Kana nuaia, tomeqabu adi fata be bwaʼobwaʼo ana ilivuyavo ina vewaiwai vaʼinedi? Vonahaqiaqi, tomeqabu Ieisu ivetumaqanea vonigo tauna Yaubada Natuna adi fata ilivu diavona ina nogedi.
Ta Vale nana ana alamani baʼe: ʼEguma tomotau matadia ʼawauyega una simana ʼifoqe vonigo Ieisu tauna eu Kaiwabu, ta wese ʼeguma giwaliuyega una vetumaqana vonigo Yaubada Ieisu giveyaʼitotoya ʼaligega, e ʼinega Yaubada naʼetoyavuiu.
Ta ada fata be kana alamani aqiaqiea ʼeguma Yaubada ʼinega isimasimana nage gebu, mana ʼeguma taha toga Ieisu Keliso ʼawahaqiaqiea tauna mahalega mai bwaʼobwaʼoya vetomotau otaqa, ʼinega tomotau nana ena veʼita niʼa ʼewea Niboana Gwalagwalana ʼinega.
Ta tomeqabu Yaubada ena luvineavo iʼabiʼabibodedi e taudi Yaubada maega itoatoa, ta wese Yaubada toatoa taudi maega. Ta maʼoda ʼinega kana alamani aqiaqi ʼaiqei Yaubada itaʼa maega katoatoa? Ada fata, mana Niboanina niʼa neida.
Ge taha toga totoa bwaʼobwaʼoya Yaubada daʼitea. Ta ʼeguma itaʼa ma edavo kaveveyoluba aqiaqieda, e ʼinega Yaubada ʼidaya toatoa. Ta ena veyoluba giwalidaya ʼinega ana fata be ena nuenuega navefeweda.
“Ta yavona aqiaqiemi, ʼeguma taha toga tomotau ʼiawadia naʼawahaqiaqiegu, e ʼinega wese yaʼa Tomotau Natuna Yaubada ena tovaleʼewayavo ʼiawadia ena ʼawahaqiaqiea.
Egu vona baʼe simasimatalina, mana ʼeguma taha toga Yaubada Natuna navegeqea, ʼinega ge ana fata be tomotau nana Tamana maega ina veʼaidega. Ta ʼeguma taha toga Keliso naʼawahaqiaqiea vonigo tauna Yaubada Natuna, e ʼinega Tamana Yaubada tomotau nana wese naʼawahaqiaqiea ta ʼaideganaya ina toatoa.
ʼInega yavona aqiaqiemi, lova veʼita Ieisu Keliso Valena weaqina omadunoqolia, ta baʼe Vale nana tuta qabuna ona nuaia ta wese ona kafiʼiʼihia. Mana ʼeguma tuta qabuna Vale nana ona nuaia, ʼinega omiʼa veiaiana aqiaqi ʼinaya ona toatoa Yaubada Natuna maega, ta wese Tamana Yaubada maega.