Yesaya 34:6 - Mandinka Bible

⁶ Yaawe la hawusaroo ñeelita yeloo la le, a fuumata keŋo la, saajiiriŋolu niŋ baalu keŋo, saakotoŋ kookiloolu keŋo. Yaawe be sadaa* le bo kaŋ Bosira, kanateyiri baa, Edomu bankoo kaŋ.

Yesaya 34:6 Referans Kwoze

Yesaya 63:1

Jumaa le mu ñiŋ ti, meŋ ka bo naŋ Bosira saatewo to Edomu bankoo kaŋ, a la dendikoo bee be tompiŋ-tompindiŋ niŋ feŋ wuleŋo la? Jumaa le mu ñiŋ ti, meŋ ye mansa dendikoo duŋ, a ka taama naŋ niŋ a semboo la? Yaawe* ko: “Nte le mu, n ka diyaamu niŋ tiliŋo siloo le la. Ŋa semboo soto le ka kiisandiroo ke.”

Yeremiya 49:13

N kalita m faŋo la le ko: Bosira la kuwo be ke la kijafara kuwo le ti, a ye ke jutunna feŋo ti, ka kenseŋyaa, aniŋ ka ke dankoo ti. Aduŋ a dandanna saatewolu bee be ke la tumbuŋolu le ti fo fawu.” Yaawe le ye a fo.

Sefaniya 1:7

Ali i deyi Maarii Yaawe ñaatiliŋo la. Yaawe la luŋo sutiyaata naŋ ne. A be pareeriŋ ne ka a la moolu kanateyi ko beeyaŋ sadaa*, aduŋ a ye ì jawoolu le buuñaatoo kumandi a sadaa domoo to.

Yeremiya 51:40

“M be ì samba la naŋ ne ka ì landi, ŋa ì kanateyi ko saajiiriŋo, ko saakotoŋo waraŋ ko baakotoŋo.”

Yeremiya 50:27

Ali a kee kanaŋ tuuraalu bee faa, ka ì samba ka ì kanateyi. Kooroo boyita ì kaŋ, kaatu ì la luŋo siita le, waatoo meŋ m be ì kuluu la.

Yesaya 63:3

“N na kamfaa kono, ŋa n jawoolu dori le, komeŋ ì ka wayini yiridiŋolu dori ì bitidulaa ñaameŋ. Nte dammaa le ye wo dookuwo ke, moo maŋ bo banku to meŋ si m maakoyi. Ŋa n tuu n jawoolu kaŋ ne, n na jusuboo waatoo kono. Ì yele noo le be n na dendikoo bala.

Yesaya 34:5

N na kiitindiri hawusaroo* ñeeliriŋo le be saŋo santo. A fele, saayiŋ a ka naa jii Edomunkoolu le kaŋ, ŋa mennu kiitindi ka ì faa.

5 Musa 32:14

Ali ka ninsoolu nonoo miŋ, ka taa bula saajiyolu niŋ baalu la. Ali la saajiiriŋolu niŋ baalu bee niŋ keŋo le mu. Basani tundoo saakotoŋolu, niŋ baakotoŋolu le be ali bulu, ali la siimaŋ kesoolu, ñoŋ te wo la, wayini* jii wuleŋo, ali ka wo le miŋ.

Esekiyeli 21:10

Ŋa hawusaroo daa diyaa faaroo le kamma, fo a ka ŋalasi ko saŋ ŋalasoo. Seewoo banta le, kaatu n na mansa faŋo le jututa n na dandalaaroolu niŋ n na kuluuroo la, a maŋ wolu muta feŋ ti.

5 Musa 32:41

M be n na hawusaroo daa diyaa la le, fo a ye malamala, ŋa sii n na kiitiisiiraŋo kaŋ. M be n joo la n jawoolu to le, ŋa moolu jarabi, mennu ye n koŋ.

2 Samuweli 1:22

Yonatani la kalabeñoo buka jenke a jawoolu ye, aduŋ Sawulu fanaa la hawusaroo maŋ balafaa soto, a ka kelejawaroolu niŋ a jawoolu bee le faa.

1 Taarika 1:44

Biriŋ Bela faata, Yobabu, Sera Bosirankoo dinkewo, wo le seyita a noo to.

Jabuuroolu 137:7

Hee Yaawe, i miira Edomunkoolu ye meŋ ke, luŋo meŋ na ǹ jawoolu ye Yerusalaamu saatewo muta. Ì tarata a fo kaŋ ne ko, “Ali a tumbuŋ de! Ali a tumbuŋ de, fo a fondamaŋolu to!”

Yesaya 65:12

nte le be a lañini la, hawusaroo* ye ali faa. Ali be ñoyi la le, ì ye ali kanateyi, bayiri ŋa ali kumandi le, ali maŋ n danku, n diyaamuta ali ye, ali maŋ i lamoyi n na. Ali ye kuu jawoo ke n ñaatiliŋo la le, aniŋ ka bula kuwo nooma, m maŋ lafi meŋ na.”

Yeremiya 12:12

Kasaaralilaalu naata niŋ keñewula tintiñaalu bee le la. Nte Yaawe ye keloo le naati niŋ hawusaroo* la, ka bankoo kasaara biriŋ tonkoŋ fo tonkoŋ. Moo te kayira soto la.

Yeremiya 25:34

Alitolu kantarilaalu, kooree ñaatonkoolu, ali wuuri ka kumboo, ali ye i bidibidi seebuutoo kono, kaatu ali kanateyi luŋo siita le, aduŋ ali be boyi la le ka janjaŋ ko daandiŋ kekuuriŋo.

Yeremiya 46:10

Bari luŋo ñiŋ mu nte Yaawe Alihawaa Maariyo* la luŋo le ti, julujoo luŋo, ka n joo n jawoolu to. Hawusaroo* be faaroo ke la le fo a ye tiiña, a ye i miŋ ì yeloo la fo a ye ñeeli. Kaatu nte Yaawe Alihawaa Maariyo be faari sadaaboo le ke la, maraa kara bankoo kaŋ, Yufurati Boloŋo daala.

Yeremiya 49:7

Ñiŋ kiilaariyaa kumoo le fota Edomu ma: Yaawe Alihawaa Maariyo ye ñiŋ ne fo ko: “Fo moo ñaamendiŋ maŋ tu Temani baŋ? Fo ñaameŋo yaamaroo kasaarata ì kono le baŋ? Fo ì la ñaameŋo yeemanta le baŋ?

Esekiyeli 35:8

M be ali la konkoolu fandi la niŋ furewolu le la. Ali la konkoriŋolu, ali la wulumbaŋolu, aniŋ ali la woyoolu bee be tara la faariŋ furewolu le la, mennu faata keloo kono.

Esekiyeli 35:15

Ko ali seewoota Banisirayilankoolu la keetaabankoo la kasaaroo niŋ a la kenseŋyaa la ñaameŋ, m bulu be laa la ali kaŋ wo le ñaama. Ite Seyiri Konkoo, i niŋ Edomu bankoo muumewo bee be kasaara la le, ali ye kenseŋyaa. Wo to le, ali be a loŋ na ko, nte le mu Yaawe ti.”

Amosi 1:11

Yaawe ye ñiŋ ne fo ko, “Edomunkoolu ye landatambi junube kuwolu le ke. Ì ye ì baadiŋ Banisirayilankoolu bayi niŋ hawusaroo* la, ì maŋ hani balafaa kiliŋ soto. Ì la kamfaañaa maŋ naanee soto, aduŋ ì buka sabari. Wo kamma la n te ì jaraboo baayi la muk.

Yesaya 29:2

Bari hani wo, m be toora kuwo naati la Ariyeli kaŋ ne. A si kumboo a ye woosii, a si ke n ye komeŋ sadaajanidulaa*.