Matthieu 14:19 - Mbeti ti Nzapa - Tënë so amu fini

¹⁹ Na pekoni, lo mu yanga na azo ni titene ala kue aduti na ndö ti pere. Lo mu mapa oku na susu use so, lo yo le ti lo na nduzu, lo mu singila na Nzapa. Lo fâ ya ti mapa ni, lo mu na adisiple ti lo si ala kangbi ni na gba ti azo ni.

Matthieu 14:19 Referans Kwoze

Nzoni Tënë so Luc asu na mbeti 24:30

So lo na ala aduti ti te kobe, lo mu mapa, lo mu singila na Nzapa; na pekoni, lo fâ ya ni si lo mu na ala.

1 Samuel 9:13

Gi so ala yeke li na ya ti gbata ni, ala yeke wara lo kozoni si lo gue na ndö ti hoto ti te kobe. Zo oko alingbi ti te kobe pepe kozoni si lo ga, ngbanga ti so lo laa lo yeke sara tufa na ndö ti sandaga ni. Azo so a tisa ala so ayeke te ande ti ala kobe ni na peko. Ala gue hio fafadeso si ala wara lo.”

Awatokua 27:35

Na peko ti tënë so, Paul amu mapa, lo mu singila na Nzapa na dawa ti ala kue, lo fâ ya ni si lo to nda ti te.

Marc 6:41

Jésus amu mapa oku na asusu use so, lo yo le ti lo na nduzu, lo mu singila na Nzapa. Na pekoni, lo fâ ya ti amapa ni, lo mu na adisiple ti lo ti kangbi ni na azo ni kue. Lo kangbi nga asusu use so na azo kue.

1 Korente 11:24

lo mu singila na Nzapa, lo fâ ya ni si lo tene: “So ayeke tere ti mbi so mbi mu ndali ti ala. Ala sara ye so ti dabe ti ala na mbi.”

Rome 14:6

Zo so abaa mbeni lango tongana kota lango ahon atanga ni, lo yeke sara tongaso ndali ti Kota Gbia; zo so ayeke te ye kue, lo yeke te ni ndali ti Kota Gbia, ngbanga ti so lo yeke mu singila na Nzapa. Zo so ayeke te ye kue pepe, lo yeke sara tongaso ndali ti Kota Gbia, ngbanga ti so lo nga, lo yeke mu singila na Nzapa.

Kolose 3:17

Atënë so kue ala yeke tene, wala aye so kue ala yeke sara, ala sara ni na iri ti *Kota Gbia Jésus, ala mu singila na Nzapa Babâ na lege ti lo.

1 Korente 10:16

Kopo so e yeke mu singila na Nzapa ndali ni si e yeke nyon ni so, ni laa ayeke sara titene e duti na beoko na mene ti Christ pepe? Mapa so e yeke fâ ya ni, ni laa ayeke sara titene e duti na beoko na tere ti Christ pepe?

Nzoni Tënë so Luc asu na mbeti 9:14

Wungo ti azo ni kue ayeke nduru na saki oku. Jésus atene na adisiple ti lo: “Ala tene na azo ni ti bongbi tere ti ala baleoku baleoku si aduti.”

Marc 7:34

Na pekoni, lo yo le ti lo na nduzu, lo wu si lo tene na koli ni: “Efata!”, so ti tene: “Zi tere ti mo!”

1 Korente 10:31

Tongaso, ataa ala yeke te, ataa ala yeke nyon, ataa ye so kue ala yeke sara, ala sara ni kue ndali ti gonda ti Nzapa.

Jean 6:23

Me ambeni ngo nde alondo na gbata ti Tiberiade asi na ndo so *Kota Gbia amu mapa, lo mu singila na Nzapa si azo ate so.

Marc 6:39

Tongaso Jésus amu yanga na adisiple ti lo ti tene na azo ni kue ti bongbi li ti ala ti duti nde nde na ndö ti fini pere.

Jean 11:41

Tongaso ala zi têne ni. Jésus ayo le ti lo na nduzu si lo tene: “Babâ, mbi mu singila na mo, ngbanga ti so mo ma mbi awe.

Nzoni Tënë so Luc asu na mbeti 22:19

Na pekoni, lo mu mapa, lo mu singila na Nzapa, lo fâ ya ni, lo mu na ala si lo tene: “So ayeke tere ti mbi so mbi mu ndali ti ala. Ala sara ye so ti dabe ti ala na mbi.”

Nzoni Tënë so Luc asu na mbeti 9:16

Jésus amu mapa oku na asusu use so, lo yo le ti lo na nduzu, lo mu singila na Nzapa, lo fâ ya ni, lo mu na adisiple ti lo ti kangbi ni na gba ti azo ni.

Matthieu 14:18

Jésus atene na ala: “Ala ga na ni na mbi.”

Nzoni Tënë so Luc asu na mbeti 22:17

Na pekoni, Jésus amu kopo ti vin, lo mu singila na Nzapa si lo tene: “Ala mu ni, ala kangbi na popo ti ala.