Jude 1:20 - Mbeti ti Nzapa - Tënë so amu fini

²⁰ Me ti ala, a-ita ti mbi so mbi ye ala mingi, ala luti ngangu na ndö ti mabe ti ala so ayeke nde si ayeke nzoni kue. Ala sambela na lege ti Yingo-Vuru.

Jude 1:20 Referans Kwoze

Efeze 6:18

Na ya ti aye so kue, ala sambela Nzapa titene lo mu na ala maboko; ala sambela na ngoi kue na lege ti Yingo. Ndani laa, le ti ala akpengba, ala sambela ndali ti azo ti Nzapa kue, ala ngba daa lakue.

1 Korente 14:15

Fade mbi yeke sara nyen? Mbi yeke sambela na lege ti yingo, me mbi yeke sambela nga na lege so azo alingbi ti ma ya ni; mbi yeke he bia na lege ti yingo, me mbi yeke he nga bia na lege so azo alingbi ti ma ya ni.

Kolose 2:7

Tongana ti so gere ti keke ali na ya ti sese wala da aluti ngangu na ndö ti gere ni, ala luti ngangu na ndö ti Christ. Ala kpengba na lege ti mabe alingbi na ye so a fa na ala, ala mu singila mingi na Nzapa.

1 Tesalonike 5:11

Tongaso, ala mu ngangu na be ti ala na popo ti ala, ala sara si amba ti ala akpengba tongana ti so ala yeke sara ni so.

1 Korente 14:26

Tongaso a-ita, fade e yeke sara tongana nyen? Tongana ala bongbi, mbeni zo na popo ti ala alingbi ti he mbeni bia, mbeni afa ye wala lo tene tënë ti mbeni ye so Nzapa afa na lo, mbeni atene tënë na ambeni yanga nde, mbeni akiri peko ti tënë ni na yanga ti kodro titene azo ama ya ni. Aye so kue ala yeke sara, alingbi ala sara ni titene azo ti *Eglize akpengba.

Rome 8:15

Yingo so ala wara ayeke Yingo ti sarango ala na ngbaa pepe, Yingo ti ziango mbeto na be ti ala pepe, me Yingo so ayeke sara titene ala ga amolenge ti Nzapa. Na lege ti lo, e yeke dekongo na Nzapa, e tene: “Abba!”, so ti tene “Babâ!”

Galasii 4:6

Ti fa so ala yeke amolenge ti lo biani, Nzapa atokua Yingo ti Molenge ti lo na be ti e kue, Yingo ni ayeke dekongo atene: “Abba!” so ti tene “Babâ!”

Efeze 4:29

Alingbi sioni tënë oko asigigi na yanga ti ala pepe. Me tongana lege ayeke daa, ala tene gi nzoni tënë so alingbi ti mu lege na amba ti ala ti kpengba si asara nzoni na azo so ayeke ma ala.

Awatokua 9:31

Tongaso *Eglize ti sese ti Judée kue, ti Galile na ti Samarii ayeke lani na siriri. Na lege ti ngangu ti Yingo-Vuru, Eglize ni ayeke kpengba, ayeke kpe mbeto ti Kota Gbia si ayeke mai.

Efeze 4:16

Na lege ti lo laa ambage ti tere nde nde abongbi si aga tere oko tongana ti so akamba ti tere atengbi si aga tere oko. Tongana ambage ti tere ni oko oko kue asara kua ti ala nzoni, tere ni kue ayeke kono si ayeke leke tere ti lo na lege ti ndoye.

Efeze 4:12

Lo sara tongaso titene azo ti Nzapa aga azo so alingbi ti sara kua si Eglize so ayeke tere ti Christ amai,

Awatokua 26:18

Mbi tokua mo ti zi le ti ala, ti mu ala na ya ti vukongo ndo ti sigigi na ala na ya ti lumiere; mo yeke zi ala na gbe ti ngangu ti Satan ti gue na ala na Nzapa. Tongana ala ma na be na mbi, fade a yeke zi siokpari na li ti ala si ala yeke wara ndo na popo ti azo ti Nzapa.’ ”

Zakarii 12:10

Mbi yeke sara titene yingo ti sarango ye ti nzoni na yingo ti sambelango mbi aga na ndö ti *ahale ti David nga na ndö ti azo ti gbata ti Jérusalem. Fade ala yeke baa ndo na mbage ti mbi, lo so ala kpo lo so. Ala yeke toto kuâ ti lo tongana ti so a yeke toto kuâ ti oko molenge-koli. Ala yeke toto lo ngangu mingi tongana ti so a yeke toto kuâ ti kozo molenge.

1 Jean 5:4

Zo so kue ayeke molenge ti Nzapa ahon ndö ti dunia so na ngangu awe. Na lege ti mabe laa e yeke hon ndö ti dunia so na ngangu.

Jacques 2:22

Mo baa, mabe ti lo na sarango ye ti lo ayeke sara gi kua oko! Ye so lo sara laa asara si mabe ti lo aga nzoni kue.

Tite 1:1

Mbi Paul, mbi yeke zo ti kua ti Nzapa si mbi yeke nga *watokua ti Jésus Christ. Nzapa atokua mbi ti sara si azo so lo soro ala ama na be si ala hinga taa-tënë so alingbi gi na lege ti vorongo Nzapa,

1 Korente 10:23

Ambeni zo ayeke tene: “A mu na zo lege ti sara ye kue”. Taa-tënë, me ye kue laa ayeke sara nzoni na zo pepe. “A mu na zo lege ti sara ye kue”, me ye kue laa asara si Eglize amai pepe.

Rome 15:2

E oko oko kue, e gi ti sara ye so anzere na amba ti e ndali ti nzoni ti ala, tongaso si ala kpengba na lege ti mabe.

Awatokua 15:9

Na le ti lo, e na ala kue, e yeke gi oko. Lo sukula be ti ala, ngbanga ti so ala ma na be.

2 Timothée 1:5

Mbi dabe ti mbi na taa mabe so mo yeke na ni. Gi mabe so Lois, ata ti mo ti wali, lo na Enis, mama ti mo ayeke na ni kozoni laa. Mbi hinga so gi mabe ni so laa mo yeke na ni.

1 Timothée 1:4

Mo ke nga na ala titene ala zia be ti ala na ndö ti ambai ti mvene wala na dikongo a-iri ti akotara gbani gbani. Aye so ayeke ga na *bingbingo tënë na popo ti azo, me nzoni lege so Nzapa aleke ndali ti zo, ala lingbi ti hinga ni na lege ti aye so pepe. Zo ayeke hinga nzoni lege ni gi na lege ti mabe.

1 Korente 1:8

Lo laa lo yeke sara titene ala kpengba ngbii asi na ndani si na lango ti gango ti Jésus Christ, Kota Gbia ti e, ala duti azo so tënë ayeke na li ti ala pepe.

Aye so Nzapa afa 13:10

Zo so a diko lo ndali ti kanga, fade lo yeke gue na kanga; zo so a diko lo titene a fâ lo na yongoro zeme, lo yeke kui kuâ ti yongoro zeme. So ayeke ngoi titene azo ti Nzapa akanga be ti ala si ala ngba na lege ti mabe laa.”

Jude 1:3

A-ita ti mbi so mbi ye ala mingi, mbi ye fade mingi ti su mbeti na ala na ndö ti tënë ti songo so Nzapa asoo e na ala kue so. Me mbeni ye apusu mbi ti su mbeti so ti mu ngangu na be ti ala titene ala tiri bira ti bata mabe so Nzapa amu na azo ti lo fani oko biani biani.

2 Pierre 1:1

Mbi Simon Pierre, zo ti kua nga na *watokua ti Jésus Christ, mbi tokua mbeti so na azo so awara gi oko mabe ti kota ngere tongana e. Ala wara ni na lege ti mbirimbiri ti Jésus Christ, lo so lo yeke Nzapa ti e na Wasongo e.

Awatokua 6:7

Tënë ti Nzapa angba ti tambula na ndo kue. Na Jérusalem, wungo ti adisiple ayeke gue na nduzu, gba ti awayango-sandaga ama na be.