Jérémie 27:19 - Mbeti ti Nzapa - Tënë so amu fini

¹⁹ Biani, tënë so KOTA GBIA so ayeke na ndö ti dunia kue atene ndali ti angbongboro yongoro gere ti da, kota sembe, apusu nga ndali ti tanga ti akungba so angba na Jérusalem laa.

Jérémie 27:19 Referans Kwoze

2 Agbia 25:13

Azo ti Babilone akungbi na sese ayongoro gere ti da so ayeke na bengba wen si ayeke na yanga ti kota da ti Nzapa so. Ala fâ gere ti akete pusu na ngbongboro sembe so a sara na bengba wen si a zia na ya ti gbagba ti kota da ti KOTA GBIA so. Ala mu bengba wen so kue ague na ni na Babilone.

2 Agbia 25:17

Gere ti da oko ayo na nduzu metere gumbaya. Na ndö ti yongoro gere ti da ni oko oko, ala zia mbeni ngbongboro bengba wen so ayo na nduzu metere oko na ndambo. Ala mu bengba wen aleke na mbeni ye tongana gbanda nga na ale ti keke so iri ni grenade, ala zia ni na tere ti ngbongboro bengba wen ni. Use yongoro gere ti da ni na agbanda ni ayeke tongana ti kozo yongoro gere ti da ni.

Daniel 1:2

KOTA GBIA azia Yoakim, gbia ti Juda na maboko ti Nabukodonosor; lo zia nga lege na Nabukodonosor si lo mu mbeni mbage ti akungba ti ya ti kota da ti Nzapa. Nabukodonosor ague na akungba ni na kodro ti Shinear si lo zia ni na ya ti kubu ti batango amosoro ti lo so ayeke na ya ti da ti anzapa ti lo.

1 Agbia 7:23

Hiram akporo bengba wen si a sara na ngbongboro sembe. Ti londo na yanga ni ti si na mbeni yanga ni, yongo ni ayeke metere oku. Ti londo na ngbonda ni ti si na yanga ni na nduzu, yongo ni ayeke metere use na ndambo. Tongana a gboto kamba na yanga ni angoro na ni atengbi, alingbi metere baleoko na oku.

1 Agbia 7:27

Na pekoni, Hiram amu bengba wen si lo sara na pusu baleoko. Yongoro ti pusu oko ayeke metere use, konongo ni ayeke metere use, yongo ni na nduzu ayeke metere oko na ndambo.

2 Mbai 36:18

Aye so kue ayeke na ya ti kota da ti Nzapa, akota ni wala akete ni, amosoro so a bata na ya ti kubu ti da ti KOTA GBIA, na amosoro so ayeke na ya ti da ti gbia nga na ti akota zo ti lo, gbia Nabukodonosor amu kue ague na ni na Babilone.

Abia ti demango tere 1:10

Awato anzi anzoni ye ti Jérusalem kue awe. Azo ti mara nde ali na ya ti kota da ti Nzapa; me azo ti gbata ti Jérusalem abaa ala bango. Andaa KOTA GBIA, mo mu yanga ando, mo tene: “Fade amara nde ayeke li na ya ti bongbi ti azo ti mbi pepe.”