1 Musa 1:6 - Mandinka Bible

⁶ Bituŋ Alla kumata ko, “Saŋ fatoo ye soto jiyolu teema, a ye jiyolu bondi ñoo to.”

1 Musa 1:6 Referans Kwoze

Yuuba 37:18

I si saŋo wanka noo baŋ, ka jaa ko famfelendaŋo, ko ate ye a ke ñaameŋ?

Yeremiya 51:15

Alla le ye bankoo daa a semboo la, a ye duniyaa sotondi a la ñaameŋo la, a ye saŋ fatoolu wanka ka bo a la londoo la.

Jabuuroolu 33:6

Yaawe ye saŋ fatoolu daa a la kumoo le la, tiloo, karoo, aniŋ looloolu daata a la kumakaŋo le la.

Jabuuroolu 104:2

I ye i faŋ murubeŋ niŋ mala baa le la. Ite le ye saŋ fatoolu wanka ko tiriliisoo*.

Jabuuroolu 33:9

Kabiriŋ a kumata, duniyaa daata, a ye yaamaroo dii, feŋo bee fintita.

Jabuuroolu 148:4

Saŋ fatoo daŋolu, aniŋ jiyolu mennu be saŋ fatoolu ye santo la, ali a jayi.

Jakariya 12:1

Yaawe* la kumoo fele, a ye meŋ lankenemayandi Banisirayila la kuwo to. Yaawe meŋ ye saŋ fatoolu wanka, a ye bankoo daa, a ye niyo duŋ hadamadiŋo la, a ye ñiŋ ne fo ko:

Jabuuroolu 19:1

Saŋ fatoolu ka Alla la kallankeeyaa* bankee le, minaayoolu ka a buloo la daaroo kankulaa le.

1 Musa 1:20

Bituŋ Alla kumata ko, “Jiyo kono ye faa niilamaa feŋolu la, kunoolu ye tii santo.”

Yuuba 26:13

Alla le ka saŋo baloo seneyandi niŋ a la foñoo la. A faŋo buloo le ye saa baa faa, a tariyaata ñaa-wo-ñaa ka kana.

Jabuuroolu 150:1

Ali Yaawe* jayi. Ali Alla jayi a la Arijanoo kono, ali a jayi saŋ fatoo kono, a la tata baa.

Yuuba 37:11

Ate le fanaa ka tawaloolu kono fandi jiyo la, a ye ì wanka, ì ye tara saŋ ŋalasoo fintindi kaŋ.

Kawandilaa 11:3

Niŋ tawaloolu faata jiyo la, ì ka sanjoo boŋ ne duniyaa kono. Yiroo, fo a boyita bulubaa le la baŋ, waraŋ maraa la, bari a boyita daameŋ, a ka i laa wo le to.

1 Musa 1:14

Bituŋ Alla kumata ko, “Malafeŋolu ye ke saŋo bala ka suutoo niŋ tiloo bondi ñoo to, aniŋ ì ye ke taamanseeri ti tiloolu la, saŋolu aniŋ waati looriŋolu,

Yeremiya 10:10

Bari ite Yaawe le mu Alla tooñaa ti, ite le mu Alla baluuriŋo niŋ badaa-badaa Mansoo ti. I la kamfaa ka bankoo jarajarandi le, bankoolu buka i la jusukandoo dunoo taa noo.

2 Pita 3:5

Ì ye ì ñaa laa ñiŋ tooñaa kaŋ tawunteeyaa kono ko, jamaani jaŋ koomanto, saŋ fatoolu sotota ka bo niŋ Alla la kumoo le la, aniŋ duniyaa daata jiyo le la, bankoo bota jiyo le kono.

Yesaya 40:22

A be siiriŋ mansasiiraŋo le kaŋ duniyaa bee santo la, aduŋ moolu ka munta a fee le ko jatatoŋolu. A ye saŋ fatoolu waree le ko ridoo, aduŋ a ka a wanka le ko tiriliisoo*, ka ke sabatidulaa ti.

Jabuuroolu 19:2

Luŋ-wo-luŋ ì ka tu diyaamoo la le, suuto-wo-suuto ì ka londoo le feenee.