Yeremiya 44:6 - Mandinka Bible

⁶ Wo kamma la, ŋa n na kamfaa baa kupi naŋ. A malata Yahuuda saatewolu kamma, aniŋ Yerusalaamu mbeedoolu kaŋ, a ye ì ke tumbuŋ kenseŋolu ti, ko ì be ñaameŋ bii.”

Yeremiya 44:6 Referans Kwoze

Yeremiya 7:20

“Wo kamma la, nte Yaawe Alla ye ñiŋ ne fo ko: A juubee, m be n na kamfaa niŋ jusukandoo jindi la ñiŋ batudulaa kaŋ ne, ka taa moolu niŋ beeyaŋolu kaŋ, yiroolu, aniŋ senebankoo fiifeŋolu. A dimbaamaa le be mala la, aduŋ moo te a faa noo la.”

Esekiyeli 8:18

Wo kamma la, m buloo be sii la ì ma le n na kamfaa baa kono, aduŋ n te balafaa la ì ye, sako n si ì tu jee. Hani niŋ ì wuurita ñaa-wo-ñaa ka n daani, n te ì danku la.”

Yeremiya 42:18

“Yaawe Alihawaa Maariyo, Banisirayila la Alla le ye ñiŋ fo ko: ‘N na kamfaa niŋ n na jusukandoo kupita Yerusalaamu moolu kaŋ ñaameŋ, m be a kupi la ali fanaa kaŋ wo le ñaama, niŋ ali taata Misira. Ali be ke la moolu ye danka moolu le ti, ali la kuwo ye ke kijabo kuwo ti, ka ke jutunna moo ti, aniŋ jelefeŋo, aduŋ ali ñaa te loo la ali la bankoo kaŋ kotenke.’

Yeremiya 21:5

Nte faŋo le be ali kele la niŋ m bulu sembemaa baa la, aniŋ n na kamfaa, jusukandoo, aniŋ diminnaa fijoo la.

Yeremiya 7:34

M be maadiyaa niŋ seewoo kumakaŋolu daŋ na Yahuuda saatewolu kono le, aniŋ Yerusalaamu mbeedoolu kaŋ, ka taa maañoo niŋ a keemaa la maañoobiti maakaŋo. Kaatu bankoo be ke la tumbuŋo le ti.”

Yesaya 51:20

I diŋolu ketuta le, ì be laariŋ mbeedi kuŋolu to ko minaŋo meŋ be jaloo daa. Yaawe la kamfaa ye ì futufaa le, i la Alla la jalayiroo.

Yesaya 51:17

Wuli! Wuli! Hee Yerusalaamu, i ñaa yele! I ye i miŋ Yaawe la kamfaa mindaŋo le la, i ye mindaŋ faa bee miŋ ne, fo i ka timili-tamali.

Yesaya 6:11

Wo to le n kumata ko, “Hee Maariyo! Fo waati jumaa?” A ye n jaabi ko, “Fo niŋ saatewolu tumbunta, moo maŋ tara ì kono, fo niŋ buŋolu kenseŋyaata, kunkoolu ye tiñaa aniŋ ka kasaara,

Nahumu 1:2

Yaawe* Alla kiiliyaata le, aduŋ a ka juloo joo le, a ka juloo joo, aduŋ a ka kamfaa le famfaŋ, a ka juloo joo balannaalu to le, aduŋ a jusoo ka kandi a jawoolu kamma le.

Daniyeli 9:12

I ye i la kumoo timmandi le, i ye meŋ fo ǹ niŋ ǹ na maralilaalu ma. I ye kasaara baa le boyi ǹ kaŋ. I ye kuwo meŋ laa Yerusalaamu kaŋ, wo ñoŋ kuwo nene maŋ laa saatee koteŋ kaŋ duniyaa bee kono.

Esekiyeli 24:13

“Ite Yerusalaamu, wo fintoŋo le mu i la malubaliyaa ti. Baawo n lafita i seneyandi la le nuŋ, bari i te seneyaa noo la ka bo i la wo kosoo kono. I te seneyaa noo la kotenke, fo niŋ ŋa n na kamfaa bee jindi i kaŋ tuma meŋ na fo n wasata.

Esekiyeli 24:8

A ye n kamfandi le fo ŋa a kuluu. A ye yeloo meŋ boŋ, ŋa a ke beroo le kaŋ, i si a je, a te a muuri noo la.”

Esekiyeli 20:33

Maarii Yaawe ye ñiŋ ne fo ko: “A be koyiriŋ ñaameŋ ko nte Yaawe be baluuriŋ ne, m be n na kamfaa baa jindi la ali kaŋ ne, ŋa ali mara m bulu sembemaa baa la ko mansakewo.

Esekiyeli 6:12

Wo moolu mennu be sabatiriŋ dulaa jaŋo to, alibalaa kuuraŋo le be wolu faa la, aduŋ mennu maŋ tara dulaa jaŋ, wolu be faa la keloo le to. Bituŋ moo toomaalu mennu tuta baluuriŋ, konko jawoo le be wolu faa la, n jusoo si naa sumayaa.

Esekiyeli 5:13

“Wo le be n na kamfaa baŋ na, ka n jusoo sumayandi. Bituŋ ali si naa a loŋ ko, nte Yaawe faŋo le diyaamuta n na kamfaa kono ko, m maŋ lafi fulaŋ kafuñooyaa la.

Yeremiya 36:7

A si ke, ì ye woosii Yaawe ye ka a daani, moo-wo-moo ye yelema ka bo a la sila kuruŋo kaŋ, ka daaniri ke Yaawe la balafaa la. Kaatu ko, Yaawe ye jusukandoo niŋ kamfaa meŋ ke ñiŋ moolu kamma, a warabaata le.”

Yeremiya 21:12

Nte Yaawe ye ñiŋ ne fo ko: Alitolu Mansa Dawuda koomalankoolu, ali kiitii tilindiŋo taamandi fanikee-wo-fanikee, ka moo-wo-moo bondi a toorandilaa bulu, ì ye meŋ nakari, niŋ wo nte, n na kamfaa si mala ko dimbaa. A si mala, moo te soto noo la ka a faa, ali la kuu jawu kewolu kamma la.

Yeremiya 4:4

Alitolu Yahuuda niŋ Yerusalaamu moolu, ali ali sondomoo faŋo le sunna nte Yaawe ye. Niŋ wo nte, n na kamfaa si wuli ko dimbaa, a ye mala, moo te soto noo la ka a faa, ali la kuu jawu kewolu kamma la.”

3 Musa 26:28

wo to nte fanaa la kamfaa baa kaŋ, m be wo ñoŋ ne taamandi la ali kaŋ ko siiñaa woorowula, ali la junuboolu kamma la.

3 Musa 26:31

M be ali la saatewolu tumbuŋ na le fereŋ, ŋa ali la jalaŋ batudulaalu kenseŋyandi, aduŋ ali la sadaalu* seeroo te n seewondi la kotenke.

Yesaya 1:7

Jawoolu ye ali la bankoo kasaara, ì ye ali la saatewolu jani. Ì ye ali la katirifeŋolu bee domo ali ñaa koto, ali la kunkoolu kenseŋyaata, ko niŋ ñapinkannaalu ye dulaa meŋ boyinkaŋ.

Yeremiya 4:27

Yaawe ye ñiŋ ne fo ko: “Bankoo bee be kenseŋyaa la le, bari n te a muumewo buruka la fereŋ.

Yeremiya 7:17

Fo i maŋ a je baŋ, ì ka tara kuwolu mennu ke kaŋ Yahuuda saatewolu kono taariŋ, aniŋ Yerusalaamu mbeedoolu kaŋ?

Yeremiya 34:22

M be yaamaroo dii la le ka ì murundi naŋ ñiŋ saatewo kamma. Ì be a kele la le, ì ye a muta, ì ye dimbaa duŋ a la ka a jani. M be Yahuuda saatewolu ke la tumbuŋo le ti, moo te tara la siiriŋ jee.”

Niikuyaa Suukuwolu 1:13

“Nte Yerusalaamu saatee senuŋo! Yaawe ye dimbaa le kupi n kaŋ, a la janoo dunta fo n kuloo kono. A ye kutindiŋo le laa n ñaato, a ye n yelemandi n koo la, a ye n kenseŋo tu, a ye n tu keturiŋ las.

Esekiyeli 20:34

N na kamfaa waatoo la, m be ali diyaakuyaa bondi la naŋ niŋ m bulu sembemaa baa le la bantala bankoolu bee kaŋ, ali be janjandi daamennu to taariŋ.

Jakariya 1:2

Yaawe ko Jakariya ye ko, “N kamfaabaata ali mumuñolu kamma le.

Jakariya 7:14

Ko foñoo ka feŋo tindi ñaameŋ, ŋa ì janjandi bankoolu kaŋ wo le ñaama, ka ke tumarankewolu ti jee. Ì la bankoo kensemmaa tuta laariŋ, moo buka taa niŋ naa jee. Ñiŋ banku diimaa keta tumbuŋo ti.”

Yeremiya 8:3

Moo toomaalu mennu be tu la ñiŋ banku moo kuruŋolu kono, m be ì janjandi la dulaalu mennu to, saayaa le be fisiyaa la ì ye baluwo ti.” Yaawe Alihawaa Maariyo* le ye a fo.

Yeremiya 44:22

Yaawe maŋ ali la kuu jawu baaroolu niŋ ali la kuu ñewundiŋ kewo muña noo. Wo le ye a tinna ali la bankoo keta tumbuŋo ti ka kenseŋyaa, aniŋ ka ke danka feŋo ti, aduŋ moo te siiriŋ jee, ko a be ñaameŋ bii.

Niikuyaa Suukuwolu 1:1

Ayiwaalii, ñiŋ saatewo le kiideeriŋo be siiriŋ teŋ, meŋ be faariŋ nuŋ moolu la tep! A naata ke furuyaamusoo ti teŋ, meŋ na kuwo warata nuŋ bankoolu kono! Ate meŋ keta saatewolu kono musumansoo* ti, a naata ke jommusoo ti.

Niikuyaa Suukuwolu 5:18

A juubee, Siyoni Konkoo kenseŋo le tuta looriŋ, kunkuwuloolu be yaayi la a kaŋ.

Jakariya 1:6

Muna n na kumakaŋo aniŋ n na dandalaaroo, ŋa meŋ duŋ annabiyomoolu daa, n na dookuulaalu, fo a maŋ boyi ali mumuñolu kaŋ baŋ? Bituŋ ì naata tuubi, ì kumata ko: ‘Yaawe Alihawaa Maariyo ye ǹ joo ǹ kebaaroo le la aniŋ ǹ na sila kuruŋolu, a ye a ke ǹ na le ko, a ye a nata ñaameŋ.’ ”