Zakarii 6:13 - Mbeti ti Nzapa - Tënë so amu fini

¹³ Biani, lo laa lo yeke kiri ti leke kota da ni. Lo yeke yu abongo ti gbia, lo yeke duti na ndö ti mbata ti gbia ti sara komandema na ndö ti azo. Mbeni wayango-sandaga ayeke duti na tere ti lo. Ala use kue ayeke ma tere na popo ti ala nzoni.

Zakarii 6:13 Referans Kwoze

Abia (Psaumes) 110:4

KOTA GBIA adeba yanga ti lo, lo tene: “Mo yeke duti wayango-sandaga kpu na kpu tongana ti Melkisedeke.” KOTA GBIA ayeke kiri na ndö ti tënë ti lo pepe.

Ahebro 3:1

Tongaso, a-ita azo ti Nzapa, ala so lo iri ala ti ga azo ti lo, ayeke nzoni ala baa ndo na Jésus, lo so Nzapa atokua lo titene lo ga kota wayango-sandaga ti mabe so e yeke fa tënë ni.

Ésaïe 22:24

Azo ti sewa ti lo kue, akota zo na akete zo, a yeke kanga ala na tere ti lo tongana ti so a yeke kanga akungba ti ya ti da na tere ti pondi so a pika si alinda na ya ti dere; a yeke kanga akungba ni, ti londo na akete du ti sembe ti si na akota sembe. So nengo kungba!

Ésaïe 11:10

Na lango ni so, lo so ayeke molenge ti Yese ayeke ga bendere ndali ti azo ti sese. Amara nde ayeke gi lo; ndo so lo yeke duti daa, gonda ti Nzapa ayeke mu ni kue.

Ésaïe 9:6

Fade lengo-gbia ti lo ayeke mu ndo ti gue na ni, lo yeke mu siriri so ayeke hunzi pepe, lo yeke duti na ndö ti mbata ti gbia David si lo yeke le-gbia na kodro ti lo. Lo yeke sara titene kodro-gbia ni akpengba na lege ti sarango ye so ayeke na legeni nga na lege ti sarango ye ti mbirimbiri, ti to nda ni laso ti gue na ni ngbii kpu na kpu. Ye so KOTA GBIA so ayeke na ndö ti dunia kue ayeke sara na lege ti kota nzara ti be ti lo laa.

Abia (Psaumes) 21:5

Lo hunda na mo fini, mo mu ni na lo awe: fini so ayeke ninga si angba kpu na kpu.

Aye so Nzapa afa 3:21

“Zo so aso benda, fade mbi yeke mu na lo lege ti duti na tere ti mbi, na ndö ti mbata ti mbi ti gbia, tongana ti so mbi so benda si mbi duti na tere ti Babâ ti mbi na ndö ti mbata ti lo ti gbia so.

1 Pierre 3:22

Lo gue na yayu, lo duti na tere ti Nzapa na mbage ti maboko ti lo ti koli si *a-ange, ayingo so ayeke na komandema na ala so ayeke na ngangu ayeke na gbe ti lo.

Ahebro 6:20

Jésus ali na ndo so kozo ti e nga ndali ti e. Lo ga kota wayango-sandaga kpu na kpu tongana ti Melkisedeke.

Kolose 1:2

si e tokua mbeti so na a-ita, azo ti Nzapa so ayeke na gbata ti Kolose, ala so ama na be na Christ si ala ga oko na lo. Ayeke nzoni Nzapa Babâ ti e asara nzoni be na ala si amu na ala siriri.

Rome 5:1

So e ga mbirimbiri na lege ti mabe awe, e yeke na siriri na Nzapa na lege ti Jésus Christ, *Kota Gbia ti e.

Zakarii 6:11

Fade mo mu wen ti nginza na lôro, mo leke na kpoto ti gbia, mo zia na li ti kota wayango-sandaga, Yeshua, molenge ti Yosadak.

Zakarii 4:14

Tongaso lo tene na mbi: “Akeke ti olive ni ayeke akoli so a tuku mafuta na li ti ala si a zia ala nde ndali ti kua ti KOTA GBIA, lo so lo yeke Makonzi ti sese kue.”

Mishe 5:4

Lo wani laa lo yeke mu siriri na azo. “Tongana azo ti Asirii aga ti mu kodro ti e si ala li na ya ti ayangbo ti agbia ti e, fade e yeke tokua azo ti li ni mbarambara na amakonzi miombe ti tiri bira na ala.

Jérémie 23:6

Na ngoi ti lo, fade a yeke soo kodro-gbia ti Juda, mbeni ye ti sioni ti si na Israel ayeke duti daa pepe. Iri so fade azo ayeke iri na lo laa: ‘KOTA GBIA ayeke mbirimbiri ti e.’

Ésaïe 54:10

Ataa ahoto ahon na mbeni ndo nde, ataa akete hoto ayingi, fade ndoye ti mbi na mbage ti mo ayeke hunzi laoko pepe, *mbuki ti siriri ti mbi na mo ayeke yingi laoko pepe. Mbi KOTA GBIA so mbi yeke baa mawa ti mo laa mbi tene tënë so na mo.”

Tongo nda ti aye 14:18

Melkisedeke, gbia ti kodro ti Salem, aga na mapa na vin. Melkisedeke ayeke wayango-sandaga ti Nzapa, Nzapa so ayeke na yayu kâ na ndö ti aye kue.

Abia (Psaumes) 110:1

Bia ti David. So tënë ti yanga ti *KOTA GBIA so lo tene na Kota Gbia ti mbi laa: “Duti na mbage ti maboko ti mbi ti koli, mbi yeke sara titene awato ti mo aga tongana mbata ti gbe ti gere ti mo si.”

Ésaïe 9:7

*KOTA GBIA atokua mbeni tënë na tere ti azo ti Jacob, tënë ni ati na ndö ti Israel.

Jérémie 23:5

“So tënë ti yanga ti KOTA GBIA laa: Baa, mbeni lango ayeke ga so mbi yeke sara titene taa *hale ti David abaa gigi. Lo yeke sigigi tongana kete keke so asigigi na ya ti sese. Lo yeke le-gbia tongana nzoni gbia, lo yeke sara ye na lege ti ndara, lo yeke fâ ngbanga mbirimbiri si lo yeke sara ye ti mbirimbiri na ya ti kodro ni.

Jérémie 33:15

Na lango ni so, gi na ngoi ni so, mbi yeke sara titene taa *hale ti David abaa gigi. Lo yeke sigigi tongana kete keke so asigigi na ya ti sese, lo yeke fâ ngbanga mbirimbiri si lo yeke sara ye ti mbirimbiri na ya ti kodro ni.

Zakarii 4:9

“Zorobabel laa alu agere ti kota da ni, lo laa lo yeke hunzi kua ti da ni.” Tongana ye ni asi, fade ala yeke hinga atene, KOTA GBIA so ayeke na ndö ti dunia kue laa atokua mbi na ala.

2 Samuel 7:13

Lo laa lo yeke sara da ndali ti mbi; mbi yeke sara titene lengo-gbia ti lo akpengba kpu na kpu.

Abia (Psaumes) 21:4

Mo ga ti sara tufa na ndö ti lo, mo ga ti mu na lo anzoni ye mingi; mo zia kpoto ti lôro na li ti lo.

Ésaïe 9:5

Biani, a du na e molenge awe, a mu na e molenge-koli awe. Nzapa azia komandema na maboko ti lo. Fade a yeke di iri ti lo: Zo ti kpene, Wamungo-wango, Nzapa ti ngangu, Babâ ti lakue lakue, Makonzi ti siriri.