Yesaya 49:8 - Mandinka Bible

⁸ Yaawe ye ñiŋ ne fo a la dookuulaa ye ko: “Niŋ n na hiinoo waatoo siita, m be i danku la le. Niŋ kiisoo luŋo siita, m be i maakoyi la le. M be i kanda la, i ye ke n niŋ moolu teema kambeŋo ti, ka banku tumbundiŋo seyindi a ñaama, ka kenoo talaa moolu teema ka ke ì ye keetaafeŋo ti.

Yesaya 49:8 Referans Kwoze

2 Korintinkoolu 6:2

kaatu Alla ye ñiŋ ne fo ko: “Biriŋ n na hiinoo waatoo siita, ŋa i danku le. Biriŋ kiisoo luŋo siita, ŋa i maakoyi le.” Ali a juubee, saayiŋ ne mu hiinoo waatoo ti, aduŋ saayiŋ ne mu kiisoo luŋo ti!

Yesaya 42:6

“Nte Yaawe ye i kumandi le ka tiliŋo naati duniyaa moolu ye. Ŋa i buloo muta le ka i kanda, i ye ke n niŋ n na moolu teema kambeŋo ti, aniŋ ka ke banku koteŋolu ye maloo ti.

Jabuuroolu 69:13

Hee Yaawe, nte de, n na duwaa be looriŋ ite le kaŋ. Hee Alla, n na duwaa jaabi waatoo la, i faŋo ye meŋ londi. N jaabi i la kanu bambaloo la waroo la. N jaabi niŋ i la tankandiri koyoo la.

Hiburunkoolu 12:24

Ali naata Yeesu le kaŋ, meŋ mu kanjurilaa ti kambeŋ kutoo ye, a niŋ a yeloo meŋ sariŋ-sarinta. Wo le ka hiinoo la kumoolu fo ka tambi Haabiila yeloo la.

Yesaya 61:4

Ì be tumbuŋ kotoolu lookuu la le, ì ye dulaalu mennu meeta kasaarariŋ, seyindi ì ñaama. Ì be saatee tiñaariŋolu dadaakuu la le, mennu janjanta, sanji jamaa koomanto.

Yesaya 58:12

Ali la moolu be tumbuŋ kotoolu lookuu la le, ì ye fondamaŋ kotoolu wulindi kotenke. Ali be kumandi la sansaŋ boyiriŋ loolaalu le la, aniŋ mennu ka mbeedoolu dadaa, fo taradulaalu ye tara jee.”

Hiburunkoolu 5:7

Biriŋ Yeesu be sabatiriŋ duniyaa kono jaŋ ko hadamadiŋo, a ye duwaalu niŋ daaniroolu ke ka bo niŋ kumboo baa niŋ ñaajiyolu la Alla ye, meŋ si a tankandi noo saayaa ma. Aduŋ Alla ye a moyi a la a ñaasilaŋo le kamma la.

Yesaya 51:16

Nte le ŋa n na kumoo duŋ ali daa, ŋa m buloo biti ali kaŋ ka ali tanka. Nte le ye saŋ fatoolu ke ì dulaa to, ŋa bankoo fondamaŋo laa, n ko Siyoninkoolu ye ko, ‘Alitolu le mu n na moolu ti.’ ”

Yesaya 44:26

N ka n na dookuulaa la kumoo timmandi le, ŋa n na annabiyomoo la bankeeroo ke kuu sotoriŋo ti. Ŋa a fo le ko, moolu be sabati la Yerusalaamu le kotenke, ì ye Yahuuda saatewolu lookuu. Ì la saatewolu be bo la tumbundiŋ ne, ì ye seyi ì ñaama.

Efesusinkoolu 1:6

fo ǹ si a jayi a la hiinoo la meŋ kallankeeyaata*, a ye meŋ dii ǹ na ka bo niŋ a Kanu Dinkewo la.

Yesaya 54:3

Kaatu i be tara la karoo bee le la, bulubaa niŋ maraa, i koomalankoolu be banku koteŋolu la kenoo buusi la le, ì ye naa sabati saatee tumbundiŋolu to.

Yesaya 49:19

“Ì ye i tiñaa, aniŋ ka i la saatewo kasaara ñaa-wo-ñaa, ka i la bankoo kenseŋyandi, bari saayiŋ, bankoo be dooyaabaa la i la moolu ye le, mennu naata, aduŋ mennu ye i kasaara be jamfa la i la le.

Yesaya 42:1

Yaawe* ko: “N na dookuulaa fele, ŋa meŋ na kuwo bambandi. Ŋa ate le tomboŋ, aduŋ a la kuwo ye n seewoo le. M be n na Nooroo jindi la a kaŋ ne, aduŋ a be kiitii tilindiŋo naati la bankoolu kaŋ ne.

Yesaya 26:3

Ite Yaawe* ka kayira baa dii moolu le la, mennu hakiloo ka tu sabatiriŋ i kaŋ, ì ye ì jikoo loo i kaŋ.

Jabuuroolu 75:3

Niŋ duniyaa be janjaŋ kaŋ, aniŋ a niilamaa feŋolu bee, nte le be a fondamaŋolu muta la ì ye bambaŋ. S

Jabuuroolu 2:8

Niŋ i ye n kaniŋ, m be bankoolu dii la i la le ka ke ì la keetaafeŋo ti. Duniyaa fannaa bee si ke i taa ti.

Hiburunkoolu 8:6

Bari saayiŋ, Yeesu ye piriisiyaa dookuwo meŋ soto, wo le warata ka tambi wo piriisi doolu la dookuwo la. A tambita ì la dookuwo la le ko kambeŋ kutoo, Yeesu keta kanjurilaa ti kambeŋo meŋ ye, wo le beteyaata ka tambi kambeŋ kotoo la, kaatu a kambeŋo loota laahidi betoolu le kaŋ ka tambi wo doolu la.

Matiyu 26:28

Kaatu ñiŋ mu n yeloo le ti, kambeŋo yeloo meŋ bonta moo jamaa ye ka ì la junuboolu kafari.

Yesaya 51:3

Tooñaa-tooñaa, Yaawe be Siyoninkoolu* sabarindi la le, aduŋ a be balafaa soto la ì ye le, ì la saatewo tumbunta ñaameŋ. A be ì la wuloo ke la le ko Edeni naakoo, ì la keñewuloo* ye ke ko Yaawe la naakoo. Ì be seewoo niŋ kontaanoo soto la jee le, ì ye Alla tentu niŋ suukuulaa la.

2 Samuweli 7:13

Ate le be ke la moo ti, meŋ be buŋo loo la n too la kuwo kamma la, aduŋ m be a ke la a la mansayaa ye tu fo abadaa.

Yesaya 27:3

“Nte Yaawe le ka a kanta, n ka a jiiboŋ taariŋ, n ka a kanta suuto tili, fo moo kana a tiñaa.

Yesaya 41:10

Wo to ali kana sila, kaatu m be ali fee le. Ali kana dewuŋ, kaatu nte le mu ali la Alla ti. M be ali bambandi la le, ka ali maakoyi. M be ali muta la niŋ m bulubaa bulu tilindiŋo le la, ka ali tanka.

Yesaya 55:6

Ali Yaawe ñini, janniŋ a ñiniŋ waatoo be ali daŋ na, ali a kumandi, a be sutiyaariŋ ali la tuma meŋ.

Yesaya 57:13

Niŋ i woosiita maakoyiroo la, i la jalaŋ jurumoolu si i tanka. Foñoo le be ì bee samba la, niijii kenseŋo ye ì tindi ka taa. Bari moo meŋ be tuukuriŋ nte la, wo le be bankoo keetaa la, n na konko senuŋo* ye ke a taa ti.”

Yesaya 58:5

Fo n lafita ñiŋ suŋ siifaa le la, fammajiyo doroŋ? Fo n lafita ñiŋ ne la baŋ, moo ye a kuŋo jirandi ko ñaamoo, aniŋ ka tara laariŋ booto funtoo kaŋ seebuutoo kono? Fo ali ka wo kumandi suŋo le la, nte Yaawe be soŋ na meŋ na?

Yesaya 61:2

Yaawe ye n kii le ka a kankulaa ko a la maakoyiroo saŋo siita le, aniŋ a be juloo joo la a jawoolu to luŋo meŋ na. A ye n kii naŋ ne ka woosiilaalu sabarindi,

Yesaya 65:9

M be koomalankoolu bondi la Yaakuba lasiloo kono le, Yahuuda koomalankoolu le be n na konkobankoo keetaa la. N na tomboŋ moolu le be a keetaa la, aduŋ n na dookuulaalu le be sabati la jee.