Jean 21:17 - Mbeti ti Nzapa - Tënë so amu fini

¹⁷ Jésus akiri ahunda lo ti fani ota ni, atene: “Simon, molenge ti Jean, mo ye mbi?” Vundu asara Pierre, ngbanga ti so Jésus ahunda lo fani ota, atene: “Mo ye mbi?” Tongaso lo tene na Jésus: “Kota Gbia, mo hinga ye kue, mo hinga so mbi ye mo!” Jésus atene na lo: “Bata ataba ti mbi.

Jean 21:17 Referans Kwoze

Jean 13:38

Jésus akiri tënë, atene: “Mo yeke nduru biani ti ka fini ti mo ndali ti mbi? Biani, mbi tene na mo taa-tënë: kozo titene koli-kondo atoto, mo yeke bere tënë ti mbi fani ota.”

Marc 14:72

Gi na ndembe ni, koli-kondo atoto ti fani use. Tongaso Pierre adabe ti lo na tënë so lani Jésus atene na lo, atene: “Kozo titene koli-kondo atoto fani use, fade mo yeke bere tënë ti mbi fani ota.” Tongaso Pierre ati na toto.

Jean 16:30

Ti fadeso, e hinga, e tene, mo hinga ye kue, mo lingbi titene zo akiri ahunda mo na mbeni tënë pepe. Ndani laa e ma na be so, mo londo na Nzapa si mo ga.”

Aye so Nzapa afa 2:23

Fade mbi yeke fâ azo so kue ayeke mu peko ti wali ni. Na pekoni, a-Eglize kue ayeke hinga atene, mbi yeke lo so lo hinga tënë so ayeke na ya ti be ti zo nga na nzara ti be ti zo. Fade mbi yeke futa zo oko oko alingbi na ye so lo sara.

Efeze 4:30

Ala mu vundu na Yingo-Vuru pepe. Yingo-Vuru ayeke tongana nzoroko so Nzapa azia na tere ti ala ti fa so ala yeke ti lo. Na lege ti Yingo-Vuru, Nzapa akiri afa so mbeni lâ, fade lo yeke zi ala na ya ti siokpari biani biani.

Awatokua 15:8

Nzapa so ahinga be ti zo afa atene, lo ye azo ti amara nde; lo fa ni na lege so lo mu Yingo-Vuru na ala gi tongana ti so lo mu ni na e.

Jean 15:10

Tongana ala sara ye alingbi na andia ti mbi, fade ala yeke ngba na ya ti ndoye ti mbi, tongana ti so mbi sara ye alingbi na andia ti Babâ si mbi ngba na ya ti ndoye ti lo.

Jean 14:15

“Tongana ala ye mbi, fade ala yeke sara ye alingbi na andia ti mbi.

Abia (Psaumes) 17:3

Mo gi ya ti atënë ti be ti mbi awe. Na bi, mo ga ti gi ti hinga mbi nzoni, mo tara be ti mbi, mo wara ye oko pepe; tënë so mbi gbu li ti mbi daa, ni laa asigigi na yanga ti mbi pepe.

2 Pierre 3:1

A-ita ti mbi so mbi ye ala mingi, use mbeti so mbi su ti tokua na ala laa. Na ya ti ambeti ni use kue, mbi ye ti dabe ti ala na ndö ti aye so ala hinga awe si ala duti azo so tënë ti be ti ala ayeke na legeni.

1 Pierre 1:6

Ndani laa ala yeke duti na ngia, ataa so alingbi ala ngba ti baa amara ti pasi nde nde na ya ti kete ngoi so.

2 Korente 1:12

Ye so e yeke gonda tere ti e daa ayeke so: be ti e afa na e atene, dutingo ti e na dunia so, e duti na vuru be nga na be so sioni oko ayeke daa pepe. E duti tongaso mbirimbiri na mbage ti ala na lege ti ndara ti azo pepe, me na lege ti nzoni be ti Nzapa.

Awatokua 1:24

Na pekoni, ala sambela Nzapa, atene: “Kota Gbia, mo hinga be ti azo kue. Tongaso, na popo ti azo use so, fa na e zo wa laa mo soro lo

Jean 18:27

Pierre akiri abere. Gi hio tongaso, koli-kondo atoto.

Jean 18:4

Jésus ahinga fade ye so kue ayeke si ande na lo. Nilaa lo gue nduru na ala si lo hunda ala, lo tene: “Ala yeke gi zo wa?”

Jean 12:8

Azo ti mawa ayeke duti lakue na popo ti ala; me mbi, mbi yeke duti lakue na popo ti ala pepe.”

Matthieu 25:40

Fade Gbia ni ayeke kiri tënë na ala: ‘Mbi tene na ala taa-tënë: ye so kue ala sara na asenge zo so ayeke a-ita ti mbi, andaa na mbi laa ala sara ni.’

Abia ti demango tere 3:33

Ti zia zo na ya ti pasi wala ti zia vundu na be ti zo, so laa anzere na be ti lo pepe.

Jérémie 17:10

“Mbi, KOTA GBIA, mbi yeke baa be ti zo na atënë ti be ti zo kue. Tongaso, mbi lingbi ti sara ye na zo alingbi na dutingo ti lo nga na asarango ye ti lo.

1 Mbai 29:17

Nzapa ti mbi, mbi hinga so mo laa mo yeke baa ya ti be ti zo si mo yeda na ye so ayeke mbirimbiri. Ti mbi, na be so ayeke mbirimbiri laa mbi mu aye so kue na mo na be ti mbi wani. Fadeso, mbi yeke na ngia ti baa azo ti mo so abongbi ge ti mu ye na mo na be ti ala wani.

1 Agbia 17:18

Mama ti molenge ni atene na Élie: “Zo ti Nzapa, ti mo na mbi nyen? Mo ga na da ti mbi ti kiri ti fa na Nzapa peko ti asioni ye so mbi sara? Mo ga nga ti sara titene molenge ti mbi akui?”

Josué 22:22

“Nzapa, Nzapa, KOTA GBIA! Nzapa, Nzapa, KOTA GBIA! Lo yeke Nzapa so ayeke na ndö ti anzapa kue. Lo hinga nda ti ye so e sara. Fade azo ti Israel kue ayeke hinga nda ti ye ni. Tongana e sara ngangu li wala e sara mbeni ye so ayeke sioni mingi ti ke KOTA GBIA, ayeke nzoni lo soo e na lango ni so pepe!

Aye so Nzapa afa 3:19

Azo so kue mbi ye ala, mbi yeke pika ala si mbi yeke kiri ala na nzoni lege. Zia be ti mo kue na sarango kua, zia sioni lege ti sarango ye ti mo!

2 Samuel 7:20

Tënë ti nyen laa, mbi David, mbi lingbi ti kiri ti tene na mo Kota Gbia NZAPA? Ti mo, mo hinga mbi, zo ti kua ti mo awe.

Jean 21:18

Biani, mbi tene na mo taa-tënë: na ndembe so mo de maseka, mo wani laa mo yeke kanga kamba ti ndö ti bongo ti mo si mo yeke gue na ndo so kue be ti mo aye. Me tongana mo ga mbakoro awe, fade mo yeke yoro maboko ti mo si mbeni zo nde ayeke kanga kamba ti ndö ti bongo ti mo si lo yeke gue na mo na ndo so be ti mo aye pepe.”

1 Mbai 17:18

Tënë ti nyen laa, mbi David, mbi lingbi ti kiri ti tene na mo ndali ti iri ti mbi so mo mu na nduzu so? Mo hinga mbi, zo ti kua ti mo awe.

Jean 4:16

Jésus atene na lo: “Gue mo iri koli ti mo, mo ga na lo.”

Awatokua 11:10

Ye ni asi tongaso fani ota si na pekoni, a kiri na ye ni kue na yayu.