Jérémie 23:12 - Mbeti ti Nzapa - Tënë so amu fini

¹² Ndani laa, fade lege ti ala ayeke *zene zenengo. Ala yeke pika gere ti ala na ya ti vukongo ndo si ala yeke ti. Biani, fade mbi yeke sara si sioni kpale aga na ndö ti ala na ndembe so mbi yeke ga na tere ti ala; so tënë ti yanga ti KOTA GBIA laa.”

Jérémie 23:12 Referans Kwoze

Jérémie 13:16

Ala gonda KOTA GBIA, Nzapa ti ala kozo titene lo tokua vukongo ndo, kozo titene ala pika gere ti ala na li ti ahoto so ndo avuko daa. Ala yeke ku vurungo ndo, me KOTA GBIA asara si vurungo ndo ni aga ndo so avuko pitipiti; lo sara si aga vuko mbinda.

Jérémie 11:23

Zo oko ayeke ngba na fini pepe, na ngu so mbi yeke ga na tere ti azo ti Anatot si mbi yeke tokua kpale na ndö ti ala.”

Amato 4:19

Me lege ti dutingo ti azo ti sioni ayeke tongana bi so avuko pitipiti. Ye so ala pika gere ti ala daa ti ti, ala baa ni pepe.

Abia (Psaumes) 35:6

Na ndembe so ange ti KOTA GBIA ayeke tumba peko ti ala, ayeke nzoni lege ti ala avuko si aga dongo dongo.

Jean 12:35

Jésus atene na ala: “Lumiere ade na popo ti ala ndali ti kete ngoi. Ayeke nzoni ala tambula na ndembe so lumiere ni ayeke na tere ti ala, tongaso si vukongo ndo awara ala pepe, ngbanga ti so zo so atambula na ya ti vukongo ndo ahinga ndo so lo yeke gue daa pepe.

Ésaïe 8:22

Na pekoni, ala yeke baa ndo na sese: gi ye ti ngangu na vukongo ndo, vukongo ndo so ayeke zia kota mbeto na be ti zo, vukongo ndo so avuko pitipiti.

Abia (Psaumes) 73:18

Biani, mo yeke zia ala na ndö ti lege so azene zenengo, mo yeke sara titene ala ti si ala girisa hio.

Sigingo 32:34

Fadeso mo gue; mo mu azo ni, mo gue na ala na ndo so mbi tene tënë ni na mo so. Fade *ange ti mbi ayeke tambula na dawa ti mo. Me na lango so mbi yeke ga na tere ti ala, mbi yeke fâ ngbanga na li ti ala ndali ti siokpari ti ala.”

Jude 1:13

Ala yeke tongana asioni *mapo ti le ti kota ngu-ingo so pupu ayeke yingi ni kirikiri, aye ti kamene ti ala ni ayeke sara tongana *afuru ti ngu. Ala yeke nga tongana ambeni tongoro so ayeke tambula kirikiri; ndo so a leke ndali ti azo ni titene ala duti daa kpu na kpu ayeke na ndo so avuko pitipiti.

1 Jean 2:11

Me zo so be ti lo ake ita ti lo, andaa lo yeke na ya ti vukongo ndo; lo yeke tambula na ya ti vukongo ndo, lo hinga ndo so lo yeke gue daa pepe, ngbanga ti so vukongo ndo ni avuko le ti lo awe.

Mishe 7:4

Zo ti nzoni na popo ti ala ayeke tongana aki; zo ti mbirimbiri na popo ti ala ayeke sioni ahon gba ti akeke ti ki. Lango ti fango ngbanga na ndö ti ala alingbi awe, lango so asanziri ti ala, awayanga-Nzapa, atene tënë ni kozoni awe so. Fadeso be ti ala afun kue awe.

Jérémie 50:27

Ala fâ angangu turugu ti lo kue, ala gue na aturugu ni na ndo ti fango azo! So ye ti mawa na aturugu ni! Biani, lango ni alingbi awe, ndembe so KOTA GBIA ayeke ga na tere ti ala!

Jérémie 48:44

Zo so ayeke kpe na dawa ti kota mbeto, lo yeke ti na ya ti kota du; zo so ayeke londo na ya ti du ni ti sigigi, lo yeke ti na ya ti gbanda. Biani, mbi yeke sara si ye so aga na ndö ti Moab na ngu so mbi yeke ga na tere ti lo; so tënë ti yanga ti KOTA GBIA laa.

Mbeti ti Job 18:18

A yeke mu lo na popo ti azo so angba na fini, a bi lo na ndo ti akuâ so avuko vukongo; a yeke tumba lo na ndö ti sese.

Ndia ti fani use ni 32:35

mbi yeke kiri peko ti sioni na ala, mbi yeke kiri peko ti ye na ala alingbi na sarango ye ti ala na ndembe so gere ti ala ayeke *zene si ala ye ti ti. Biani, lango ti ye ti ngangu ni aga nduru awe, lango ti kuâ ti ala angba yongoro pepe.’

Abia (Psaumes) 82:5

Me ala anzapa ni so, ala hinga ye pepe, ala hinga ndo pepe, ala yeke tambula na ya ti vukongo ndo, ndani laa gere ti sese kue ayeke yingi.

Abia ti demango tere 2:20

KOTA GBIA, mo baa nga maa! Azo ti mo laa mo sara na ala tongaso? Mo baa, awali so adu amolenge si abata ala so, ala kiri ti te amolenge ni tongana nyen so-oo? Azo ague ngbii ti fâ awayango-sandaga na awayanga-Nzapa taa na ya ti kota da ti mo biani?

Jérémie 8:12

Kamene alingbi fade ti gbu le ti ala ndali ti asioni ye so ala yeke sara si zo alingbi ti baa na le ti lo fani use pepe; me kamene agbu le ti ala oko pepe. Ala hinga atene, so sioni ye laa ala yeke sara so pepe. Ndani laa KOTA GBIA atene: Ala yeke ti legeoko na tanga ti azo so ayeke ti. Na ndembe so mbi yeke ga na tere ti azo ni, ala nga, ala yeke ti.”