Tuni Bidi Dabego Po Elalubo Buku Deli 26:26 - Godigo dwagi yai po buku

²⁶ Selomit aga deli hani bage dali te wiegi wiegi yai nai dabe te bidi dabego Godiba dąį ilama te Genuai Bidigo beba muani nai dabe tonaluali. Te wiegi yai nai dabe da, te king Devit me augwa tobolu bidi dabe me te deli hani sibi te ami ofisa dabe, augwali tigidaligo te wiegi yai nai dabe te Godiba dąį ilai dao.

Tuni Bidi Dabego Po Elalubo Buku Deli 26:26 Referans Kwoze

2 Samuel 8:11

Devitgo te wiegi yai homu eyu magasobo nai dabe selama, tama God Genuai Bidiba sa munani. Te agai gasa boi bidi dabe aiyaba elaluama, te sali gol me silvade te tobage kolesaga yali tiwai gilama yalio.

Tuni Bidi Dabego Po Elalubo Buku Deli 22:14

“Ena te sę dene mu elama, te tama nai sisinani, te 3,500 ton golgo sęgę, me te 35,000 ton silva, te tama sęgę elalubo nai sisinani, te Genuai Bidigo be sę yabo nai da. Tama eno te ain me bras hauwa umabo sisinani, te nai dabego sęgę te bidi dabego te skel ebaso usu egobeo. Tama me, eno te ni dabe me masigi dabe sisinani, tiali goli te nago umabo mu ma sao.” Devitgo te po Solomon dali wai dao.

Tuni Bidi Dabego Po Elalubo Buku Deli 18:11

Devitgo te Toigo wiegi yai homu eyu mani nai dabe agai te Genuai Bidiba dąį ilama manio. Agai te tobage deli kolesaga te agai gasa boi bidi dabe elaluama sali silva me gol te Genuai Bidiba naga mawai, te Idom dabe, me Moap dabe, me Amon dabe, me Filistia dabe, me Amalek dabe, te hani augwali Devitgo aiyaba elaluai dao.

Tuni Bidi Dabego Po Elalubo Buku Deli 26:25

Sebuelgo ama deli bidali, aga nogi da Selomit. Selomit aga te Eliesergo hanigo ogwa, te Gersomgo ogwa. Elieser aga te Rehabiago aya, te Rehabia Jesaiago aya, tama Jesaia te Joramgo aya, te Joram da Sikrigo aya, tama Sikri te Selomitgo aya dao.

Tuni Bidi Dabego Po Elalubo Buku Deli 26:27

Te augwaligo boi bidi dabe aiyaba elaluali sogo, augwaligo te boi bidi dabego wiegi yai nai hauwa salio. Tama nosali augwaligo te nai meba te Godigo nai da olama sa munama, tama te Genuai Bidigo beba sela asalio. Nosali me sogo augwaligo te moni tempel bede ma geselebo sę elalubaso da, teda teba muani naigo augwaligo te sę ebo abelaibao homu yali.

Tuni Bidi Dabego Po Elalubo Buku Deli 9:14

Te Livai meba te tobolu bidi augwa hani dabede bidali. Tobolu bidi me deli te Semaia, te Hasupgo ogwa. Te Hasup Asrikamgo ogwa, tama Asrikam te Hasabiago ogwa da. Te hani bidi dabe augwali te Merari hani dao.

Tuni Bidi Dabego Po Elalubo Buku Deli 28:21

Dago te pris hani dabe me te Livai dabe te Godigo bede te tobage tigidali sę yabo bage dąį ilalio. Te haniani sę ebo page koneai bidi dabe augwaligo nage tau sainu tonalubao. Tama me te polalubo bidi dabe, me te tigidali we bidi dabego dali, augwaligo te nago po tigidali wali pabo dola sai naga elalubao,” Devitgo te po aga ogwa Solomon dali wai dao.

Tuni Bidi Dabego Po Elalubo Buku Si 23:8

Tialima te Livai dabe me te Juda bidi augwaligo te Jehoiadago po wali pali, tama te dei Sabatde te ofisa dabe augwaligo te sę silama toma tuainu soabo bidi dabe siyu, me augwali hasegelama sęba painu ebo bidi dabe me siyu, tama augwaligo te bage sese tama odasa asali. Magi baso meni. Jehoiadago augwali te sę silama toma tuainu me pelamo po wai.

Tuni Bidi Dabego Po Elalubo Buku Si 31:2

Te king Hesekiago te pris dabe me Livai dabe deli deli haniba dobalama, tama augwalibolo te polobadu pris dabe me Livai dabego yali sę tiwai yao po wali. Augwaligo e tobage sę elaluali. Augwaligo te isigo mu dela silibo ofa iyu, me God dali deli homu ebo ofa iyu yabo elaluali. Tama me augwaligo Genuai Bidibolo buba hwi po weyu me agai nogi ugwaba siyu me Genuai Bidigo tempel bede sę dabe hauwa tama iyu yabo elaluali.

Esra 2:42

Te Godigo tempel be tonalubo bidi dabe, augwali te tama hani bage Salum, me Ater, me Talmon, Akup, Hatita me Sobai. Tama augwali te 139 bidi dabe elalualio.

Nehemia 12:45

Te pris me Livai dabego te lotu weyu, te we bidi dabe te Godigo gedude wiegi yai mu pedalabo sę yali, tama te gasa tobage lotu me te Godigo augwaligo emainogo yabo po augwaliba wai. Tama te musik wabo bidi dabe, me te Godigo be tonalubo bidi dabego te augwa sę me yali. Augwaligo te po polobadu te king Devit me te aga ogwa, king Solomon sigo, te hani si augwa wąį nǫų dabebolo te sę mawai dao.