Kolose 2:18 - Mbeti ti Nzapa - Tënë so amu fini

¹⁸ A-ita, alingbi ala zia amara ti azo tongaso afâ ngbanga na li ti ala pepe. Ambeni zo ni aye ti sara tere ti ala lakue na le ti azo tongana akete zo si ala yeke voro *a-ange, ala zia be ti ala gi na ndö ti aye so ala baa na ya ti mbeni ye tongana bango-li. Hingango ndo ti ala ayeke senge gbungo-li ti azo, asara si ala baa tere ti ala kota ahon azo kue.

Kolose 2:18 Referans Kwoze

Kolose 2:8

Le ti ala akpengba si mbeni zo ahanda ala na atënë ti ndara ti sese so pepe! Atënë so ayeke asenge senge tënë alondo na lege ti tënë ti akotara wala na lege ti ayingo so ayeke na ngangu na ndö ti dunia so, me alondo na Christ oko pepe.

1 Timothée 1:7

Ala tene, ala yeke awafango-ndia, me atënë so ala yeke tene wala aye so ala yeke fa si yanga ti ala akpengba na ndö ni so, ala ma nga ya ni oko pepe.

Kolose 2:23

Biani, na le ti azo, andia so akpa ye ti ndara: vorongo Nzapa ti li ti zo wani, sarango tere tongana kete zo, sarango tere na pasi; me so kue ayeke gi asenge senge ye ndali ti so, aye ni alingbi ti sara si zo akanga anzara ti be ti lo pepe.

1 Timothée 4:1

Yingo-Vuru atene biani atene, na lango ti ndani, fade ambeni zo ayeke zia lege ti mabe, ala yeke ma gi tënë ti ayingo so ayeke handa azo si ala yeke ma atënë so alondo na asioni yingo.

2 Korente 11:3

Me ala dabe ti ala na ye so: ngbo ahanda ando Eve na lege ti mayere ti lo si Eve agirisa lege. Mbeto asara mbi titene be ti ala ague kirikiri si ala zia peko ti Christ so ala mu lani tere ti ala kue na lo na vurungo be so.

Rome 1:25

Ala zia taa-tënë na ndö ti Nzapa awe si ala mu peko ti mvene; ala voro aye so Nzapa asara si ala sara kua na aye ni, me ala zia ti voro Nzapa so asara si aye kue abaa gigi. Ayeke nzoni azo agonda lo kpu na kpu! Amen.

Matthieu 24:24

Biani, fade amesii ti mvene na awayanga-Nzapa ti mvene ayeke ga si ala yeke sara akota ye ti kpene na aye ti dongo be ti handa na azo. Tongana lege ayeke daa, ataa azo so Nzapa asoro ala, ala yeke handa ala.

Aye so Nzapa afa 3:11

Mbi yeke ga fafadeso. Ye so ayeke na maboko ti mo so, mo gbu ni ngangu, tongaso si mbeni zo agboto pepe nzoni ye so a yeke mu na zo so aso benda.

1 Jean 2:26

Tënë so mbi ye fade ti su na mbeti na ala na ndö ti azo so ayeke gi lege ti handa ala laa.

Filipe 3:14

Mbi yeke kpe loro ngangu ti si na nda ti lege ni, ti wara nzoni ye so Nzapa airi e ti wara ni na yayu, na lege ti gango so e ga oko na Jésus Christ.

Efeze 5:6

Ala zia mbeni zo ahanda ala na asenge senge tënë pepe. Asioni ye tongaso asara si ngonzo ti Nzapa ayeke ga na ndö ti azo so ake yanga ti lo.

1 Korente 8:1

Âdu tënë ti anyama so a yeke ya na *sandaga na anzapa nde, taa-tënë, tongana ti so ala yeke tene: “E kue, e yeke azo ti hingango ye.” Hingango ye so ayeke sara si baba ahon ndö ti zo, me ndoye ayeke sara si zo ti Christ amai.

Daniel 11:38

Fade lo yeke voro anzapa so pepe, me lo yeke voro nzapa ti agbagba ti bira, nzapa so akotara ti lo ahinga ni ando pepe. Lo yeke mu na nzapa so lôro, wen ti nginza, atêne ti ngangu ngere na ambeni ye ti ngangu ngere.

Ezekiel 13:3

Tënë so mbi Kota Gbia NZAPA, mbi tene ayeke so: Mawa na ala, awayanga-nzapa so ahinga ndo pepe! Ala so abaa ye oko pepe si ala mu gi atënë ti ya ti li ti ala si ayeke tene so.

Wungo ti azo 25:18

Biani, azo ni ayeke awato ti ala; ala sara mayere na tere ti ala, azo ti Israel, na ndö ti tënë ti nzapa ti Peor nga na tënë ti Kozbi, wali ti mara ti Madian; lo yeke molenge ti mbeni makonzi ti azo ti mara ti Madian, lo so Pinas afâ lo na lango so kobela ti bubango kodro ati na ndö ti azo ti Israel ndali ti nzapa ti Peor so.”

Tongo nda ti aye 3:13

KOTA GBIA Nzapa ahunda wali ni, atene: “Nyen laa mo sara tongaso?” Wali ni akiri tënë na lo, atene: “Ngbo ahanda mbi si mbi te le ti keke ni.”

Aye so Nzapa afa 19:10

Mbi kuku na gbe ti ange ni ti voro lo, me lo tene na mbi: “Sara ye tongaso pepe! Mbi yeke gi mba ti mo, zo ti kua; mbi yeke nga mba ti a-ita ti mo na ti azo so kue abata taa-tënë so Jésus afa. Mo voro gi Nzapa!” Taa-tënë so Jésus afa, ni laa amu ngangu na awayanga-Nzapa ti sara na kua ti ala.

Aye so Nzapa afa 13:14

Lo handa azo ti ndö ti sese na lege ti aye ti kpene so lo sara na dawa ti nyama ti kota ngu-ingo; lo sara ni na ngangu so a mu na lo. Lo tene na azo ti leke mbeni limo ndali ti nyama ti kota ngu-ingo so awara ka ti yongoro zeme si lo ngba na fini so.

Aye so Nzapa afa 13:8

Fade azo ti ndö ti sese kue ayeke voro nyama ni. Azo so ayeke voro lo ayeke azo so, ngbene ye so dunia abaa gigi, iri ti ala ayeke na ya ti mbeti pepe, mbeti so a su iri ti azo so ayeke na taa fini daa, mbeti ti Molenge ti Taba so a fâ lo so.

Aye so Nzapa afa 12:9

A bi sioni nyama ni na gigi. Lo yeke ngbene ngbo so azo airi lo atene, Zabolo wala Satan, wala zo ti handango azo ti dunia kue. A bi lo na ndö ti sese, lo na a-ange ti lo.

2 Pierre 2:14

Le ti ala ayeke za na nzara ti gingo awali; nzara ti sarango siokpari ayeke hunzi na be ti ala oko pepe. Ala yeke handa azo so be ti ala ade ti kpengba pepe; nzara ti warango ye ti ala ahon ti azo kue. Ala yeke azo so a deba ala awe!

Kolose 2:4

Mbi yeke tene tënë so na ala titene zo oko ahanda ala na anzerengo tënë pepe.

2 Korente 12:20

Mbeto asara mbi titene tongana mbi si na ala kâ, mbi baa dutingo ti ala ayeke nde na ti so be ti mbi aye si ala nga, ala baa dutingo ti mbi ayeke nde na ti so be ti ala aye. Mbeto asara mbi titene aye tongaso aduti na popo ti ala: papa, kota be, ngonzo, kangbingo tere, zongango zo na asioni tënë, fonongo na iri ti zo, baba, sarango aye ti wusuwusu.

1 Korente 13:4

Ndoye ayeke kanga be ti lo, lo yeke sara nzoni, lo yeke sara kota be pepe, lo yeke pika kate ti lo pepe, lo yeke sara baba pepe;

1 Korente 9:24

Ala hinga pepe? Na lando ti awanguru, azo ti kpengo loro kue laa ayeke kpe loro ni, me gi zo oko laa ayeke wara kangu ti wen! Ala kpe loro na lege so ala lingbi ti wara kangu ti wen.

1 Korente 4:18

Ambeni zo na popo ti ala abaa ti ala atene, mbi yeke kiri ti si na ndo ti ala pepe, nilaa baba ti azo ni ahon ndoni so.

1 Korente 3:3

ngbanga ti so ala ngba lakue ti sara ye gi tongana ti azo ti dunia so. So tënë ti kota be na papa angba na popo ti ala so, so afa atene, ala yeke sara ye gi na lege ti azo ti dunia so pepe? Ala yeke sara ye gi tongana ti azo kue pepe?

Rome 16:18

ngbanga ti so azo ni ayeke sara kua ti Christ, *Kota Gbia ti e pepe, me ala yeke gi gi kobe ti ya ti ala. Anzoni tënë na anzerengo tënë ayeke sigigi na yanga ti ala ti handa na azo so le ti ala azi pepe.

Ésaïe 57:9

Mo mu mafuta, mo gue na ni na kota gbia, mo gue na mara ti ayombo nde nde. Mo tokua azo ti mo yongoro kâ, ala zu ngbii, ala si na ndo ti akuâ.

Mbeti ti Job 38:2

Mo so mo yeke tene abuba tënë ti honde aye so mbi leke ti sara, mo yeke ti mo zo wa?

1 Korente 4:6

A-ita, ndali ti ala, mbi mu ambeni tapande so ti tene tënë na ndö ti mbi na Apolos si ala manda nda ti *mato so: “Alingbi zo oko oko aluti gi na ndö ti tënë so a su na mbeti, awe.” Tongaso si ala zia lege ti baba ti ala so asara si ala yeke mu mbage ti mbeni zo ti ke mbeni so.

Efeze 4:17

Tongaso, na iri ti *Kota Gbia, mbi yeke tene tënë so biani na ala: ala kiri asara ye tongana ti azo ti amara nde pepe, ngbanga ti so atënë ti be ti azo ti amara nde ayeke buba ye.