Sefaniya 2:10 - Mandinka Bible

¹⁰ Ì la faŋ waroo joo be ke la ñiŋ ne ti, ì la Yaawe Alihawaa Maariyo la moolu neŋo kaŋ, ka ì hadaañi:

Sefaniya 2:10 Referans Kwoze

Yesaya 16:6

Ŋà Mowabi la faŋ waroo moyi le, a la faŋ wara mooyaa tambiriŋo, a la faŋ sikandoo, a la konofaa aniŋ a la nendiroo, bari a la kibiroo, kuma kenseŋo doroŋ ne mu.

Yeremiya 48:29

“Ŋà Mowabi la faŋ waroo moyi le, a ye a faŋ wara baake ñaameŋ, ka a faŋ sikandi, a la faŋ waroo, a la konofaa, aniŋ a la sondome kufaŋo.

Sefaniya 2:8

Yaawe ko: “Ŋa Mowabi la nendiroolu moyi le, aniŋ Ammoninkoolu la hadaañiri kumoolu, ka n na moolu neŋ, ka kibiri ì la bankoo la.

1 Pita 5:5

Wo ñaa kiliŋo la, alitolu fondinkewolu, ali soŋ alifaalu ma. Ali ye i fammajii ñoo ye. Ali bee si wo fammajiyo duŋ ali la feetoofatoo ti, kaatu “Alla ka balaŋ faŋ wara moolu ma le, bari moolu mennu ye i fammajii, a ka hiina wolu ma le.”

Obadiya 1:3

Ali ye ali yaalu loo bere konko jaŋolu le kaŋ santo, ali be tankoo kono jee. Ali ye ñiŋ ne miira ko, moo te ali jindi noo la. Bari ali la faŋ waroo le ye ali neenee.

Daniyeli 4:37

Saayiŋ, nte Nebukanesa ye Arijana Mansoo tentu, ŋa a jayi, aduŋ ŋa a horoma le. A ka kuwo bee taamandi tiliŋo niŋ tooñaa le la, aduŋ niŋ moo-wo-moo ye a faŋ sikandi, a be a maarii jindi la le.

2 Musa 10:3

Wo to le Musa niŋ Haaruna taata Firawoona yaa, ì ko a ye ko, “Yaawe Hiburunkoolu* la Alla ye ñiŋ ne fo ko: I be i fammajii la n ye waati jumaa le? N na moolu bula ì ye taa, fo ì si m batu.

2 Musa 9:17

Hani saayiŋ, i ye i faŋ wara, i be balandiŋ ka n na moolu bula ì ye taa.

Niikuyaa Suukuwolu 1:9

Kosoo le be i la faani tuloo bala, i maŋ i labaŋo muta feŋ ti, wo le ye i la boyoo saŋarandi, i maŋ sabarindilaa soto. I kumboota, “Hee Yaawe, n na mantooroo juubee, n jawoolu ye i kutu n na le.”

Esekiyeli 25:6

Yaawe, m̀ Maariyo ye ñiŋ ne fo ko: “Alitolu seewooriŋo le ye ali buloolu kosi ka i doŋ, ka teelindiri denkiloolu laa aniŋ ka haasidiyaa tiliŋ Banisirayilankoolu niŋ ì la bankoo ma.

1 Taarika 16:21

Alla maŋ hani moo kiliŋ bula a ye ì mantoora. A ye mansoolu dandalaa ì la kuwo la le.

Yeremiya 12:14

Yaawe ye ñiŋ ne fo ko: “N na moolu Banisirayilankoolu dandanna bankoolu bee, mennu buloo laata keetaafeŋo kaŋ, ŋa meŋ dii ì la, wolu la kuwo fele: M be ì wutu la ì la bankoolu kaŋ ne, aduŋ m be Yahuuda moolu bondi la naŋ ì kono le.

Yeremiya 48:14

“Alitolu Mowabinkoolu, ali si a fo noo ali faŋ ye ñaadii le ko, ‘Ntolu mu kelejawaroolu le ti, aniŋ kelediŋ fatiŋolu’?

Obadiya 1:11

Biriŋ jawoolu dunta Yerusalaamu, ka a feŋolu bee alikuuri* ñoo teema, aniŋ ka a fankoo bee taa, ali ye i baŋ ne ka ì maakoyi. Wo luŋo la, ali fanaalu tarata kuruŋyaariŋ ne ko wo moolu.