Yesaya 24:16 - Mandinka Bible

¹⁶ Ǹ ka suukuwolu moyi le, ka bo duniyaa daŋolu to, ka Tilindiŋ Baa la kallankeeyaa* horoma. Bari n ko, “N tiñaata le, n tiñaata le! Kooroo boyita n kaŋ! Jamfaalaa ka jamfaa le ke, Jamfaalaa ka jamfaa doroŋ ne ke.”

Yesaya 24:16 Referans Kwoze

Yesaya 21:2

Jeri koleŋ ne yitandita n na. Jamfaalaa ka jamfaa ke le, kasaaralaa ka kasaaroo ke. Elamu, taa boyinkaŋo la! Mediya, taa dulaa suki! Yaawe* be daŋ ke la woosiyo la le, Babiloni ye meŋ laa bankoolu kaŋ.

Yeremiya 5:11

Banisirayila niŋ Yahuuda jenketa n na karoo la le fereŋ.” Yaawe le ye a fo.

Yesaya 33:1

Kooroo be boyi la ite kasaaralilaa kaŋ ne, moo maŋ ite meŋ kasaara. Kooroo be boyi la ite jamfaalaa kaŋ ne, moo maŋ ite meŋ jamfaa. Niŋ i ye i foño kasaaraloo la, hani wo, i be kasaara la le. Niŋ i ye i foño jamfaamooyaa la, wo to le jamfaa kuwo be naa ke la i la.

Yeremiya 3:20

Bari hanii, ko musoo meŋ muritita a keemaa ma, i muritita nte ma wo le ñaama, ite Banisirayila.” Yaawe le ye a fo.

Lankenemoo 15:3

Ì be Annabilayi Musa la suukuwo laa kaŋ, meŋ mu Alla la dookuulaa ti, aniŋ Saajiiriŋo la suukuwo. Ì be a fo kaŋ ko: “Ite Maariyo, Alla Mansa Tallaa, i la baara kuwolu warabaata le, ì kaawakuuyaata. Ite mu Mansa le ti nasiyoŋolu bee kunto, i la siloolu mu tiliŋo niŋ tooñaa le ti.

Kiilaalu 13:47

Maariyo ye ǹ yaamari le ko: ‘M be i ke la bantala bankoolu* fanaa ye maloo le ti, i ye n na kiisoo samba duniyaa tonkoŋ naanoo bee to.’ ”

Maaka 13:27

Bituŋ a be a la malaayikoolu kii la ka a la tomboŋ moolu kafu ñoo ma ka bo naŋ duniyaa tonkoŋ naanoo muumee to.

Habakuki 1:3

Muŋ ne ye a tinna i ye n jerindi ñiŋ tilimbaliyaa la? Muŋ ne ye a tinna i ye i ñaa kaasi kuu kuruŋo la? N ñaa ka kasaaroo niŋ fitina kuwo doroŋ ne je daa-wo-daa, keloo niŋ sonkoo be wuli kaŋ doroŋ.

Mika 5:4

A be ke la a la moolu ye le ko saajii kantalaa, Yaawe la mansabaayaa semboo kaŋ, Yaawe, a la Alla too la waroo kaŋ. Ì la baluwo be tara la tankoo le kono, aduŋ a too la waroo be taa le fo duniyaa daŋo to.

Hoseya 6:7

“Ko a keta nuŋ ñaameŋ Adama saatewo maafaŋo la, Banisirayila ye kambeŋo tiñaa, n niŋ ì ye meŋ siti. Ì ye foroyaabaliyaa tiliŋ n na jee.

Hoseya 5:7

Ì ye foroyaabaliyaa le tiliŋ Yaawe la, kaatu ì ye diŋolu wuluu cakayaa le kono. Ì la Kari Kuta Juuraloo* sadaaboolu le be ì niŋ ì la kunkoolu bee kasaara la.”

Niikuyaa Suukuwolu 1:2

Badaa-badaa suuto kumboo, ñaajiyo ka bori a ñaasiŋo la. A kanuntewolu bee kono, a maŋ sabarindilaa kiliŋ soto, a teeroolu bee ye jamfaa tiliŋ a la, ì keta a jawoo ti.

Yeremiya 12:6

Hani i baadiŋolu niŋ i faa suwo moolu ye jamfaa taamandi i kaŋ ne. Ì ka maakaŋ baa le wulindi i kamma. Kana laa ì la, hani ì si kuma diimaalu fo i ye.”

Yesaya 60:21

“Wo to i la moolu bee be ke la moo tilindiŋolu le ti, aduŋ bankoo be tara la itolu le bulu fo abadaa. Itolu le mu soroŋo ti ŋa meŋ tutu, m faŋo buloo le la dookuwo mu, ka n na kallankeeyaa yitandi.

Yesaya 52:10

Yaawe be a semboo yitandi la bankoolu bee la le, aduŋ duniyaa moolu bee be ǹ na Alla la kiisoo je la le.

Yesaya 48:8

Kabiriŋ koomanto, ali buka i lamoyi ñiŋ kuwolu la, ka ì fahaamu, sako ka n na kumoo moyi. Ŋa a loŋ ne ko, ali be ke la n ye jamfantuŋolu le ti. Ali muritita m ma le, biriŋ ali wuluuta.

Yesaya 28:5

Wo luŋo la, Yaawe* Alihawaa Maariyo* faŋo be ke la le ko mansanaafa ñiimaa, ko kuŋ ñarandiraŋ firi ñiimaa a la moolu ye, mennu tuta baluuriŋ.

Yesaya 26:15

Hee Yaawe, i ye ǹ na bankoo warandi le, i ye ǹ na bankoo warandi, ka buuñaa naati i faŋo ye, i ye bankoo naanewolu bee lafaa le.

Yesaya 17:4

Yaawe ko, “Wo luŋo la, Yaakuba jikiraŋ semboo be jii la le, a la fankamaayaa ye naa labaŋ fuwaareyaa la.

Yesaya 10:16

Wo to, Yaawe Alihawaa Maariyo* be kuuraŋ jawoo le jindi la naŋ Asiriya mansa la kelejawara bambandiŋolu kaŋ. Dimbaa le be duŋ na a jikiraŋ semboo la, a bee ye kasaara.

Jabuuroolu 106:15

Ì ye meŋ kaniŋ a ye a dii ì la le, bari a ye jankari jawoo jindi ì kaŋ ne.

Jabuuroolu 98:3

A ye a la laahidoo muta Banisirayila moolu ye le, a la kanu bambaloo niŋ foroyaa tilindiŋo kaŋ. Duniyaa moolu bee ye ntolu la Alla la tankandirilaŋ semboo je le.

Jabuuroolu 67:7

Alla neemata m̀ ma le, wo to moolu be duniyaa fannaa daa-wo-daa, ì si Alla ñaasilaŋo soto.

Jabuuroolu 58:10

Moo tilindiŋolu be seewoo la le, niŋ ì ye moo kuruŋolu la joo je. Ì si ì siŋolu kuu moo kuruŋolu yeloo kono.

Jabuuroolu 2:8

Niŋ i ye n kaniŋ, m be bankoolu dii la i la le ka ke ì la keetaafeŋo ti. Duniyaa fannaa bee si ke i taa ti.

2 Musa 15:11

“Hee Yaawe! Jumaa le be alloolu kono, mennu niŋ ite mulunta? Jumaa le mulunta ko ite, i la mansayaa senuŋo, i la sembe waroo, i la kaawakuwolu?

Yeremiya 12:1

Hee Yaawe*, ite le be boloo la, niŋ ŋa tuumiroo naati i kaŋ. Hani wo, m be n na kuwo laa la i ñaa koto le. Muŋ ne ye a tinna moo kuruŋolu ka yiriwaa? Muŋ ne ye a saabu moo jenkeriŋolu ka ñaatotaa soto?

3 Musa 26:39

Toomaalu mennu be tu la baluuriŋ ali kono, be toli la ali jawoolu la bankoo le kaŋ, ali la junuboolu kamma la, aniŋ ali mumuñolu la junuboolu.

Jabuuroolu 65:8

Wo kamma la duniyaa fannaalu bee la, moolu kijoo ka ì fara i la kaawakuwolu la le. Ka bo tilibo ka taa fo tilijii i la keroolu ka seewoo suukuwo dundi moolu la.

Jabuuroolu 119:158

Niŋ ŋa moo muritiriŋolu juubee, ì la kuwo ka n ñewuŋ ne, kaatu ì buka i la yaamaroolu muta.

Yesaya 11:12

A be bandeeroo wulindi la bankoolu ye le, a ye Banisirayila mutamoolu bendi, a ye Yahuuda moo janjandiŋolu kafu ñoo kaŋ, ka bo duniyaa tonkoŋ naanoo to.

Yesaya 42:10

Alitolu mennu ka taama niŋ baa la, aniŋ a konokono feŋolu bee, alitolu banku jamfariŋolu, aniŋ mennu be sabatiriŋ jee, ali suukuu kutoo laa Yaawe ye, a la jayiroo ye bo naŋ duniyaa daŋo bee to.

Habakuki 1:13

I jankuta wo ti le, i ñaa ye loo kuu kuruŋo kaŋ, i buka muña kuu kuruŋo kaŋ. Wo to muŋ ne ye a tinna i be soŋ na jamfaalaalu ye kuu ke noo? Muŋ ne ye a tinna i tuta deyiriŋ biriŋ ñiŋ moo kuruŋolu be moolu tumbuŋ kaŋ, mennu tilinta itolu ti.

Yesaya 6:5

N wuurita ko, “Kooroo boyita n kaŋ ne. N kasaarata le. Kaatu nte mu moo le ti, meŋ ka junube kumoo fo, aduŋ n niŋ moolu le be siiriŋ mennu buka tooñaa kumoo fo, aduŋ n ñaa ye Mansoo je le, Yaawe Alihawaa Maariyo.”