Kawandilaa 12:11 - Mandinka Bible

¹¹ Moo ñaamendiŋo la kumakaŋolu ka moo kenkeŋ ne ko kantarilaŋ dokoo. A la kuma kotoomaalu mulunta le ko peruu meluŋolu. Kumoolu ñiŋ bota Kantarilaa doo le bulu.

Kawandilaa 12:11 Referans Kwoze

Hiburunkoolu 4:12

Alla la kumoo be baluuriŋ ne, a nene buka lamfu. A diyaata le ka tambi hawusari* daa fuloo bee la. A ka duŋ konoto le ka sondomoo niŋ nooroo talaa, a ka cokoo niŋ yuwo bondi ñoo bala le, aduŋ a ka miiroolu niŋ feeroolu kiitindi le, mennu be maaboriŋ sondomoo kono.

Kiilaalu 2:37

Kabiriŋ moolu ye ñiŋ moyi, ì niyo toorata baake. Bituŋ ì ko Pita niŋ kiilaa* doolu ye ko, “M̀ baadiŋolu, ǹ ñanta muŋ ne ke la saayiŋ?”

Esekiyeli 34:23

M be kantarilaa kiliŋ ne ke la ì kunna, meŋ mu n na dookuulaa Dawuda koomalanka kiliŋ ti. A be ì daañini la le, ka ke ì la kantarilaa ti.

Yeremiya 23:29

“Nte la kumoo ka munta le ko dimbaa, aduŋ a ka munta le fanaa ko maritoo, meŋ ka bere baa busa ka a janjaŋ.” Yaawe le ye a fo.

2 Korintinkoolu 10:4

Ntolu la kelejooraŋolu maŋ ke ñiŋ duniyaa kelejooraŋolu ti, bari ŋà Alla la sembe baa le soto ka tata bambandiŋolu kasaara. Ǹ ka moolu la soosooroolu tiñaa le,

Yohana 3:10

Yeesu ye a jaabi ko, “Ite mu Banisirayilankoolu la karammoo le ti, i maŋ ñiŋ kuwolu loŋ?

Yesaya 40:11

A ka a la moolu topatoo le ko kantarilaa ka koorewo kanta ñaameŋ. A ka saajiiriŋolu katandi a faŋo la le, ì ye tara a kara la. A ka saajii dimbaalu kenkeŋ kuuke le.

Kuma Kotoomaalu 22:17

I tuloo loo, i ye i lamoyi moo ñaamendiŋolu la kumoolu la. N ka meŋ karandi i si a tu i sondomoo kono,

Yohana 10:14

Nte le mu kantarilaa betoo ti. Ŋa n na saajiyolu loŋ ne, aduŋ n na saajiyolu ye n loŋ ne,

Matiyu 3:7

Bari kabiriŋ a ye Farisewolu* niŋ Sadusewolu* jamaalu je, ì ka naa batisewo* la, a ko ì ye ko, “Alitolu daŋari koorewo, jumaa le ye ali dandalaa ka bori kamfaa ma, meŋ ka naa?

Yesaya 22:23

“M be a pempeŋ na dulaa bambandiŋo le to ko feŋ dendulaa. Ate le be buuñaa naati la a la kaabiiloo bee ye.

Jabuuroolu 80:1

Banisirayila Kantalaa, i tuloo tu ǹ to, ite meŋ ka Yusufa koomalankoolu kenkeŋ ko saajii koorewo. Ite meŋ na mansasiiraŋo be kerubu malaayikoolu* teema, i la kallankeeyaa* faramansandi,

Jabuuroolu 23:1

Yaawe* le mu n kantalaa ti, feŋ te n dasa la.

1 Pita 5:4

Aduŋ niŋ Kantarilaa Kuntii Baa fintita naŋ, ali be kañeerinaafoo le soto la soorifeŋo ti, meŋ na kallankeeyaa nene te yeemaŋ na.

Hiburunkoolu 13:20

Alla meŋ ka kayiroo dii, ŋa a daani ali ye le. Ate le ye m̀ Maarii Yeesu wulindi ka bo saayaa kono ka baluu kotenke. Ñiŋ Yeesu naata ke Kantarilaa Baa le ti ntolu ye, a la saajiyolu, ka bo niŋ a faŋo yeloo la, meŋ mu yeloo ti a la badaa-badaa kambeŋo ye.

Esira 9:8

Bari waati sutuŋ hapoo kono, Yaawe ǹ na Alla, i ye hiinoo yitandi ǹ na le. I ye moo toomaalu tu ǹ kono le, aduŋ i ye tuukuraŋo dii ǹ na i la dulaa senuŋo to le. Ka bo niŋ wo la, i ye ǹ ñaalu fanundi le, aduŋ i ye dahaandiŋ dii ǹ na le, ǹ na joŋyaa kono.

1 Musa 49:24

Bari i la kaloo tuta bambandiŋ ne, i buloo tariyaata, a bambanta. I semboo bota Yaakuba la Sembetii Baa le bulu, Isirayila Kantalaa, Isirayila la Bere baa.

Kawandilaa 7:5

Moo ñaamendiŋo la jalayiroo lamoyoo, wo le ye fisa toolewo la denkiloo lamoyoo ti.

Kawandilaa 10:12

Moo ñaamendiŋo la kumakaŋo ka hiinoo le saabu a faŋo ma, bari toolewo faŋo neŋo le ka a kasaara.

Kuma Kotoomaalu 10:21

Moo tilindiŋo la kumoo ka moo jamaa le nafaa, bari hakilintaŋyaa le ka toolewolu faa.