Yesaya 9:6 - Mandinka Bible

⁶ Diŋo le wuluuta ǹ ye, Alla ye dinkewo le dii ǹ na, aduŋ maraloo be tara la ate le bulu. A be kumandi la Yaamarilaa Ñontaŋo le la, Alla Sembemaa, Badaa-badaa Faamaa, aniŋ Kayira Mansoo.

Yesaya 9:6 Referans Kwoze

Luka 2:11

Bii, ali la Kiisandirilaa wuluuta Mansa Dawuda la wuluu saatewo to. Ate le mu Alimasiihu* ti, Maariyo.

Matiyu 28:18

Yeesu naata ì kaŋ, a diyaamuta ì ye ko, “Kaŋo bee diita nte le la, duniyaa niŋ Arijana.

Yesaya 7:14

Saayiŋ Maariyo faŋo le be taamanseeroo dii la ali la. Ali a juubee, sunkutoo be konoo taa la le, aduŋ a be dinkewo le wuluu la. A be a toolaa la Immanuweli le la.

Matiyu 1:23

“A juubee, sunkutoo be konoo taa la, aduŋ a be dinkewo le wuluu la. Ì be a kumandi la Immanuweli le la, meŋ kotoo mu ‘Alla be ntolu fee le.’ ”

Lankenemoo 19:16

A ye too soto, meŋ be safeeriŋ a la waramboo niŋ a wutoo bala ko, Mansoolu la Mansa aniŋ Maariyolu Maarii.

1 Yohana 5:20

Aduŋ ŋà a loŋ ne fanaa ko, Alla Dinkewo naata le, a ye fahaamuroo dii ǹ na fo ǹ si ate loŋ, meŋ mu tooñaa ti. M̀ be ate kono le, meŋ mu tooñaa ti, Yeesu Kiristu, Alla Dinkewo. Ate le mu Alla tooñaa ti, aniŋ badaa-badaa baluwo.

1 Timoti 3:16

A koyita le ko, ǹ na lannoo kulloo warata le: A naata hadamadiŋyaa le kono, a la tiliŋo yitandita ka bo niŋ Noora Kuliŋo le la. Malaayikoolu le ye a je, a la kuwo kawandita nasiyoŋolu kono. Lannoo keta a la kuwo to ñiŋ duniyaa kono, a wulindita ka taa santo, kallankeeyaa* kono.

Yesaya 53:5

Ǹ na junuboolu le ye a tinna, ì ye a baloo soo, ǹ na kuu kuruŋolu le ye a tinna, ì ye a baramaŋ-baramaŋ. Jaraboo meŋ laata a kaŋ, wo le ye kayiroo saabu ntolu ma, aduŋ a la baramoolu le ye ntolu kendeyandi.

Yesaya 28:29

Ñiŋ ñaameŋo bee ka bo Yaawe Alihawaa Maariyo le bulu, meŋ na yaamaroo maŋ ñoŋ soto, a la ñaameŋo timmata.

Roomankoolu 8:32

Alla meŋ maŋ hani a faŋo Dinkewo kaari, bari a ye a dii ntolu bee la kuwo kamma, fo a te paree la ka a niŋ feŋolu bee fanaa dii ntolu la?

1 Korintinkoolu 15:25

Kaatu a ñanta maraloo ke la le fo a ye a jawoolu bee ke a siŋo koto.

Jabuuroolu 45:6

Alla ye mansayaa meŋ dii i la, a be tu la le fo abadaa. I ka i la mansayaa taamandi niŋ tiliŋo le la.

Yesaya 10:21

Moo toomaalu be muruŋ na le, moo toomaalu mennu tuta Yaakuba koomalankoolu kono, be muruŋ na Alla Sembemaa kaŋ ne.

Kiitindirilaalu 13:18

Bari Yaawe la malaayikoo ko a ye ko, “Muŋ ne ye a tinna i ye n too ñininkaa? A kaawakuuyaata baake le.”

Yohana 14:27

“Ŋa kayiroo le tu ali fee, ŋa n na kayiroo dii ali la le. Nte maŋ a dii ali la ko duniyaa ka a dii ñaameŋ. Ali sondomoolu kana toora, sako ali si sila.

Hiburunkoolu 1:8

Bari Dinkewo la kuwo to, a ye ñiŋ ne fo ko: “Alla, i la mansasiiraŋo be tu la le fo abadaa, i ka i la mansayaa taamandi niŋ tiliŋo le la.

Yohana 1:14

Bituŋ Kumoo naata ke hadamadiŋo ti, a sabatita ntolu kono, aduŋ a be faariŋ hiinoo niŋ tooñaa le la. Ŋà a la semboo niŋ waroo je le, kaatu ate le mu Faamaa Dinkee kiliŋo ti.

Matiyu 11:27

“M Faamaa ye kuwolu bee duŋ nte le bulu. Moo maŋ Dinkewo loŋ fo a Faamaa doroŋ, aniŋ moo maŋ Faamaa loŋ fo a Dinkewo doroŋ, aniŋ Dinkewo be moo meŋ tomboŋ na ka a londi a Faamaa la.

Yesaya 63:16

Bari ite le mu m̀ Faamaa ti. M̀ mumuñolu Iburayima niŋ Isirayila maŋ ǹ loŋ, ì maŋ ǹ na kuwo loŋ. Hee Yaawe, ite le mu m̀ Faamaa ti, ǹ Kumakaalaa, biriŋ koomanto, wo le mu i too ti.

Kiilaalu 10:36

Ali ye kibaari betoo loŋ ne, Alla ye meŋ kii Banisirayilankoolu ye. Wo kayira kibaaroo kawandita ka bo niŋ Yeesu Kiristu* le la. Ate le mu moolu bee Maariyo ti.

5 Musa 10:17

Yaawe ali la Alla le mu mansoolu la Mansa ti, maariyolu Maarii. Ate le mu Alla Tallaa ti, a warata, aduŋ a ñaasilaŋo warata. A buka laa moo kaŋ, sako ka dukoo taa.

Titus 2:13

m̀ be ǹ na jikoo la timmoo batu kaŋ daameŋ. Wo jikoo la timmoo mu Yeesu Kiristu* la fintinaŋo le ti, meŋ na kallankeeyaa* jarita jayiroo bee la. Ate le mu ǹ na Alla ti meŋ warata, aniŋ ǹ na Kiisandirilaa,

1 Korintinkoolu 1:30

Ali ye baluwo meŋ soto Kiristu Yeesu kono, a bee bota Alla le bulu. Alla ye ate le dii ǹ na fo a si ke ñaameŋo ti ǹ ye, tiliŋo, seneyaa, aniŋ kiisoo.

Yohana 1:16

Ka bo niŋ a la hiinoo la timmoo la, m̀ bee ye hiinoo soto hiinoo kaŋ ne.

Luka 1:35

Wo to le malaayikoo ko a ye ko, “Noora Kuliŋo be naa la i kaŋ ne, aduŋ Alla Mansa Tallaa la semboo be i muuri la le. Wo kamma la, i be diŋo meŋ wuluu la, a seneyaata le, aduŋ a be kumandi la Alla Dinkewo* le la.

Jabuuroolu 72:7

Allamaa tiliŋo ye wajabi a tiloo la, kayiroo ye siyaa, fo janniŋ karoo la boo be daŋ na.

Kolosankoolu 2:3

Ñaameŋo niŋ londoo fankoo bee be maaboriŋ ate Kiristu le kono.

Kiilaalu 20:28

“Ali ali hakiloo tu ali faŋolu to, aniŋ Yeesu la kafoo bee, Noora Kuliŋo ye ali ke topatoorilaalu ti mennu kono. Ali si Maariyo la koorewo kanta, Alla ye meŋ saŋ a faŋo Dinkewo yeloo la.

Kuma Kotoomaalu 8:23

A ye n daa le kabiriŋ foloodulaa to, janniŋ duniyaa be loo la.

Hiburunkoolu 13:20

Alla meŋ ka kayiroo dii, ŋa a daani ali ye le. Ate le ye m̀ Maarii Yeesu wulindi ka bo saayaa kono ka baluu kotenke. Ñiŋ Yeesu naata ke Kantarilaa Baa le ti ntolu ye, a la saajiyolu, ka bo niŋ a faŋo yeloo la, meŋ mu yeloo ti a la badaa-badaa kambeŋo ye.

Luka 2:14

“Semboo niŋ waroo be Alla ye, Arijana dulaa jamfariŋ baa to. Kayiroo be duniyaa moolu fee, Alla kontaanita mennu la kuwo la.”

Yesaya 53:10

Bari a keta Yaawe la lafoo le ti, ka a mantoora niŋ dimiŋo la. A la baluwo keta sadaa* ti junuboolu ye ñaa-wo-ñaa, a koomalankoolu be siyaa la le. A be sii jaŋo soto la le, aduŋ a be Yaawe la feeroo taamandi kuu la le.

Yesaya 53:2

Yaawe la lafoo kaŋ, a la dookuulaa baluuta le ko fiifeŋ mereŋo, meŋ ye suloo duŋ banku jaaroo kono. A maŋ ñiiñaa, waraŋ ka kallankeeyaa*, meŋ si ǹ ñaa faa a la kuwo to. M̀ maŋ feŋ je a muluŋo to, ǹ si lafi noo meŋ na.

2 Korintinkoolu 5:19

Wo le mu ñiŋ ti ko, Alla ye diyandiroo naati a faŋo niŋ duniyaa moolu teema ka bo niŋ Kiristu le la, a maŋ tara ì la junuboolu yaatee kaŋ. Kiilaariyaa ñiŋ diyandiroo la kuwo to, a ye a karafa ntolu le ma.

Roomankoolu 9:5

Itolu le mumuñolu mu Iburayima, Isiyaaka aniŋ Yaakuba ti, aduŋ Kiristu naata wuluu itolu le la lasiloo kono ka baluu ko hadamadiŋo. Feŋolu bee be ate le koto. Tenturoo niŋ jayiroo be Alla le ye, fo abadaa. Amiin!

Luka 21:15

Kaatu m be kumoolu niŋ ñaameŋo dii la ali la le, fo hani ali jawu kiliŋ te balaŋ noo la ali ma, waraŋ ka ali soosoo.

Jabuuroolu 72:3

Allamaa bankoo moolu ye kayiroo niŋ tiliŋo soto, a la marali tilindiŋo kono.

Jabuuroolu 45:3

Mansa kandaa, i la hawusaroo* siti i tewo la. I horomata le, aduŋ i kandaayaata.

Nehemiya 9:32

“Wo to, m̀ Maarii Alla, ite le warata, i semboo warata, aduŋ i ñaasilaŋo warata le. Ite meŋ ka i la kambeŋo muta niŋ kanu bambaloo la, bataa kuwo kana dooyaa i ñaa koto, meŋ laata ǹ kaŋ, ǹ niŋ ǹ na mansoolu, maralilaalu, piriisoolu*, annabiyomoolu, m̀ mumuñolu, ka taa i la moo toomaalu bee, ka bo Asiriya mansoolu la waatoo la, ka naa bula bii la.

Yeremiya 31:22

Ite Dimmusuriŋ fisiriwallee, janniŋ muŋ tuma le i be tara la jenkeŋ-jenkeŋ na? Nte Yaawe be kuu kutoo le daa la duniyaa: Musoo le be muru la a keemaa kamma.”

Yesaya 26:12

Hee Yaawe, kayiroo naati ǹ ye, kaatu ŋà feŋ-wo-feŋ ke noo, ite le ye a ke ǹ ye.

Yesaya 26:3

Ite Yaawe* ka kayira baa dii moolu le la, mennu hakiloo ka tu sabatiriŋ i kaŋ, ì ye ì jikoo loo i kaŋ.

Jabuuroolu 85:10

Alla la kanu bambaloo niŋ tooñaa be beŋ na le, tiliŋo niŋ kayiroo ye ñoo sumbu.

Jabuuroolu 72:17

Allamaa mansa too tu la keriŋ fo fawu, a too ye tu bo la ko tiloo. Allamaa bankoolu moolu ye neema ka bo niŋ ate la, aniŋ ì ye a kumandi neemariŋo la.

Jabuuroolu 50:1

Sembetii Baa, Yaawe* Alla diyaamuta le, a ye duniyaa moolu bee kumandi ka bo tilibo ka taa tilijii.

Yesaya 8:18

M fele, n niŋ n diŋolu Yaawe ye mennu dii n na! Ntolu le mu taamanseeroolu niŋ yitandiroolu ti, Banisirayila kono, ka bo naŋ Yaawe Alihawaa Maariyo bulu, meŋ be sabatiriŋ Siyoni* Konkoo kaŋ.

Yesaya 66:12

Kaatu Yaawe ye ñiŋ ne fo ko: “M be kayiroo feenee la Yerusalaamu ye le ko baajiyo, ŋa bankoolu la naafuloo fuumandi a ye ko woyoo. A be ali suusundi la le ko deenaanoo, a ye ali sika ka ali bambu, aniŋ ka ali tulundi a wutoo kaŋ.

Matiyu 1:1

Ñiŋ ne mu Yeesu Kiristu* bonsuŋolu saataroo ti, meŋ mu Mansa Dawuda koomalankoo ti aniŋ Iburayima koomalankoo.

Yesaya 16:5

Wo to, mansasiiraŋo be loo la kanu bambaloo le kaŋ, moo ye sii a kaŋ ka tooñaa taamandi. A be ke la Dawuda koomalankoo le ti, maralilaa meŋ ka kiitiyo kuntu a ñaama, aniŋ ka tariyaa ka tiliŋo kuwo sabatindi.

Daniyeli 2:44

Wo mansoolu la waatoo la, Arijana Maarii be mansamarali bankoo le londi la, meŋ nene te baŋ na, aduŋ moo koteŋolu te ì semboo laa noo la a kaŋ. A be wo mansamarali banku koteŋolu bee le teyi la, ka ì janjaŋ, ì ye baŋ, aduŋ a be tu la looriŋ ne fo abadaa.

Hakayi 2:9

Yaawe Alihawaa Maariyo le ye ñiŋ fo ko, “Ñiŋ buŋo la kallankeeyaa labaŋo le be wara la ka tambi folooto taa la.” Yaawe Alihawaa Maariyo le ye ñiŋ fo ko, “M be kayiroo dii la ñiŋ dulaa le to.”

2 Samuweli 7:13

Ate le be ke la moo ti, meŋ be buŋo loo la n too la kuwo kamma la, aduŋ m be a ke la a la mansayaa ye tu fo abadaa.

2 Samuweli 7:16

I la buŋo niŋ i la mansamarali bankoo be tara la taama kuu la n ñaa la le, aduŋ i la mansasiiraŋo be bambaŋ na le fo abadaa.”

1 Mansoolu 2:33

Ì yeloo si muru Yowabu kuŋo kaŋ aniŋ a koomalankoolu kuŋo kaŋ fo abadaa. Bari Dawuda kaŋ, aniŋ a koomalankoolu, aniŋ a la buŋo niŋ a la mansasiiraŋo, kayiroo le be tara la ka bo Yaawe bulu fo abadaa.”

1 Mansoolu 2:45

Bari nte be neemoo soto la le, aduŋ Dawuda la mansasiiraŋo be bambandi la Yaawe ñaatiliŋo la le fo abadaa.”

1 Mansoolu 10:9

Tentoo be Yaawe ye i la Alla, meŋ kontaanita i la kuwo la, aduŋ a ye i sindi Banisirayila la mansasiiraŋo kaŋ. Yaawe la badaa-badaa kanoo kamma la, a ye meŋ soto Banisirayila ye, wo le ye a tinna a ye i ke mansa ti, fo i si tiliŋo niŋ tooñaa taamandi.”

Jabuuroolu 45:7

I ye tiliŋo kanu le, i ye kuruŋyaa koŋ. Wo le ye a tinna i la Alla ye i toloo seewoo kono ka tambi i ñoŋolu la.

Jabuuroolu 89:5

Yaawe, Arijana bee ka i jayi i la kaawakuwolu kaŋ ne. I la malaayika kafoo le ka i la tiliŋo laa suukuwo ti.

Yesaya 11:5

Tiliŋo le be ke la a la teesitiraŋo ti, tooñaa ye tara minindiŋ a tewo bala.

Yesaya 32:1

A juubee, mansa be soto la le, meŋ be maraloo ke la tiliŋo kono, aduŋ a la maralilaalu be tooñaa le taamandi la.

Yesaya 37:32

Kaatu too be tu la Siyoni Konkoo kaŋ ne Yerusalaamu moolu kono, mennu tuta baluwo to. Yaawe Alihawaa Maariyo ye a hame le ka ñiŋ kuwo taamandi.

Daniyeli 7:14

Wo le to a ye kaŋo dii a la, horomoo, aniŋ mansayaa semboo, ñiŋ kamma la banku-wo-banku, sii-wo-sii, aniŋ moolu bee si a batu. A la mansayaa semboo be tu la keriŋ ne fo abadaa, aduŋ a la mansabaayaa te baŋ na.