Yeremiya 23:20 - Mandinka Bible

²⁰ Yaawe la kamfaa te sumayaa la, fo niŋ a ye a la lafoo bee timmandi, mennu be a sondomoo to. Wo luŋolu la, labandulaa to, ali be a kuwo fahaamu la le kendeke.

Yeremiya 23:20 Referans Kwoze

Yeremiya 30:24

Yaawe la kamfaa saŋaroo te sumayaa la, fo niŋ a ye a la feeroolu taa, a ye ì taamandi, mennu be a sondomoo to. Wo luŋo la, labandulaa to, ali be a kuwo fahaamu la le.

Yesaya 55:11

N ka n na kumoo meŋ fo, be wo le ñaama, a te muruŋ na n kaŋ kensenke, bari n lafita meŋ na, a be wo le timmandi la, ŋa a bula ka meŋ taamandi, a ka wo le ke.

Jakariya 1:6

Muna n na kumakaŋo aniŋ n na dandalaaroo, ŋa meŋ duŋ annabiyomoolu daa, n na dookuulaalu, fo a maŋ boyi ali mumuñolu kaŋ baŋ? Bituŋ ì naata tuubi, ì kumata ko: ‘Yaawe Alihawaa Maariyo ye ǹ joo ǹ kebaaroo le la aniŋ ǹ na sila kuruŋolu, a ye a ke ǹ na le ko, a ye a nata ñaameŋ.’ ”

Yesaya 14:24

Yaawe Alihawaa Maariyo kalita ko: “A te baayi la. Ŋa a feeroo siti ñaameŋ, a be ke la wo le ñaama, ŋa a kuwo nata ñaameŋ, a be loo la wo le ñaama.

Kuma Kotoomaalu 21:30

Ñaameŋ te jee, fahaamuru te jee, aduŋ feere te jee meŋ si taamandi noo Yaawe kaŋ.

1 Musa 49:1

Yaakuba ye a dinkewolu kumandi, a ko ì ye ko: Ali bee ye beŋ ñoo kaŋ, ŋa naa kuma fo ali ye, meŋ be ke la ali la siniŋ saama.

2 Mansoolu 23:26

Bari wo ñaa-wo-ñaa Yaawe tuta kamfaariŋ baake Yahuuda moolu kamma le, kaatu Mansa Manase ye kuu jawu jamaa le ke ka Yaawe kamfandi. Wo le ye a tinna a maŋ a la kamfaa fijoo bo Yahuuda moolu kaŋ.

1 Mansoolu 8:47

Ì be mutoo kono tuma meŋ, a si ke noo ì hakiloo ye naa yelema, ì ye tuubi ka i daani ko, ‘Ŋà junube kuwo le ke. Ŋà kuu kuruŋo le ke. Ŋà kuu jawu baa le ke.’

5 Musa 4:30

Niŋ ali bulata mantooroo kono, bataa siifaa bee laata ali kaŋ, ali be ali faŋ seyi la Yaawe ali la Alla ma le ka a la yaamaroolu muta.

2 Mansoolu 23:27

Aduŋ Yaawe ye ñiŋ ne fo ko, a be Yahuuda moolu bayi la le ka bo a ñaatiliŋo la, komeŋ a ye Banisirayilankoolu bayi ñaameŋ. A be a koo dii la Yerusalaamu saatewo la le, a ye meŋ tomboŋ a faŋo ye, aniŋ Yaawe Batudulaa Buŋo, a ko a be a too ke la daameŋ to, ka ke a batudulaa ti.

Yeremiya 4:28

Fo duniyaa si kumboo ñiŋ na, saŋ fatoolu ye fiŋ santo, bayiri ŋa a fo le, m pareeta a la le. N te sabari la, sako ka yelema.”

Yeremiya 51:12

Ali bandeeroo wulindi taamanseeroo ti ka Babiloni tata sansaŋolu boyinkaŋ, ali kelediŋ kantarilaalu bambandi jee kamma, ali ye kantarilaalu londi ì dulaalu to! Ali kelediŋolu wulindi ì ye deleŋo laa ì kamma!” Silaŋ, Yaawe ye a la natoo ke le fokabaŋ, a ye meŋ fo Babiloni la kuwo to.

Esekiyeli 21:5

Wo le to moolu bee be a loŋ na ko, nte Yaawe faŋo le ye n na hawusaroo bondi a laa kono ka faaroo ke a la, aduŋ n te a murundi la a laa kono kotenke.

Esekiyeli 21:10

Ŋa hawusaroo daa diyaa faaroo le kamma, fo a ka ŋalasi ko saŋ ŋalasoo. Seewoo banta le, kaatu n na mansa faŋo le jututa n na dandalaaroolu niŋ n na kuluuroo la, a maŋ wolu muta feŋ ti.