Jérémie 25:10 - Mbeti ti Nzapa - Tënë so amu fini

¹⁰ Mbi yeke zi na popo ti ala bia ti azo so tere ti ala anzere, bia ti azo so ayeke na ngia nga na bia ti koli na wali so amu tere fini fini; mbi yeke zi na popo ti ala toto ti têne ti nikango na ye nga na wâ ti lamba.

Jérémie 25:10 Referans Kwoze

Jérémie 7:34

Mbi yeke kai ngia ti azo na ya ti agbata ti Juda nga na ndö ti alege ti Jérusalem; mbi yeke kai nzerengo tere ti azo so ayeke he bia; mbi yeke kai bia ti koli na wali so ayeke sara matanga ti mungo tere. Biani, ngia ti ala ni ayeke kai, ngbanga ti so kodro ni abuba kue.

Ezekiel 26:13

Mbi yeke kai abia ti mo; zo ayeke kiri ti ma go ti akundi ti mo pepe.

Jérémie 16:9

Biani, tënë so KOTA GBIA so ayeke na ndö ti dunia kue, Nzapa ti Israel atene ayeke so: ‘Na ndo so, mbi yeke kai bia ti azo so tere ti ala anzere, bia ti azo so ayeke na ngia nga na bia ti koli na wali so amu tere fini fini. Mbi yeke sara ni na gbe ti le ti ala, na ndembe so ala ngba na fini.’

Osée 2:11

Ndani laa, na ngoi ti fango ale ti kobe, fade mbi yeke ga ti zi na maboko ti lo aye so kue mbi mu na lo: ale ti ble na fini vin; mbi yeke zi na tere ti lo bongo so a sara na kua ti tere ti taba, na bongo ti len so ahonde fade tere ti lo so ayeke ndumbu so.

Esther 8:11

Tënë ti ya ti ambeti ni ayeke tongaso: “Gbia amu yanga na azuife so ayeke na ya ti agbata oko oko kue ti bongbi tere ti ala ti luti ti bata fini ti ala. Lo mu yanga na ala ti fâ aturugu kue ti mbeni mara wala ti mbeni kodro-sese so aye ti tiri bira na ala; ala fâ azo ni kue a hunzi ala, mbeni oko angba pepe, ataa awali na amolenge ti ala; ala gbu akungba ti azo ni si aga ti ala.

Esther 7:4

Biani, azo aka e, mbi na azo ti mara ti mbi titene a fâ e a hunzi e kue, mbeni zo oko angba pepe! Tongana fade ayeke gi senge kango e tongana angbaa ti koli na ti wali, ka mbi lingbi ti zi yanga daa pepe, ngbanga ti so mara ti tënë tongaso laa zo alingbi ti so li ti gbia daa pepe.”

Esther 3:13

Ala mu ambeti ni na azo ti tokua ti gbia si azo ti tokua ni ague na ni na ya ti akodro-sese ni oko oko kue. Tënë ti ya ti mbeti ni ayeke tongaso: “Ala gbu azuife kue, amaseka na akangba, amolenge na awali kue gi na ya ti lango oko; ala fâ azo ni kue ahunzi ala, mbeni oko angba pepe. Ala gbu akungba ti azo ni si aga ti ala. Ala sara ye so kue gi na ya ti lango oko, mbirimbiri na lango baleoko na ota ti nze baleoko na use ni so a iri ni nze ti Adar.”

Ésaïe 47:2

Mo mu atêne ti nikango na ye, mo nika na farini. Mo zi bongo na le ti mo, mo yo yanga ti bongo ti mo na nduzu, mo fa gere ti mo na gigi, mo fâ *abale.

Jérémie 48:33

Ngia na nzerengo tere ahunzi awe na yaka ti Moab so a lu na ya ni akeke so a yeke te alengo ni. Vin ayeke na ya ti ata mbeni pepe, akoli ti petengo ale ti vinye ayeke daa mbeni pepe; dekongo tongana ti azo so ayeke ko ale ti *vinye ti sara na vin ahunzi awe.

Abia ti demango tere 5:15

Ngia ti be ti e kue ahunzi, adodo ti e ahunzi awe; aga gi totongo akuâ.