Yesaya 26:14 - Mandinka Bible

¹⁴ Wo mansoolu faata le, ì te wuli la kotenke. Ì keta laakirankoolu le ti, ì te wuli la ka baluu kotenke. Kaatu i ye ì jarabi le ka ì kasaara, moo hakili te bula la ì la kotenke.

Yesaya 26:14 Referans Kwoze

Kuma Kotoomaalu 10:7

Niŋ moo kendoo faata, a too be ke la neemoo le ti, bari moo kuruŋo too be buruka la le.

Yesaya 8:19

Saayiŋ moo doolu ko, ali ñanta taa la furee kumandilaalu niŋ juubeerilaalu le yaa, wo ŋunuŋunulaalu niŋ dukudukulaalu. Fo moolu maŋ ñaŋ na taa la ì la Alla le yaa ñininkaaroo la? Muŋ ne ye a tinna ali ka furewolu kumandi baluuriŋolu la kuwo kamma?

Jabuuroolu 106:28

Bituŋ m̀ mumuñolu naata duŋ Baali* jalambatoo to Pewori Konkoo to, ì ka sadaalu* domo ì ye mennu bondi furewolu ye.

Lankenemoo 20:5

Wo le mu saayaakoolaa wulindiri foloo ti. Furee toomaalu maŋ wuli saayaa to fo sanji wuli kiliŋo banta.

Matiyu 2:20

a ko a ye ko, “Wuli! I ye dindiŋo niŋ a baamaa taa, ali ye muru Banisirayila bankoo kaŋ, kaatu mennu ye a kata ka dindiŋo faa, wolu faata le.”

Yesaya 10:3

Ali be muŋ ne ke la mantooroo luŋo, niŋ kooroo bota naŋ dulaa jaŋ? Ali be taa jumaa le yaa ka maakoyiroo ñini? Ali be ali la naafuloo tu la mintoo le?

Jabuuroolu 109:13

Allamaa a koomoo ye buruka fereŋ. Allamaa a too kana tu jamaani naalaa kono.

Jabuuroolu 9:6

I ye ǹ jawoolu turutumbuŋ ne, i ye ì la saatewolu buruka, ì la kuwo keta ñinataa ti fereŋ.

5 Musa 4:28

Jee to, ali be jalaŋolu batu la le, hadamadiŋo buloo ye mennu dadaa yiroo niŋ beroo la. Ì buka moyiroo ke waraŋ ka jeroo ke, ì buka feŋ domo noo waraŋ ka feŋ seeroo taa.

2 Musa 14:30

Wo luŋo la Yaawe ye Banisirayilankoolu tankandi Misirankoolu ma le, aduŋ Banisirayilankoolu ye Misirankoolu furewolu je laariŋ baa daala.

Yesaya 26:19

Hee Yaawe, i la furewolu ye wuli, n na moo faariŋolu ye wuli. Yaawe, i la komboo meŋ ka baluwo dii, a ye feenee bankoo kaŋ, ì ye furewolu baadee daameŋ. Alitolu mennu be laariŋ bankoo kono, ali wuli, ali ye suukuwo laa seewoo kono.

Jabuuroolu 36:12

A fele, moo jawoolu boyita le, ì busandita duuma, ì maŋ wuli noo.

Jabuuroolu 59:5

Ite Yaawe Alihawaa Maariyo*, ite le mu Banisirayila la Alla ti. Wuli, i ye banku koteŋ moolu jarabi. Kana yamfa moo kiliŋ ye, wo jamfantuŋ jawoolu kono. S

Jabuuroolu 135:17

Tuloolu be ì la, bari ì buka i moyi noo. Niyo faŋo le te ì la.

Kawandilaa 9:5

Moo-wo-moo be a niyo la, wo ka i yillaa saayaa ma le, bari furewo, wo buka feŋ ne kalamuta. Ì buka duniyaa tinee soto kotenke, aduŋ hani ì la kuwo miiroo faŋo, bee le ka naa fili fereŋ.

Yesaya 29:6

Wo loo to, Yaawe* Alihawaa Maariyo* si i kiisa. A niŋ saŋ feteŋ baa le be naa ñoo la, banku jarajara baa, foño saŋara baa, turubaadoo, aniŋ kasaarali dimbaa neŋolu.

Yesaya 37:19

Ì ye ì la jalaŋolu jani dimbaa kono le ka ì kasaara. Kaatu wo jalaŋolu mu yiroolu niŋ beroolu doroŋ ne ti, ì maŋ ke Alla ti. Moolu le ye ì dadaa ì buloolu la.

Yuuba 7:9

Ko tawaloo ka janjaŋ ñaameŋ, a ye yeemaŋ, moolu fanaalu mennu ka taa fureeduu, ì buka muru naŋ kotenke wo le ñaama.

Yuuba 18:17

Ì la kuwo be fili la duniyaa moolu ma, ì too te tu la suu kono, aniŋ banta la.

Yuuba 24:20

Ì faŋo baañolu si ñina ì la kuwo la, tumboolu ye tuluŋ ì balajaatoolu la, moo te ì la kuu miira la. Moo kuruŋolu ka kasaara le komeŋ yiri boyiriŋo.