Jérémie 26:9 - Mbeti ti Nzapa - Tënë so amu fini

⁹ Ngbanga ti nyen si mo tene peko ti tënë ti yanga ti KOTA GBIA, mo tene: ‘Fade a yeke buba kota da ti Nzapa so tongana ti Silo, a yeke buba gbata so si azo ti gbata ni ayeke duti daa mbeni pepe so?’ ” Tongaso azo so kue ayeke na ya ti kota da ti Nzapa abongbi na tere ti Jérémie.

Jérémie 26:9 Referans Kwoze

Awatokua 22:22

Azo ni ama Paul ngbii asi na ndembe so lo tene tënë so; me na pekoni, ala to nda ti dekongo ngangu, atene: “Zi mara ti zo tongaso na ndö ti dunia so! Lo lingbi ti ngba na fini pepe!”

Awatokua 21:30

Wusuwusu amu ya ti gbata ni kue si gba ti azo alondo na ando nde nde akpe aga. Ala gbu Paul, agboto lo, asigigi na lo si ala kanga yanga ti da ni hio.

Awatokua 13:50

Me azuife apusu awali so ayeke na kota ndo si ala yeke voro Nzapa, ala na akota zo ti gbata ni titene ala sara ngangu na Paul na Barnabas si atumba ala na sese ti ala.

Awatokua 6:14

E ma, lo tene: ‘Fade Jésus, zo ti Nazaret ayeke kungbi kota da ti Nzapa si lo yeke sanze lege ti aye so Moïse afa na akotara ti e.’ ”

Awatokua 5:28

“E ke fade na ala na kuru go titene ala fa ye na iri ti koli so. Me ye ni asara tongana nyen si fango ye ti ala ni amu ya ti Jérusalem kue so? Na ndö ni, ala kiri atene, e laa e fâ lo!”

Jean 8:59

Ala mu têne ti bo na Jésus, me lo honde tere ti lo si lo sigigi na ya ti kota da ti Nzapa ni, lo hon.

Jean 8:20

Jésus atene atënë so na ndembe so lo yeke fa ye na ya ti kota da ti Nzapa, na ndo so a zia sanduku ti nginza daa. Zo oko agbu lo pepe, ngbanga ti so ngbonga ti lo ade ti lingbi pepe.

Marc 15:11

Me akota wayango-sandaga apusu gba ti azo ni titene ala hunda na Pilate ti zi na ala Barabas.

Matthieu 27:20

Akota wayango-sandaga na *akangba apusu gba ti azo ni atene, ala hunda titene a zi Barabas si a fâ Jésus.

Matthieu 21:23

Jésus ali na ya ti kota da ti Nzapa si lo yeke fa ye. Tongaso, akota wayango-sandaga na *akangba ti azuife aga nduru na tere ti lo si ala hunda lo, atene: “Na iri ti zo wa laa mo yeke sara aye so? Zo wa laa amu lege na mo ti sara ni, zo wa?”

Mishe 2:6

Ambeni zo ni ayeke diko gba ti atënë na tere ti mbi, atene: “Zia ti diko gba ti atënë so! Zia ti diko gba ti atënë so, mo tene: nyen na nyen kue, Nzapa ayeke zia kamene na le ti e so.

Amos 5:10

Zo so ayeke ke na awafango-ngbanga sioni fango ngbanga ti ala, be ti ala ake lo; zo so aga ti tene taa-tënë na le ti ngbanga, ala yeke baa lo na sioni le.

Jérémie 9:11

Mbeni zo ti ndara ayeke daa so alingbi ti ma ya ti tënë so? Tongana zo ni ayeke daa, ayeke nzoni tënë so KOTA GBIA azia na yanga ti lo, lo fa ni na azo polele. Lo fa nda ni so kodro ni abuba; nda ni so kodro ni agbi si aga gi benyama so; nda ni so zo ayeke hon daa oko pepe so.

Ésaïe 29:21

azo ni ayeke azo so ayeke bi tënë ti mvene na li ti azo, ala so ayeke zia kuku titene awafango-ngbanga ati daa, ala so ayeke fâ ngbanga na li ti azo so asara ye oko pepe.

2 Mbai 25:16

So wayanga-Nzapa ni angba ti tene tënë, Amasia afâ tënë na yanga ti lo si lo tene: “Zo wa laa azia mo wamungo-wango na gbia, zo wa? Kai tënë so! Mo ye pika?” Wayanga-Nzapa ni akai, me lo tene: “Fadeso mbi hinga, mbi tene, Nzapa aleke na be ti lo titene mo kui, ngbanga ti so mo sara ye so si mo ke ti ma wango ti mbi.”

Awatokua 3:11

Koli ni angba gi na tere ti Pierre na Jean na gbe ti veranda so a iri ni Veranda ti Salomon. Be ti azo kue ado si ala kpe ague na tere ti ala.

Awatokua 5:12

*Awatokua asara aye ti kpene na aye ti dongo be mingi na popo ti azo. Azo ti Jésus kue ayeke bongbi tere na gbe ti veranda so iri ni Veranda ti Salomon.

Josué 18:1

Na peko ti so azo ti Israel amu sese ni awe, ala kue abongbi tere ti ala na Silo. Kâ, ala kpo na nduzu da ti bongo so Nzapa na azo ti lo ayeke wara tere daa.

Jérémie 32:3

Sedesias, gbia ti Juda amu fade yanga titene a kanga Jérémie kâ. Biani, lo suku na Jérémie ngbanga ti tënë ti peko ti yanga ti KOTA GBIA so Jérémie atene: “Baa, tënë so KOTA GBIA atene ayeke so: Mbi yeke zia Jérusalem na maboko ti gbia ti Babilone si lo yeke mu ni.

Jérémie 33:10

Tënë so KOTA GBIA atene ayeke so: “Ala azo ti Juda, ala yeke tene: ‘Hoo, ndo so abuba kue awe! Azo na anyama ayeke daa mbeni pepe!’ Taa-tënë, agbata ti Juda nga na ndö ti abalabala ti Jérusalem ade dengo; zo ayeke lango na ya ti gbata ni oko pepe, azo na anyama ayeke daa pepe. Biani, na ya ti kodro so, a yeke kiri ti ma

Jérémie 36:29

Fade mo yeke tene tënë so na ndö ti Yoakim, gbia ti Juda, mo tene: ‘Tënë so KOTA GBIA atene ayeke so: Jérémie asu lani na mbeti, atene, fade gbia ti Babilone ayeke ga biani si lo yeke buba kodro so; lo yeke fâ azo na anyama ti hunzi ala. Me Yoakim asuku na Jérémie si lo gbi rulo ni.

Abia ti demango tere 4:13

Me akpale so ati na ya ti kodro ni, ngbanga ti so awayanga-Nzapa asara siokpari, awayango-sandaga asara sioni mingi: ala tuku mene ti azo ti mbirimbiri ti gbata ni. Nilaa, akpale so ati na ya ti kodro ni.