, “Te da tudibadu tonalu, polobadu digi tau sesa asali bidi dao.”

Godigo Nogi Ugwaba Sabo Tęąbi Po Wabo Buku Dabe 146:2

Te ena tǫde bidibo tigidali sogo, te eno aga nogi ugwaba saibao. Te eno ena Godigo nogi ugwaba sabo balia po odubadi, te ena isiboba usu nigi paibao.

Godigo Nogi Ugwaba Sabo Tęąbi Po Wabo Buku Dabe 138:1

Genuai Bidi, te eno haliga tigidali mugo nageba usu da obao. Te tigidali tibo godigo gedude te eno nago nogi ugwaba sabo tęąbi po obao.

Godigo Nogi Ugwaba Sabo Tęąbi Po Wabo Buku Dabe 89:52

Dago te Genuai Bidigo nogi te sesemane bidada pabo sogo ugwaba sao. Te mu tama dao.

Te Israel me Juda Hani Sigo Tuni Bidigo Po Elalubo Buku Deli 8:15

Tialima, agai te tama po wali, “Te Godigo nogi ugwaba sao,” wali, “te Israel dabe dago Genuai Bidi dao. Magi baso meni. Aga digi agai te eno aya Devit dali dąų wali po te bugagia wali pali. Devitgo homugo te we bidi God pąba sisinagasabo be me deli sę emainu homu yai, te dago Genuai Bidi, te agaba lotu po omainu yali. Tiali goli, Genuai Bidigo agabolo te tama po wai, ‘Te eno ena we bidi te Isipde gagalasa sela asali, te megi sogoba usu nagasu, eno te Israel dabe augwaligo enaba lotu omainu ebo be sę yabo te hani me deligo hanu me deli te eno sa me musiąwai dao. Tiali goli, Devit, eno nage sa muani, te eno we bidi nago tonalumainu yali. Nago te eno genuai be me deli sę yabo homu ebo, tama nago te ebo homu te wiegi yai homu dao.

Tigidali Nai Gagalama Nigali Side 33:20

Tama agai te alta me deli tede dodolali. Tama agai te alta nogi te tiwai poali, “Te Israelgo God da, te bomo yai God mu dao,” te nogi poali.

Tigidali Nai Gagalama Nigali Side 32:28

Tialima, te bidigo te po wai, “Megi da, nago nogi te Jekop ma wagobeo. Nago te God dali hwįani, tama bidi dali me hwįai, tama nago nogi ugwaba sali. Tialima, nago gesi nogi te Israel dao.”

Tuni Bidi Dabego Po Elalubo Buku Si 6:4

Tialima agai augwalibolo e tama po walali, “Genuai Bidigo nogi ugwaba siąo, te Israel dabe dena God dao. Agai eno aya Devit dali dąų walali po wali palio. Devitgo homugo te Godigo be me deli sęnama, tama te we bidi te beba pąba aselama, tama Genuai Bidi dago Godiba asomainao homu yali, te agaba lotu po weyu yainogo homu yali. Tiali goli Genuai Bidigo Devitbolo e tiwai po walali, ‘Te ena we bidi Isip bulude odasa asalidu gagalasa aselama, megiba usu nagasali side, eno te Israel dabego eno nogi elalubo tempel be me sę emainogo te hanu me sa muai menio. Tama me ma, eno te bidi mego eno we bidi tonalumainogo sa me muai menio. Menio. Tiali goli megi da, eno hanu Jerusalem eno te we bidi augwali aselama, enaba lotu wagasiyu yabo pesage te sa mubao. Tama Devit nage eno we bidi tonalumainu sa mubao. Tama eno koneani, nago eno genuai tempel be me deli sę yabo homu ebo suali, tama nago te homu yali te wiegi yai dao.

Tuni Bidi Dabego Po Elalubo Buku Deli 29:20

Tialima Devitgo te we bidi augwaliba te tiwai po walio, “Godigo nogi ugwaba sao, dago Genuai Bidi dao.” Te we bidi augwaligo odama, te augwa kidu sugunama, te gesabidi tǫba pǫgulali, te genuai nogi Devitba me Godiba mayu tialio, te augwaligo Genuai Bidi me augwa wąį nǫų dabego Genuai Bidi me dao.

Tuni Bidi Dabego Po Elalubo Buku Deli 29:9

Te we bidi augwaligo te augwa polalubo tobolu bidi dabego augwa haliga hogodama, te augwa wiegi yai nai mabo sulama, te augwa wiegi yai pemene umabo mu yalio. Tama king Devit me wiegi yai pemene umabo mu yalio.

Tuni Bidi Dabego Po Elalubo Buku Deli 29:11

“Nago tigidali bomo kolesaga mu elalubao. Nago nogi genuai elalu, te nage ugwadu mu bidibao. Nage mu polalubao. Magi baso meni, tigidali dagalude me tǫde elalubo nai tigidali te nago nigai nai naga elalubao. Tama nage te tigidali naigo tuni bidi king bidibao.

Bomai Po 32:3

Tama tialima, eno Genuai Bidigo nogi ugwaba saibao, tama dagego agai nogi haninaibao.

Tuni Bidi Dabego Po Elalubo Buku Si 31:8

Tama nosali Hesekia me te tobolu bidi dabe augwaligo te nai dabe sugi pali, te we bidigo sesali nai dabe, tama augwaligo Genuai Bidigo nogi ugwaba siyu elama, tama augwaligo te Israel we bidi dabe dali wiegi yai homu pemene yali.

Esra 7:27

Ena Esra dao, eno te pas nedelama, tama eno e tiwai po obao, “Eno homu wiegi yai pemene eyu, tama Godiba usu da po obao, te dago wąį nǫų dabego Genuai Bidi dao. Magi baso meni, Godigo te kingo homu hodolobaso, tama kingo te Genuai Bidigo be Jerusalemde dwagi yai ilaibao po walio.

Nehemia 8:6

Tama Esrago te po wai, “Te Genuai Bidi nogi ugwaba sao. Agai te bomai God mu dao.” Tama tigidali we bidigo augwa nogo ugwaba selama, te tiwai po wali, “Mu da, mu dao,” wai. Tama tigidaligo kidu sugunu gulama, tama augwa tobolu tǫba basi gulama, tama augwa te Genuai Bidiba lotu po wai dao.

Godigo Nogi Ugwaba Sabo Tęąbi Po Wabo Buku Dabe 22:26

Te magi nai doado bage meni yai bidi augwali eno i obaso, augwali aselama, te nai tulama, haliga mu pągąna paibao. Tama te Godiba pabo bidi dabego, teda augwaligo aga nogi ugwaba saibao. Eno homugo Godigo augwali sesemane sogo bugagia wiegi yai ilama, bidimainu yao.

Godigo Nogi Ugwaba Sabo Tęąbi Po Wabo Buku Dabe 57:6

Te boi bidi dabego ena tola somainu ebo bono gągą muani. Tama tiyu, genuai sęgęgo ena aiyaba mu elaluai. Augwaligo eno sunumide te tǫ dedage dogolama, teba ena tula mumainu yai. Tiali goli, ena tula mubeo. Augwa digi te dedageba ma tulaluali.

Daniel 2:20

tama te tiwai po wai, “God, eno nago nogi sesemane sogo ugwaba saibao. Tigidali bomo me koneani kolesaga te nagede naga elalubao.

Daniel 4:34

“Te kibu be a naga me si wali silibo sogo da, ena Nebukatnesar, eno te dagaluba ugwa tonaluama, tama eno homu kolesaga te wiegi yai ma pedelai. Tama eno wiegi yai homu pemene te Ugwadu Bidibo Godiba mu yalio. Te sesemane bidada pidu bidibo God, tama eno aga nogi ugwaba mu siyu, kekene nanio. Tama eno te tama po wai, ‘God te king sesemane sogo bidada peyu, bidibo dao.