Osée 7:1 - Mbeti ti Nzapa - Tënë so amu fini

¹ si mbi ye ti kai kobela ti Israel, sioni ti Efraim na sioni sarango ye ti azo ti Samarii ayeke sigigi polele. Azo ayeke handa amba ti ala ti mu ye ti ala, azo ti nzi ayeke li na ya ti da ti nzi ye ti azo, asioni zo amu ndö ti alege kue.

Osée 7:1 Referans Kwoze

Osée 7:13

“Mawa na azo ti Efraim, ngbanga ti so ala kpe yongoro na tere ti mbi! Kota kpale na ndö ti ala, ngbanga ti so ala tomboka na tere ti mbi! Ala so ayeke tene mvene na tere ti mbi so, fade mbi yeke zi ala tongana nyen?

Osée 6:4

KOTA GBIA akiri tënë na ala: “Mo Efraim, fade mbi yeke sara nyen na mo? Mo Juda, fade mbi yeke sara nyen na mo? Yengo so ala ye na mbi ayeke tongana mbinda ti ndaperere, ayeke tongana ngu ti pere ti ndaperere so ayeke hon hongo.

Nzoni Tënë so Luc asu na mbeti 19:42

Lo tene: “Âa! Tongana mo nga, mo hinga fade ye so alingbi ti mu na mo siriri! Me mawa ni ayeke so ye ni angba na hondengo ni si le ti mo abaa ni pepe!

Osée 4:2

Ye so ahon ndoni na ya ti kodro ni ayeke dengo ba ti mvene, handango zo, fango zo, nzi, gingo wali wala gingo koli ti zo, tukungo mene na peko ti tere, na peko ti tere.

Nzoni Tënë so Luc asu na mbeti 13:34

“Jérusalem! Jérusalem! Mo so mo yeke fâ awayanga-Nzapa si mo yeke bo na têne azo so Nzapa atokua ala na mo! Lege mingi, mbi ye fade ti bongbi azo ti mo na gbe ti mbi tongana ti so mama ti kondo ayeke bongbi amolenge ti lo na gbe ti maboko ti lo, me mo yeda pepe!

Matthieu 23:37

“Jérusalem! Jérusalem! Mo so mo yeke fâ awayanga-Nzapa; azo so Nzapa atokua ala na mo, mo bo ala na têne ti fâ ala. Lege mingi, mbi ye fade ti bongbi azo ti mo na gbe ti mbi tongana ti so mama ti kondo ayeke bongbi amolenge ti lo na gbe ti maboko ti lo, me mo yeda pepe!

Mishe 6:16

Ala yeke bata gi lege ti ambela ti gbia Omri, nga na lege ti sarango ye kue ti asewa ti Akab. Ala yeke sara gi aye so agbia ni afa na ala. Ndani laa, fade mbi yeke buba gbata ti ala si azo ti gbata ni ayeke ga ye ti ngia na le ti azo. Kamene so agbu le ti azo ti mbi so, fade kamene ni ayeke kiri ti gbu le ti ala.”

Amos 8:14

Azo so kue ayeke deba na iri ti sioni yanda ti Samarii, ala so kue ayeke deba, atene: ‘nzapa ti Dan ayeke na fini!’, ‘lege ti vorongo nzapa ti Bersheba ayeke daa.’ Fade azo so kue ayeke ti na sese, ala yeke kiri ti londo pepe.”

Osée 10:5

Azo so alango na Samarii, fade ala yeke sara mbeto titene kete bagara so a sara na lôro si ayeke na kodro ti Bet-Aven so, azo amu ni ahon na ni. Awayango-sandaga ti mvene ayeke sara mua ndali ti bagara ni. Ayeke nzoni ala sara ngia fadeso ma, ngbanga ti so a zi gonda ti lo na popo ti ala, a hon na ni yongoro awe.

Osée 8:9

Azo ti Efraim amu lege ague na sese ti Asirii. Ti lele ti ngonda, lo ye ti sara ye gi lo oko, me azo ti Efraim amu nginza ti vo na andeko.

Osée 8:5

Ala azo ti Samarii, be ti mbi alondo na bango kete bagara ti ala ni! Ngonzo ti mbi alondo tongana wâ na tere ti ala awe. Ala yeke ngba ngbii asi lawa si ala ga *nzoni?

Osée 5:1

*KOTA GBIA atene: “Ala awayango-sandaga, ala ma tënë so, ala azo ti Israel, ala duti kpoo, ala ma tënë so, ala asewa ti gbia, ala dingi mê ti ala, ala ma tënë so: ala laa alingbi fade ti fâ ngbanga mbirimbiri, me kâ na Mispa, ala ga tongana kuku, ala ga tongana gbanda so a zia na ndö ti hoto ti Tabor;

Osée 4:17

Azo ti Efraim abongbi na ayanda; zia ala!

Ezekiel 23:4

Iri ti yaya ni ayeke Ohola, iri ti ngambe ni Oholiba. Yaya ni so ayeke Samarii, ngambe ni ayeke Jérusalem. Ala use kue aga ti mbi si ala du amolenge-koli na amolenge-wali.

Ezekiel 16:46

Yaya ti mo ti wali so ayeke na Banga ayeke Samarii, lo na agbata so ayeke nduru na lo. Ngambe ti mo ti wali so ayeke na Mbongo ayeke Sodome, lo na agbata so ayeke nduru na lo.

Jérémie 51:9

– “E ye ti kai kobela na tere ti Babilone, me tere ti lo aga nzoni pepe. Ayeke nzoni e zia lo, zo oko oko akiri na kodro ti lo. Biani, ngbanga so ati na ndö ti lo ayeke ngangu mingi; ague ngbii asi na le ti nduzu, ague ngbii asi na ambinda.

Ésaïe 59:12

Biani *KOTA GBIA, fani mingi, e ke ndia ti mo. Asiokpari ti e abi tënë na li ti e; lakue kengo ndia ti e agbu tere ti e si aga ye oko; e hinga asioni ti e:

Ésaïe 28:1

So mawa na gbata ti Samarii so akpa kpoto ti gbia! Azo ti Efraim so ayeke angbaa ti samba ayeke pika kate ti ala ndali ni. Gbata ni ayeke na nduzu ti popo-hoto so akobe ayeke le daa mingi. Gbata ni akpa kongo so awoko awe si a zia na li ti azo ti sara pendere ti ala, azo so anyon vin si ahon ndö ti ala.

Ezekiel 24:13

Jérusalem, mo ga *sioni ndali ti sarango ye ti potopoto ti mo. Mbi sukula mo titene mo ga *nzoni, me mbi sara gbaa. Tongaso, kozo titene mo ga *nzoni, fade ngonzo ti mbi ti wâ ayeke londo na tere ti mo ngbii be ti mbi ade si.

Osée 11:8

“Efraim, mbi lingbi ti sara na mo tongana nyen? Israel, mbi lingbi ti ka mo tongana nyen? Mbi lingbi ti sara na mo ye so mbi sara ando na agbata ti Adma na ti Seboim so tongana nyen? Be ti mbi ado si mawa ti mo agbu be ti mbi mingi.

Ésaïe 59:13

e ke ndia ti mo, e bere tënë ti mo, e ke ti mu peko ti mo, Nzapa ti e, e tene gi atënë ti sarango ngangu na zo nga na sarango ngangu li. Ye so e leke na be ti e na ye so e gbu li ti e daa ayeke gi atënë ti mvene.

Ésaïe 59:14

Ndani laa sarango ye na legeni akiri na peko, fango ngbanga ti mbirimbiri ayeke yongoro. Na be ti kodro, tenengo taa-tënë ati na sese, sarango ye na legeni ayeke daa mbeni pepe.

Osée 12:1

KOTA GBIA atene: “Azo ti Efraim angoro mbi na tënë ti mvene, azo ti Israel angoro mbi na tënë ti handango ndo. Azo ti Juda angba ti tambula na Nzapa, me ala ngba ti sara na anzapa nde.”

Osée 12:2

Pupu aga kobe ti azo ti Efraim, ala yeke tumba peko ti pupu ti To, ti londo na ndaperere ngbii asi na lakui; ala yeke tene mvene mingi mingi si ala yeke sara ngangu na azo. Ala na azo ti Asirii aleke tënë ti ga *ambuki, ala yeke tokua mafuta na azo ti Ezipte.

Amos 3:9

Na ndö ti ayangbo ti gbata ti Asdod, ala dekongo; na ndö ti ayangbo ti Ezipte, ala dekongo, ala tene: “Ala bongbi tere ti ala na ndö ti ahoto ti Samarii, ala baa gba ti wusuwusu so azo ayeke sara na aye ti ngangu so azo ayeke sara na amba ti ala na ndö ti ahoto ni!”

Amos 3:10

“Azo ti Samarii ahinga ti sara ye ti mbirimbiri oko pepe. Ala bongbi na ya ti ayangbo ti ala aye so ala mu na maboko ti azo na ngangu nga na aye so ala nzi nzingo”; so tënë ti yanga ti *KOTA GBIA laa.