Tuni Bidi Dabego Po Elalubo Buku Deli 18:13 - Godigo dwagi yai po buku

¹³ Tama Abisaigo te Idom bidi hani dabe tonaluabo ami bidi dabe meba muani, tama te Idom dabe augwali Devit dologode bidalio. Te Devitgo boi hwįgi pabo tigidali habuba, te Genuai Bidigo aga tau sobaso, aga ugwanu igulama elaluai dao.

Tuni Bidi Dabego Po Elalubo Buku Deli 18:13 Referans Kwoze

Tuni Bidi Dabego Po Elalubo Buku Deli 18:6

Tama Devitgo aga ami bidi hani dabe meba te tǫ kantri Siriade muani, te augwali tonalu, te augwaligo boi ma hwįdali weyu yalio. Te Siria dabe aga dologode bidu, te Devitba takis mone manio. Te tigidali habuba Devitgo boi hwįgi pabode, Genuai Bidigo aga tau sobaso, te agai bomo ugwanu mu yai dao.

Tigidali Nai Gagalama Nigali Side 27:37

Tama Aisakgo Isogo po wei ponani, “Eno aga te nage tonaluabo bidi ilama, tama eno te aga deli kaneme te tigidali agai sę bidi pedelaibao. Tama eno te nosali pedelabo tubo nai wit me wain te agabolo mani. Megi te mena nai gasa me elalubo weyu, te eno nage momainu te ogwa nago te po obawe?”

2 Korin 11:32

Te polobadu eno Godigo sę edubadi, me sogo ena te Damaskus moni hanude bidibadi, te tobolu bidi me deli aga te tuni bidi Aretas dologode bidali. Tama te tobolu bidi agai te Damaskus hanu buluba pabo tųde tonalubo bidi muani. Agai ena selama kalabus ilainogo yali.

Godigo Nogi Ugwaba Sabo Tęąbi Po Wabo Buku Dabe 144:10

Nago te Israel hanigo king dabe te hwįbode tau siyu, tama augwaligo te boi bidi dabe aiyaba elalubo dao. Tama dwai boi bidigo ena te moni hwągo elidali weyu, nago naga sę bidi, ena Devit, ma sabo dao.

Godigo Nogi Ugwaba Sabo Tęąbi Po Wabo Buku Dabe 121:7

Genuai Bidigo te nage tonalu, tama te dwai naigo nage dolidali weyu tiaibao. Agai nage tonaluaibao.

2 Samuel 23:14

Te sogo Devit te bomai geme dualalubo pesagede bidali, tama te Filistia ami dabego te Betlehem hanu salio.

1 Samuel 14:1

Me sogo side nosali, Jonatango te aga gesi ogwa bidi ami bidi te hwįbo sesemone tolasa bilibo bidibolo te po wai, “Da si te Filistia dabe bidibo pesage, te pedai badu pinao,” wali. Tiali goli, Jonatango te aga aya Solbolo weyu, te aga paiba po me wabeo.

1 Samuel 13:3

Tialima, Jonatan aga ami bidi dabe dali augwaligo te Filistia ami bidi dabe dali te Geba bulude hwįnama, tama augwali aiyaba elaluali. Tama te gasa Filistia dabego te tiali po odama, tama augwaligo te Israel dabe dali wado po wali. Tama tialima, Solgo te bidi meba te Israel tǫ pedai tigidaliba tagala palama, tama augwaligo te biugelgo te Sol tau sagasu hwįabo bidi dabe i ola bilali.

1 Samuel 10:5

“Tama nosali nage te Godigo bulu du te taun Gibea te Filistia dabego ami bidi dabe bidalubo madi teba pao. Tama nage te taun pąba pabo sogo, te nago profet hani me deli augwa te bulu dude te alta tagalama, tama aiyaba dulubadi, te gesabidi deliba ununaibao. Tama augwaligo te tobage gita me, tamborin dabe me, ona elebo me, te tiwai eyu, tama te profetgo kolesaga ebo gilama, te Godigo po pususu paibao.

Israel Hanigo Namba 24:18

Agai te aga boi bidi dabe te Idom bulude dolama, tama augwaligo tǫ saibao. Tama te Israel dabego bomonama, aga Seir boi bidi dabe augwali aiyaba elaluyu yaibao.

Tigidali Nai Gagalama Nigali Side 27:40

Tama nage te bugagia bidiyu, te nai tuabo pesage gegeyu, te nago bainat hwą gego hwįyu, tama yaibao. Tama nage te nago amago sę ebo bidi bidaibao. Tiali goli, nosali nago hagela homu eyu, tama agai po sela sąbaso, tama agai nage ma tola sogobeo,” wali.

Tigidali Nai Gagalama Nigali Side 27:29

Te tigidali bulude bidi dabe te augwali nagede sę ebo bidi pedelama, tama te bidi dabe nage dologode bidaibao. Te nago te naga ama dabe tonaluaibao. Tama nago idago hani wąį dabe augwali te nage dologode bidaibao. Te Godibolo nage dolomainu i wabo bidi dabe, te augwa digi deli deli augwa ma dolomainu yaibao. Tiali goli, te bidi dabego Godiba i olama, te agai nage dali dwagi yai tau sabo sę emainu i wabo bidi dabe, augwali deli deli dali me te agai dwagi yai sę yaibao, te eno homugo te tama elalumainao,” Aisakgo te po wai.

Tigidali Nai Gagalama Nigali Side 25:23

Tama Yawego te tiwai po Rebekabolo wai, “Te bidi hani si te nago haliga tomode bidibao. Te hani bidi si nago ame nainu ebaso, te augwali si dali si ususu si yainu ebao, tama nosali hani si bugulama, tedali bidaibao. Te me hani deligo gasa hani me dali bomo mu yaibao. Tama polasa te ame nabo wai aga te nosali ame nabo waigo sę ebo bidi pedelaibao,” Yawego Rebekabolo te po wei ponani.

Te Israel me Juda Hani Sigo Tuni Bidigo Po Elalubo Buku Deli 11:15

Polobadu, king Devit bidali sogo te Idom dabe dali boi hwįani. Tama Joap, te Israel amide polalubo ofisa bidi, aga te Idomba pelama, te boi hwįyu isali bidi tigidali pubaligi pai.

Tuni Bidi Dabego Po Elalubo Buku Deli 18:12

Tama nosali, Abisai, te Seruiago ogwago, te Devitgo ami bidi dabe selama, te Tamu Hauwa Elalubo Odogo Bulude bidibo Idom dabeba boi hwįgi pali. Tama augwaligo te bidi sese umabo te 18,000 Idom bidi dabe ela muai dao.

Tuni Bidi Dabego Po Elalubo Buku Deli 18:14

Devitgo te tigidali Israel habu badu tonalu, te wiegi yai doloba pai kolesaga tigidali we bidiba yalio.

1 Samuel 18:14

Tiali goli, Genuai Bidi aga dali bidiyu, tama aga tau siyu, tama tigidali sę agai ebo te wiegi yai naga pedelali.