Sigingo 22:17 - Mbeti ti Nzapa - Tënë so amu fini

¹⁷ “Wali so ayeke zo ti yoro, fade ala zia lo, lo ngba na fini pepe.

Sigingo 22:17 Referans Kwoze

Tongo nda ti aye 34:12

Ala fa na mbi kota nginza ti peko ti lo nga na gba ti kadoo. Fade mbi yeke mu na ala ye so kue ala yeke hunda na mbi; me gi ye oko, ala mu na mbi molenge-wali ni titene lo ga wali ti mbi.”

1 Samuel 18:25

Saul atene: “Ala tene na lo, atene: ‘Gbia ahunda titene mo ka nginza na peko ti wali ni pepe. Me lo hunda gi *pito ngbangbo oko ti azo ti Filistii tongana kiringo peko ti sioni na awato ti lo.’ ” Saul aleke fade ye kue titene David ati na maboko ti azo ti Filistii.

Ndia ti fani use ni 22:29

fade koli ni ayeke futa na babâ ti maseka-wali ni ale ti nginza baleoku. Na pekoni, lo yeke mu maseka-wali ni ti ga wali ti lo. Na lango ti fini ti lo kue, lo lingbi ti tumba wali ni oko pepe.

Tongo nda ti aye 23:16

Abraham ama tere na Efron; lo diko ale ti nginza alingbi na ti so Efron adiko na le ti azo ti mara ti Het kue so si lo mu na lo. Wungo ti nginza ni ayeke ale ti nginza ngbangbo osio, so azo ayeke vo na ye na ngoi ni kâ.

Tongo nda ti aye 30:20

Lo tene: “Nzapa amu na mbi mbeni pendere kadoo! Ti fadeso, fade koli ti mbi ayeke ne mbi, ngbanga ti so mbi du na lo amolenge-koli omene awe.” Lo di iri ti molenge ni Zabulon.

Awayango-sandaga 20:6

“Zo so agi lege ti hunda yingo ti akuâ, so ayeke tongana vorongo anzapa nde, fade mbi yeke ga na tere ti lo si mbi yeke tumba lo na popo ti azo ti Israel.

Ndia ti fani use ni 18:10

Ala azo ti Israel, alingbi a wara na popo ti ala pepe mbeni zo oko so ayeke gbi molenge ti lo ti koli wala molenge ti lo ti wali ti mu na *sandaga. Alingbi a wara na popo ti ala pepe azo ti sarango mazi, azo ti bango nda ti aye, azo ti bingo zeke, azo ti yoro,

1 Samuel 28:3

So Samuel akui, azo ti Israel kue atoto kuâ ti lo si ala lu lo na kodro ti lo, na Rama. Kozoni, Saul akanga lege titene azo ti kodro ti lo ague, ahunda yingo ti akuâ wala ti atoro.