Galasii 3:11 - Mbeti ti Nzapa - Tënë so amu fini

¹¹ Tënë so ayeke taa-tënë biani: zo oko alingbi ti ga mbirimbiri pepe na le ti Nzapa na lege ti Ndia. Mbeti ti Nzapa atene: “Zo so aga mbirimbiri na le ti Nzapa na lege ti mabe, fade lo yeke duti na fini.”

Galasii 3:11 Referans Kwoze

Habakuk 2:4

Su tënë ni tongaso: ‘Zo so baba ahon ndö ti lo, fade lo yeke kui; me fade zo ti mbirimbiri ayeke na fini na lege ti batango tënë ti yanga ti Nzapa.’

Rome 1:17

Biani, Nzoni Tënë ni afa na le ti azo lege so Nzapa asara titene azo aga mbirimbiri na le ti lo: gi na lege ti mabe, na tongo ndani ngbii asi na ndani, tongana ti so Mbeti ti Nzapa atene: “Zo so aga mbirimbiri na lege ti mabe, fade lo yeke duti na fini.”

Ahebro 10:38

Nzapa atene: “Zo so aga mbirimbiri na le ti mbi na lege ti mabe, fade lo yeke duti na fini. Me tongana lo zia lege ti mabe, fade mbi yeke wara ngia na lege ti lo pepe.”

Galasii 2:16

Me ye so e hinga ayeke so: zo aga mbirimbiri na le ti Nzapa gi na lege so lo ma na be na Jésus Christ, me sarango ye alingbi na *Ndia pepe. E nga, e ma na be na Jésus Christ awe, e ga mbirimbiri na le ti Nzapa na lege ti mabe; sarango ye alingbi na Ndia laa asara si e ga mbirimbiri pepe. Biani, sarango ye alingbi na Ndia laa asara si zo oko aga mbirimbiri na le ti Nzapa pepe.

Zo ti bongbingo azo 7:20

Biani, na ndö ti sese so, mbeni zo ti mbirimbiri oko ayeke daa pepe, so lo yeke sara gi nzoni si lo sara siokpari pepe.

Aye so Nzapa afa 5:9

Ala yeke he fini bia, atene: “Mo lingbi ti mu mbeti ni ti zi anzoroko ni, ngbanga ti so a fâ mo ando awe. Mo futa ngere ti vongo azo na mene ti mo titene mo vo azo ti akete mara kue na Nzapa, azo ti ayanga ti kodro kue, azo ti akodro kue na azo ti amara kue.

Ésaïe 53:6

E kue, e yeke lani tongana ataba so akangbi kirikiri, zo oko oko amu lege ti lo wani. Me KOTA GBIA asara si asioni ti e kue ati na ndö ti lo.

Mbeti ti Job 42:6

Ndani laa, be ti mbi aso ndali ti tënë so lani mbi tene. Mbi hinga so tënë ni ayeke na legeni pepe; mbi duti na ya ti fuku ti sese, na ya ti mburu ti wâ.

Jacques 3:2

E kue, e yeke girisa lege fani mingi. Tongana mbeni zo agirisa lege na ya ti tenengo tënë ti lo pepe, andaa lo yeke zo ti nzoni kue, lo lingbi ti kanga tere ti lo kue.

Ésaïe 64:6

Zo oko ti di iri ti mo ayeke daa pepe, zo oko ti zingo na lango si lo bongbi oko na mo ayeke daa pepe. Biani, mo honde le ti mo na e, mo zia e si e woko na gbe ti sioni ti e.

Ésaïe 6:5

Tongaso mbi tene: “Mawa na mbi, mbi kui awe! Mbi yeke zo so tënë ti yanga ti mbi ayeke *sioni, mbi yeke lango na popo ti azo so tënë ti yanga ti ala ayeke *sioni. Mbi baa na le ti mbi wani Gbia, KOTA GBIA so ayeke na ndö ti dunia kue.”

Abia (Psaumes) 19:12

Atënë ni azi nga le ti mbi, zo ti kua ti mo; zo ayeke wara ye mingi na lege ti batango atënë ni.

Mbeti ti Job 40:4

Mbi yeke ti mbi ye oko pepe. Tënë ti nyen laa mbi lingbi ti kiri ni na mo? Tënë ahunzi na yanga ti mbi awe.

Mbeti ti Job 9:3

Tongana zo aye ti gi tënë na Nzapa, zo ni atene tënë saki oko, Nzapa akiri tënë oko pepe.

1 Agbia 8:46

“Tongana azo ti Israel asara siokpari so ake mo – ngbanga ti so mbeni zo so asara siokpari pepe ayeke daa pepe – tongana mo sara ngonzo na tere ti ala si mo zia ala na maboko ti awato ti ala titene awato ti ala ni agbu ala, ague na ala na mbeni kodro so ayeke yongoro, wala so ayeke nduru,

Abia (Psaumes) 143:2

Mbi yeke zo ti kua ti mo, fâ ngbanga na li ti mbi pepe, ngbanga ti so na le ti mo, zo ti mbirimbiri ayeke daa pepe.

Jacques 1:27

Mbirimbiri vorongo Nzapa so sioni ye oko ayeke daa pepe, ayeke mungo maboko na anyindu nga na awali-mua so ayeke baa pasi; mbirimbiri vorongo Nzapa ayeke nga ti ke sarango aye ti potopoto ti dunia so.