Zakarii 10:1 - Mbeti ti Nzapa - Tënë so amu fini

¹ Ala hunda na *KOTA GBIA titene lo tokua na ala tanga ti ngu-Nzapa. KOTA GBIA laa ayeke sara si ngangu pupu ti ngu-Nzapa aya; fade lo yeke sara nga titene ngu-Nzapa apika mingi si lo yeke sara titene kugbe ti kasa amai na yaka ti zo oko oko.

Zakarii 10:1 Referans Kwoze

Ésaïe 44:3

Biani, fade mbi yeke tuku ngu na ndö ti sese so ayeke na nzara ti ngu, mbi yeke sara titene akete ngu asua na ndö ti holengo sese. Mbi yeke tokua yingo ti mbi na ndö ti amolenge ti mo si mbi yeke sara tufa na ndö ti *ahale ti mo.

Jacques 5:7

A-ita, ala kanga be ti ala ti ku lango ti gango ti *Kota Gbia. Ala baa zo ti fango yaka: lo yeke kanga be ti lo ti ku anzoni kobe ti yaka ti lo, lo yeke ku ngbii akozo ngu-Nzapa na angu ti ndani apika si.

Ezekiel 36:37

“Tënë so mbi Kota Gbia NZAPA, mbi tene ayeke so: Mbi yeke kiri ti zia lege na azo ti Israel ti gi mbi si mbi yeke sara ye ndali ti ala; mbi yeke sara titene ala kiri awu mingi tongana bongbi ti ataba.

Ésaïe 30:23

Fade KOTA GBIA ayeke tokua ngu-Nzapa na ndö ti ale ti kobe so mo lu. Kobe so sese ayeke mu na mo ayeke duti gbani gbani si ayeke nzere mingi. Na lango ni so, anyama ti mo ayeke gue ti te pere na ndo so akono.

Abia (Psaumes) 65:9

Azo so ayeke na nda ti sese kue, fade ala yeke sara mbeto ti mo ndali ti aye ti kpene so mo yeke sara. Na mbage ti To, na mbage ti Do, mo sara si azo adekongo na ngia.

Ndia ti fani use ni 28:23

Le ti nduzu so ayeke na ndö ti li ti ala ayeke ga tongana bengba wen; sese so ayeke na gbe ti gere ti ala ayeke ga tongana wen.

Jean 16:23

“Na lango ni so, ala yeke hunda ande mbi na mbeni ye pepe. Biani, mbi tene na ala taa-tënë: ye so kue ala hunda na iri ti mbi, fade Babâ ayeke mu ni na ala.

Mishe 5:7

Azo ti Israel so ayeke ngba na fini na popo ti amara gbani gbani, ayeke ga tongana bamara na popo ti anyama ti ngonda, tongana kete bamara na popo ti ataba. Na hongo ti lo na popo ti ala, lo yeke do ala na gere ti lo si lo yeke suru ya ti ala; zo oko alingbi ti zi ala na maboko ti lo pepe.

Amos 4:7

“So angba na ala nze ota titene ala to nda ti fâ ale ti kobe ti ala, mbi laa, mbi gbanzi ngu-Nzapa na ala. Mbi sara si ngu-Nzapa apika na mbeni gbata si na mbeni gbata, ngu ni apika pepe. Mbi sara si ngu-Nzapa apika na ndö ti mbeni yaka si mbeni yaka angba na holengo ni, ngbanga ti so ngu ayeke daa pepe.

Osée 10:12

Ala lu ye alingbi na ye ti mbirimbiri si fade ala yeke ko ye alingbi na nzoni be; ala fâ fini yaka ti ala! Ngoi titene ala gi KOTA GBIA alingbi awe; ala gi lo ngbii lo ga lo sara si ye ti mbirimbiri atuku na ndö ti ala.

Ezekiel 34:26

Mbi yeke sara tufa na ndö ti ala nga na ndö ti ando nde nde so ayeke na tere ti hoto ti mbi. Mbi yeke sara titene ngu-Nzapa apika na ngoi ni, ngu-Nzapa so ayeke sara nzoni na zo.

Jérémie 14:22

Na popo ti asenge senge ye ti amara nde, mbeni yanda oko ayeke daa so alingbi ti sara si ngu apika? Yayu laa asara si ngu ayeke pika? KOTA GBIA Nzapa ti e, mo laa mo sara ye so pepe? E zia be ti e ti ku mo, ngbanga ti so mo laa mo sara aye so kue.”

Jérémie 10:13

So lo dekongo awe, gba ti angu abongbi tere na yayu, lo sara si angbongboro mbinda alondo na nda ti sese kue si ayeke ma na nduzu, lo sara si wâ ti bekpa amu lege na ngu-Nzapa ti pika; lo sara si pupu alondo na ndo so lo bata ala daa ti sigigi.

Ésaïe 5:6

Fade mbi yeke zia yaka ni aga ngonda; zo ti fango *aguruma ni ayeke daa pepe, zo ti sukulango gbe ni ayeke daa pepe; aki na asioni kamba ti aki ayeke suku amu ndö ni kue. Fade mbi yeke mu yanga na ambinda ti gbanzi ngu ti pika na ndö ti yaka ni.”

Amato 16:15

Tongana ngia amu yanga ti gbia, azo ayeke duti na fini; nzoni be ti lo ayeke tongana ngu-Nzapa so ayeke sara titene tere ti zo ade.

Abia (Psaumes) 104:13

Na ndo ti duti ti mo kâ na nduzu, mo tokua ngu na ndö ti ahoto; mo sara si sese asi singo na anzoni ye ti mo.

Jérémie 51:16

So lo dekongo awe, gba ti angu abongbi tere na yayu, lo sara si angbongboro mbinda alondo na nda ti sese kue si ayeke ma na nduzu, lo sara si wâ ti bekpa amu lege na ngu-Nzapa ti pika; lo sara si pupu alondo na ndo so lo bata ala daa ti sigigi.

1 Agbia 17:1

Élie, zo ti kete kodro ti Tishebe, na sese ti Galaad atene na gbia Akab, atene: “*KOTA GBIA, Nzapa ti Israel ayeke na fini! Lo so mbi yeke sara na lo, mbi tene na mo: ‘Na ya ti angu so ayeke ga, ngu-Nzapa ayeke pika oko pepe, ataa ngu ti pere ayeke duti daa pepe, gi tongana mbi mu yanga si!’ ”

1 Korente 3:6

Mbi laa mbi lu ye, Apolos atuku ngu na ndö ni, me Nzapa asara si ye ni asigigi si amai.

Osée 6:3

Tongaso, e sara ngangu ti hinga KOTA GBIA. Nyen na nyen kue, lo yeke ga tongana lâ so ayeke sigigi ka na ndaperere; fade lo yeke ga na mbage ti e tongana ngu-Nzapa, tongana tanga ti ngu-Nzapa so ayeke tuku na ndö ti sese.”

Abia (Psaumes) 72:6

Ayeke nzoni gbia ni aga tongana ngu-Nzapa so ayeke pika na ndö ti pere so a fâ li ni awe; lo ga tongana ngu-Nzapa so atuku na ndö ti sese ngbii si awoko!

Mbeti ti Job 29:23

Ala yeke ku mbi tongana ti so zo ayeke ku ngu-Nzapa. Ala zi yanga ti ala ti ku tongana ti so sese ayeke ku akozo ngu-Nzapa.

Abia (Psaumes) 135:7

Lo sara si ambinda alondo kâ na nda ti sese si ague na nduzu; lo sara wâ ti bekpa titene ngu-Nzapa apika, lo sigigi na pupu na ndo so lo bata ni daa.

Jérémie 5:24

Ala tene na be ti ala pepe, atene: ‘Ayeke nzoni e kpe mbeto ti KOTA GBIA, Nzapa ti e, lo so lo yeke mu na e ngu-Nzapa na ngoi ni so alingbi: ngu-Nzapa ti kozo ngoi, ngu-Nzapa ti ndangba ngoi. Na ya ti ngu oko oko, lo laa lo yeke bata na e ngoi ti kongo ale ti kobe.’