Josué 22:27 - Mbeti ti Nzapa - Tënë so amu fini

²⁷ E ye ti sara gbalaka ni titene aduti mbeni ye na popo ti e na ala nga na popo ti amolenge so a yeke du ala na peko. Fade gbalaka ni ayeke fa atene, e nga, e lingbi ti voro KOTA GBIA na lege ti sandaga ti anyama so ayeke gbi ni kue na wâ, asandaga ti beoko na ambeni sandaga nde. Tongaso si gbanda ahale ti ala awara lege pepe ti tene na ahale ti e, atene: ‘Mbeni ye ti ala oko ayeke na maboko ti KOTA GBIA pepe.’

Josué 22:27 Referans Kwoze

Josué 24:27

Josué atene na azo ni kue, atene: “Ala baa têne so mbirimbiri: ni laa ayeke fâ ngbanga na li ti e ndali ti tënë so asigigi na yanga ti e, ngbanga ti so têne ni ama atënë so kue KOTA GBIA atene na e. Biani, fade têne ni ayeke fâ ngbanga na li ti ala ti kanga lege na ala ti bere tënë ti Nzapa ti ala.”

Tongo nda ti aye 31:48

Laban atene: “Gba ti atêne so e bongbi so afa laso atene, mbi na mo, e ga ambuki awe.” Ndani laa azo airi ndo ni so Galed.

Josué 22:34

Azo ti mara ti Ruben na ti Gad adi iri ti gbalaka ni: “Gbalaka so ayeke duti mbeni ye na popo ti e” ti fa atene, KOTA GBIA ayeke Nzapa.

Ndia ti fani use ni 12:11

Tongaso, na ndo so KOTA GBIA Nzapa ti ala asoro titene iri ti lo aduti daa si azo ayeke gue ti voro lo daa laa ala yeke ga na lo aye so mbi mu yanga daa na ala: asandaga ti ala so a yeke gbi ni kue na wâ, asandaga ti ala ti beoko, adime ti ala, amatabisi ti ala na aye so kue ala deba yanga ti ala ti mungo ni na KOTA GBIA.

1 Samuel 7:12

Samuel amu mbeni têne si lo zia ni na popo ti Mispa na ndo so a iri ni Pembe. Lo di iri ti têne ni Eben-Ezer si lo tene: “KOTA GBIA amu maboko na e ngbii asi na ndo so.”

Josué 22:10

So ala si na tere ti ngu ti Jourdain, na mbage ti sese ti Kanaan, ala sara mbeni gbalaka so ayeke kota mingi na tere ti ngu ni.

Tongo nda ti aye 31:52

Gba ti atêne ni na têne so ayeke luti na nduzu so ayeke baa mbi na mo. Mbi deba yanga ti mbi ti hon gba ti atêne ni ti gue na mbage ti mo ti sara sioni na mo pepe. Mo nga, mo deba yanga ti mo ti hon ni ti ga na mbage ti mbi ti sara sioni na mbi pepe.

Josué 22:26

Ndani laa e tene na be ti e, e tene: alingbi e sara gbalaka so, me e sara ni ndali ti sandaga ti anyama so a yeke gbi ni kue na wâ pepe wala ndali ti ambeni sandaga nde pepe.

Josué 22:28

E tene na be ti e, e tene: gbanda, tongana azo atene tënë so na e nga na ahale ti e, fade e yeke tene na ala: ‘Ala baa, akotara ti e asara gbalaka so gi na oko kode ti gbalaka ti KOTA GBIA. Ala sara ni ndali ti sandaga ti anyama so a yeke gbi ni kue na wâ pepe, wala ndali ti ambeni sandaga nde pepe; me ala sara ni titene aduti mbeni ye na popo ti e na ala.’

Abia (Psaumes) 16:5

KOTA GBIA, mo laa mo yeke ye so ayeke ga ti mbi, mo laa mo yeke nzoni ye so mbi wara; gigi ti mbi ayeke gi na maboko ti mo.

Ésaïe 19:19

Na lango ni so, fade gbalaka ti KOTA GBIA ayeke duti taa na be ti kodro ti Ezipte, mbeni ngbongboro têne so azo aleke si aluti na nduzu ndali ti KOTA GBIA ayeke duti na katikati ti kodro ni.