Marc 1:1 - Mbeti ti Nzapa - Tënë so amu fini

¹ Nzoni Tënë na ndö ti Jésus Christ, Molenge ti Nzapa ato nda ni tongaso:

Marc 1:1 Referans Kwoze

Jean 20:31

Me ti ambeni ye ti kpene so a su tënë ni na mbeti so, a su ni titene ala ma na be so, Jésus ayeke *Mesii, Molenge ti Nzapa. Tongana ala ma na be, fade ala yeke duti na fini na lege ti lo.

Matthieu 17:5

So lo ngba ti tene tënë ni, mbeni mbinda so aza zango aga amu ndö ti ala kue. Mbeni go alondo na ya ti mbinda ni, atene: “So ayeke Molenge ti mbi so mbi ye lo mingi, be ti mbi anzere na lo mingi. Ala ma yanga ti lo!”

Matthieu 4:3

Zabolo aga nduru na tere ti lo si atene na lo: “Tongana mo yeke Molenge ti Nzapa, mo mu yanga na atêne so titene aga kobe!”

Matthieu 14:33

Adisiple so ayeke na ya ti ngo ni akuku na gbe ti lo si ala tene na lo: “Biani, mo yeke Molenge ti Nzapa!”

Matthieu 3:17

Mbeni go alondo na yayu si atene: “So ayeke Molenge ti mbi so mbi ye lo mingi, be ti mbi anzere na lo mingi.”

Rome 8:3

Ndia ti Moïse alingbi ti sara ye so lani pepe, ngbanga ti so aye so atia na ya ti fini ti zo akanga lege na ndia ti sarango ni, me Nzapa asara ni: lo tokua Molenge ti lo wani so amu tere ti zo – tere so ayeke tongana ti zo ti siokpari – titene lo zi azo na ya ti siokpari. Na lege so, Nzapa afâ ngbanga na ndö ti siokpari so ayeke sara kua na ya ti tere ti zo.

Jean 1:14

Tënë ni aga zo si lo duti na popo ti e, nzoni be na taa-tënë ti lo ahon ndoni. E baa gonda ti lo, gonda so Babâ amu na oko Molenge ti lo.

Jean 6:69

E ma na be si e hinga so, mo yeke zo ti nzoni kue so Nzapa azia mo nde si lo tokua mo.”

Jean 3:16

Biani, Nzapa aye azo ti dunia so mingi si lo mu gi oko Molenge ti lo titene zo so ama na be na lo alingbi ti kui pepe, me lo yeke na fini so angba lakue lakue.

Jean 1:49

Natanael atene na lo: “Wafango-ye, mo yeke Molenge ti Nzapa! Mo yeke gbia ti Israel!”

Jean 1:34

Mbi Jean, mbi baa ye so, nilaa mbi tene na azo kue, mbi tene: koli so ayeke Molenge ti Nzapa.”

Nzoni Tënë so Luc asu na mbeti 1:35

Ange ni akiri tënë na lo, atene: “Fade Yingo-Vuru ayeke ga na ndö ti mo si ngangu ti Nzapa, lo so lo yeke na yayu kâ na ndö ti aye kue ayeke duti na ndö ti mo tongana gbe ti de. Ndani laa molenge so mo yeke du lo ayeke ga zo so ayeke nde si ayeke nzoni kue; azo ayeke iri lo Molenge ti Nzapa.

Abia (Psaumes) 2:7

“Mbi ye ti fa peko ti mbela ti KOTA GBIA: lo tene na mbi, lo tene: ‘Mo yeke molenge ti mbi; laso mbi ga babâ ti mo awe.

Rome 8:32

Nzapa agbanzi Molenge ti lo na e pepe, me lo ka lo ndali ti e kue; fade lo yeke ke ti mu na e aye kue tongana nyen?

Awatokua 1:22

ti londo na lango ti bateme ti Jean ngbii asi na lango so a mu Jésus na popo ti e, a gue na lo na yayu. Tongaso, ayeke nzoni mbeni oko na popo ti ala abongbi na e ti ga zo ti fango na azo tënë ti zingongo ti Jésus na kuâ.”

Awatokua 13:24

Kozoni si Jésus aga, Jean afa tënë na azo ti Israel atene, ayeke nzoni ala zia ngbene lege ti sarango ye ti ala, ala wara bateme.